ലൊസാഞ്ചലസ്: യുഎസില്‍ നടുറോഡില്‍ ആയുധവുമായി അഭ്യാസ പ്രകടനം നടത്തിയ സിഖ് യുവാവിനെ പൊലീസ് വെടിവെച്ചു കൊന്നു. മുപ്പത്തിയാറുകാരനായ ഗുര്‍പ്രീത് സിങ്ങാണ് കൊല്ലപ്പെട്ടത്. സിഖ് വംശജരുടെ പരമ്പരാഗത ആയോധന കലയായ 'ഗട്ക' അഭ്യാസം നടത്തവേയാണ് ഗുര്‍പ്രീതിനെ ലൊസാഞ്ചലസ് പൊലീസ് വെടിവെച്ചത്.
റോഡില്‍നിന്ന് കത്തിയുമായി അഭ്യാസം നടത്തുകയായിരുന്നു ഗുര്‍പ്രീത്. കീഴടങ്ങാന്‍ ആവശ്യപ്പെട്ടിട്ടും അനുസരിക്കാതിരിക്കുകയും പൊലീസിനെ ആക്രമിക്കാന്‍ ശ്രമിക്കുകയും ചെയ്തതോടെയാണ് വെടിവെച്ചതെന്ന് ലൊസാഞ്ചലസ് പൊലീസ് പറഞ്ഞു. ഗട്ക അഭ്യാസത്തിനുപയോഗിക്കുന്ന ഇരുവശവും മൂര്‍ച്ചയുള്ള 'ഖണ്ഡ' ആണ് ഗുര്‍പ്രീതിന്റെ പക്കലുണ്ടായിരുന്നതെന്ന് പിന്നീട് തെളിഞ്ഞു.
ജൂലൈ 13നായിരുന്നു സംഭവം. ലൊസഞ്ചലസിലെ ഫിഗുറോവ തെരുവിനും ഒളിംപിക് ബൊളിവാഡിനും ഇടയിലുള്ള തിരക്കേറിയ റോഡില്‍ ഒരാള്‍ ആയുധം വീശി നടക്കുന്നുവെന്ന ഒട്ടേറെ ഫോണ്‍ സന്ദേശങ്ങള്‍ ലഭിച്ചതോടെയാണ് പൊലീസ് സ്ഥലത്തെത്തിയത്. ഗുര്‍പ്രീത് തന്റെ കാര്‍ റോഡിന് നടുവിലായി നിര്‍ത്തിയിട്ടിരുന്നെന്നും ഇടയ്ക്ക് ഖണ്ഡ ഉപയോഗിച്ച് നാവു മുറിക്കാന്‍ ശ്രമിച്ചെന്നും പൊലീസ് പറഞ്ഞു. ആയുധം താഴെ വയ്ക്കാന്‍ പൊലീസ് ഒട്ടേറെത്തവണ ഗുര്‍പ്രീതിനോട് ആവശ്യപ്പെട്ടെങ്കിലും അനുസരിച്ചില്ല. പൊലീസ് അടുത്തേക്ക് പോകാന്‍ ശ്രമിച്ചപ്പോള്‍ ഗുര്‍പ്രീത് ഉദ്യോഗസ്ഥര്‍ക്കുനേരെ കുപ്പിയെറിഞ്ഞു. തുടര്‍ന്ന് കാറില്‍ രക്ഷപ്പെടാന്‍ ശ്രമിച്ച ഇയാള്‍ മറ്റൊരു പൊലീസ് വാഹനത്തെ ഇടിക്കുകയും ചെയ്തു. കാറില്‍ നിന്നിറങ്ങി പൊലീസിനു നേരെ പാഞ്ഞടുത്തപ്പോഴാണ് വെടിവെച്ചതെന്ന് ലൊസാഞ്ചലസ് പൊലീസ് പറഞ്ഞു.
യുഎസില്‍ നടുറോഡില്‍ ആയുധവുമായി അഭ്യാസ പ്രകടനം നടത്തിയ സിഖ് യുവാവിനെ പൊലീസ് വെടിവെച്ചു കൊന്നു.
