വാഷിംഗ്ടണ്‍: എലോണ്‍ മസ്‌കിന്റെ നേതൃത്വത്തില്‍ ആരംഭിച്ച അമേരിക്കന്‍ സര്‍ക്കാര്‍ വകുപ്പായ 'ഡിപ്പാര്‍ട്ട്‌മെന്റ് ഓഫ് ഗവര്‍മെന്റ് എഫിഷന്‍സി' (DOGE) ഇനി ഇല്ലെന്ന വെളിപ്പെടുത്തലാണ് അമേരിക്കന്‍ ഭരണകൂടത്തില്‍ പുതിയ ചര്‍ച്ചകള്‍ക്ക് തുടക്കം കുറിച്ചിരിക്കുന്നത്. പ്രസിഡന്റ് ഡോണാള്‍ഡ് ട്രംപ് അധികാരമേറ്റ് ആദ്യ ദിനം തന്നെ രൂപീകരിച്ച DOGE എട്ട് മാസം കഴിയുമ്പോഴേക്കും കരാര്‍ കാലാവധി പൂര്‍ത്തിയാകുന്നതിന് മുന്‍പ് തന്നെ നിശ്ശബ്ദമായി അവസാനിപ്പിച്ചതായാണ് സൂചനകള്‍. കൂട്ടച്ചെലവ് ചുരുക്കുന്നതിനും ഫെഡറല്‍ ഏജന്‍സികളെ 'ഒതുക്കി ചെറുതാക്കുന്നതിനും' ലക്ഷ്യമിട്ട് ജനുവരിയില്‍ സ്ഥാപിതമായ DOGE സര്‍ക്കാര്‍ വകുപ്പുകളിലെ ആയിരക്കണക്കിന് ജീവനക്കാരെ പുറത്താക്കുകയും നൂറുകോടികളുടെ ചെലവ് ലാഭിച്ചതായി അവകാശപ്പെടുകയും ചെയ്തിരുന്നു. പക്ഷേ സംവിധാനം ഇപ്പോള്‍ പ്രവര്‍ത്തിക്കുന്നതു സംബന്ധിച്ച ഒരു വിവരവും ലഭിക്കുന്നില്ലെന്ന വിമര്‍ശനം ശക്തമായിരുന്നു.
ഓഫീസ് ഓഫ് പെഴ്‌സണല്‍ മാനേജ്‌മെന്റിന്റെ (OPM) ഡയറക്ടര്‍ സ്‌കോട്ട് കുപോര്‍ 'DOGE എന്നൊരു വകുപ്പ് ഇപ്പോള്‍ നിലനില്‍ക്കുന്നില്ല' എന്ന് വ്യക്തമാക്കിയതോടെയാണ് സംശയങ്ങള്‍ക്ക് കൂടുതല്‍ ബലം വെച്ചത്. DOGEന്റെ പ്രധാന ചുമതലകളില്‍ പലതുമായി ഇപ്പോള്‍ OPM തന്നെയാണ് മുന്നോട്ടുപോകുന്നതെന്നും അദ്ദേഹം കൂട്ടിച്ചേര്‍ത്തു. ഫെഡറല്‍ ഉദ്യോഗസ്ഥരില്‍ നിന്ന് 2 ലക്ഷം പേരെയാണ് നേരിട്ട് പിരിച്ചുവിട്ടതെന്നും 75,000 പേര്‍ സ്വമേധയാ പിരിച്ചുവിടല്‍ പാക്കേജുകള്‍ സ്വീകരിച്ചതെന്നുമാണ് റിപ്പോര്‍ട്ടുകള്‍. DOGE അതീവ ശുഷ്‌കാന്തിയോടെ പ്രവര്‍ത്തിച്ചതാണെന്ന് മസ്‌ക് ഫെബ്രുവരിയില്‍ പറഞ്ഞിരുന്നുവെങ്കിലും പ്രവര്‍ത്തനരീതിയില്‍ പുലര്‍ത്തിയിരുന്ന രഹസ്യ സ്വഭാവം പലരിലും ആശങ്കയുണര്‍ത്തുകയായിരുന്നു.
