വാഷിംഗ്ടണ്: ഇറാനെതിരായ അമേരിക്കന് സൈനിക ആക്രമണങ്ങളുടെ വീഡിയോയില് തന്റെ പ്രശസ്തമായ 'ഫയര്വര്ക്ക്' എന്ന ഗാനം അനുമതിയില്ലാതെ ഉപയോഗിച്ചതിനെതിരെ പോപ് താരം കാറ്റി പെറി വൈറ്റ് ഹൗസിനെതിരെ രംഗത്ത്.
2010ല് പുറത്തിറങ്ങിയ തന്റെ ഹിറ്റ് ഗാനമായ ഫയര്വര്ക്ക് സൈനിക ആക്രമണ ദൃശ്യങ്ങള് ഉള്പ്പെടുത്തിയ വൈറ്റ് ഹൗസ് ടിക്ടോക്ക് വീഡിയോയില് ഉപയോഗിച്ചതില് താന് ഞെട്ടുകയും രോഷാകുലയാകുകയും ചെയ്തതായി കാറ്റി പെറി സാമൂഹിക മാധ്യമത്തിലൂടെ വ്യക്തമാക്കി.
വൈറ്റ് ഹൗസിന്റെ ഔദ്യോഗിക ടിക്ടോക്ക് അക്കൗണ്ടിലാണ് വീഡിയോ പങ്കുവെച്ചത്. സ്ഫോടനങ്ങളുടെയും സൈനിക ആക്രമണങ്ങളുടെയും ദൃശ്യങ്ങള് ഉള്പ്പെടുത്തിയ വീഡിയോയ്ക്ക് 'ഇറാന് മുന്നറിയിപ്പ് നല്കിയിട്ടുണ്ട്' എന്ന അടിക്കുറിപ്പും നല്കിയിരുന്നു.
വീഡിയോയുടെ പശ്ചാത്തലത്തില് കാറ്റി പെറിയുടെ ഫയര്വര്ക്ക് എന്ന ഗാനത്തിലെ 'ബൂം ബൂം ബൂം' എന്ന വരികളും ഉപയോഗിച്ചിരുന്നു.
തന്റെ അനുമതി ഇല്ലാതെയാണ് സംഗീതം ഉപയോഗിച്ചതെന്നും അവര് അനുവാദം ചോദിച്ചിട്ടില്ലെന്നും പ്രസ്തുത നടപടിയെ അംഗീകരിക്കുന്നില്ലെന്നും കാറ്റി പെറി കുറിച്ചു.
തന്റെ ഗാനം വ്യക്തിപരമായ പ്രതിസന്ധികളിലൂടെ കടന്നുപോകുന്ന ആളുകള്ക്ക് പ്രതീക്ഷയും ആത്മവിശ്വാസവും മാനസിക ശക്തിയും നല്കുന്നതിനുള്ള പ്രചോദനഗാനമായാണ് രചിച്ചതെന്ന് അവര് പറഞ്ഞു.
സ്വയംമൂല്യവും പ്രതീക്ഷയും ഉയര്ത്തിപ്പിടിക്കുന്ന ഒരു സന്ദേശത്തെ നാശത്തിന്റെയും അക്രമത്തിന്റെയും ദൃശ്യങ്ങള്ക്ക് ഉപയോഗിക്കുന്നത് തന്റെ ഗാനത്തിന്റെ അടിസ്ഥാന ആശയങ്ങളെയെല്ലാം ലംഘിക്കുന്നതാണെന്ന് പെറി വ്യക്തമാക്കി.
ആളുകളെ ഒന്നിപ്പിക്കാനുള്ളതാണ് തന്റെ സംഗീതമെന്നും യുദ്ധത്തെ ആഘോഷിക്കാനുള്ളതല്ലെന്നും അവര് കൂട്ടിച്ചേര്ത്തു.
അമേരിക്കയും ഇറാനും തമ്മിലുള്ള സംഘര്ഷം തുടരുന്നതിനിടെയാണ് കാറ്റി പെറിയുടെ പ്രതികരണം. എന്നാല് വൈറ്റ് ഹൗസ് ഇതുവരെ പെറിയുടെ വിമര്ശനത്തിന് ഔദ്യോഗിക പ്രതികരണം നല്കിയിട്ടില്ല.
രാഷ്ട്രീയവുമായി ബന്ധപ്പെട്ട സോഷ്യല് മീഡിയ ഉള്ളടക്കങ്ങളില് അനുമതിയില്ലാതെ സംഗീതം ഉപയോഗിച്ചതിനെതിരെ പ്രതികരിക്കുന്ന ആദ്യ കലാകാരിയല്ല കാറ്റി പെറി.
ജൂണില്, അമേരിക്കന് കുടിയേറ്റ- കസ്റ്റംസ് എന്ഫോഴ്സ്മെന്റ് ഉദ്യോഗസ്ഥര് നടത്തിയ അറസ്റ്റുകളുടെ ദൃശ്യങ്ങള് ഉള്പ്പെടുത്തിയ ടിക്ടോക്ക് വീഡിയോയില് തന്റെ 'ബൈ' എന്ന ഗാനം ഉപയോഗിച്ചതിനെതിരെ ഗായിക അരിയാന ഗ്രാന്ഡെ വിമര്ശനം ഉന്നയിച്ചിരുന്നു.
ഇതിനുമുമ്പ് സബ്രിന കാര്പെന്റര്, ഒലീവിയ റോഡ്രിഗോ, സെലിന് ഡിയോണ്, നീല് യങ്, ദ റോളിങ് സ്റ്റോണ്സ് തുടങ്ങിയ പ്രമുഖ സംഗീതജ്ഞരും തങ്ങളുടെ അനുമതിയില്ലാതെ രാഷ്ട്രീയ പ്രചാരണങ്ങളിലോ ഔദ്യോഗിക വീഡിയോകളിലോ ഗാനങ്ങള് ഉപയോഗിച്ചതിനെതിരെ പ്രതിഷേധിച്ചിരുന്നു.