വാഷിങ്ടന്: യു എസ് വൈസ് പ്രസിഡന്റ് ജെ ഡി വാന്സിന്റെ വീടിനു നേരെ ആക്രമണം. ഒഹായോയിലുള്ള വസതിക്കു നേരെയാണ് ആക്രമണമുണ്ടായത്. ആക്രമണത്തില് ജനലിന്റെ ചില്ലുകള് തകര്ന്നു. സംഭവത്തില് ഒരാളെ കസ്റ്റഡിയിലെടുത്തതായി റിപ്പോര്ട്ടുകളുണ്ട്.
പ്രാദേശികസമയം തിങ്കളാഴ്ച പുലര്ച്ചെ 12.45 ഓടെയായിരുന്നു ആക്രമണം. യു എസ് സീക്രട്ട് സര്വീസ് ഓഫിസറാണ് വാന്സിന്റെ വീടിന് സമീപം അജ്ഞാതനെ കണ്ടത്. തുടര്ന്ന് വിവരം ലോക്കല് പൊലീസിനെ അറിയിക്കുകയായിരുന്നു.
ആക്രമണം നടക്കുമ്പോള് വാന്സും കുടുംബവും വീട്ടിലുണ്ടായിരുന്നില്ല. ആക്രമണത്തില് തകര്ന്ന ജനല്പാളികളുടെ ചിത്രങ്ങള് സമൂഹമാധ്യമങ്ങളില് പ്രചരിക്കുന്നുണ്ട്. അതേസമയം, കസ്റ്റഡിയിലെടുത്തയാളുടെ വിവരങ്ങള് പുറത്തുവന്നിട്ടില്ല. സംഭവത്തില് അന്വേഷണം നടക്കുകയാണെന്നു യു എസ് മാധ്യമങ്ങള് റിപ്പോര്ട്ടു ചെയ്യുന്നു.
സുരക്ഷയുടെ ഭാഗമായി വാന്സിന്റെ വസതിക്കു ചുറ്റുമുള്ള റോഡുകള് ഞായറാഴ്ച വരെ അടച്ചിട്ടിരുന്നു. രാത്രിയിലാണ് വീട്ടില് ആക്രമണം ഉണ്ടായത്. പ്രദേശത്ത് വെടിയൊച്ച കേട്ടതായി സ്ഥിരീകരിക്കാത്ത റിപ്പോര്ട്ടുകളുണ്ട്.