ജൂണില്‍ പൊളിറ്റിക്കോ റിപ്പോര്‍ട്ട് ചെയ്തതുപോലെ DOGE ആസ്ഥാനം വിട്ട് ജീവനക്കാര്‍ തങ്ങളുടെ വസ്തുക്കള്‍ പാക്ക് ചെയ്ത് മാറ്റുന്ന കാഴ്ചകളും ഏജന്‍സിയുടെ 'അവസാനഘട്ടത്തിലേക്കുള്ള യാത്ര' കൂടുതല്‍ വ്യക്തമായിരുന്നു. ഫെബ്രുവരി മുതല്‍ താല്‍ക്കാലിക താമസ കേന്ദ്രംപോലെ പ്രവര്‍ത്തിച്ചിരുന്ന ആസ്ഥാനം കണ്ടയുടന്‍ ജീവനക്കാരെ ഭാവി നിയമപ്രശ്‌നങ്ങളുടെ ഭയം അലട്ടുന്നുവെന്ന സൂചനകളും പുറത്തുവന്നു. ഇത് മസ്‌ക്-ട്രംപ് സോഷ്യല്‍ മീഡിയ തര്‍ക്കത്തിന് പിന്നാലെയാണ് നടന്നത്.
DOGEന്റെ പല പ്രമുഖരും ഇതിനോടകം മറ്റ് ഗവണ്‍മെന്റ് തസ്തികകളിലേക്ക് മാറിക്കഴിഞ്ഞിട്ടുണ്ട്. എയര്‍ ബിഎന്‍ബി സഹസ്ഥാപകന്‍ ജോ ഗെബ്ബിയയെ സര്‍ക്കാര്‍ വെബ്‌സൈറ്റുകളുടെ ദൃശ്യരൂപത്തില്‍ മാറ്റം കൊണ്ടുവരാനുള്ള ചുമതലയിലേര്‍പ്പെടുത്തിയപ്പോള്‍, പ്രവര്‍ത്തക അഡ്മിനിസ്‌ട്രേറ്റര്‍ ആയിരുന്ന എമി ഗ്ലീസണ്‍ ആരോഗ്യ - മനുഷ്യ സേവനങ്ങളുടെ സെക്രട്ടറിയായ റോബര്‍ട്ട് എഫ്. കെന്നഡി ജൂനിയറിന്റെ ഉപദേശകയായി മാറി. സീനിയര്‍ DOGE അധികാരിയായിരുന്ന സഛറി ടെറല്‍ ഇപ്പോള്‍ ആരോഗ്യ വകുപ്പിന്റെ ചീഫ് ടെക്‌നോളജി ഓഫീസര്‍ ആണ്. അതേസമയം റേച്ചല്‍ റൈലി നാവല്‍ റിസര്‍ച്ച് ഓഫിസിന്റെ മേധാവിയായി ചുമതലയേറ്റിട്ടുണ്ട്.
DOGE ഔപചാരികമായി പൂട്ടിയതാണോ, ഇല്ലെങ്കില്‍ ഒരു 'കേന്ദ്രസ്ഥാനം ഇല്ലാതെ' മറ്റുവകുപ്പുകളില്‍ ചിതറിക്കിടക്കുന്ന ഒരു സംവിധാനമായാണോ ഇപ്പോള്‍ പ്രവര്‍ത്തിക്കുന്നത് എന്നതിനെക്കുറിച്ചുള്ള വ്യക്തത ഇപ്പോഴും ഭരണകൂടം നല്‍കേണ്ടതുണ്ട്. എന്നാല്‍ OPM മേധാവിയുടെ വെളിപ്പെടുത്തലോടെ എലോണ്‍ മസ്‌കിന്റെ DOGE പ്രായോഗികമായി അവസാനിച്ചുവെന്നാണ് വാഷിംഗ്ടണില്‍ പരക്കെ വിലയിരുത്തല്‍.
'എലോണ്‍ മസ്‌കിന്റെ ഡോജ് ഇപ്പോള്‍ ഇല്ല' -ഞെട്ടിക്കുന്ന വെളിപ്പെടുത്തലുമായി യുഎസ് ഉദ്യോഗസ്ഥന്‍
