തെഹ്റാന്‍: അമേരിക്കയുമായി വീണ്ടും യുദ്ധമുണ്ടായാല്‍ അത് മുന്‍ സംഘര്‍ഷത്തേക്കാള്‍ ദീര്‍ഘകാലം നീണ്ടുനില്‍ക്കാമെന്ന മുന്നറിയിപ്പുമായി ഇറാന്‍. യുദ്ധം എപ്പോള്‍ അവസാനിക്കണമെന്ന് തീരുമാനിക്കാനുള്ള അധികാരം അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനുണ്ടാകില്ലെന്നും ഇറാന്‍ വ്യക്തമാക്കി.
അമേരിക്കയുമായി ഭാവിയില്‍ ഉണ്ടായേക്കാവുന്ന യുദ്ധത്തിന്റെ സമയവും വ്യവസ്ഥകളും തീരുമാനിക്കാന്‍ ട്രംപിന് കഴിയില്ലെന്ന് ഇറാന്‍ സൈനിക വക്താവ് മുഹമ്മദ് അക്രാമിനിയ പറഞ്ഞു. മുന്‍ സംഘര്‍ഷത്തേക്കാള്‍ ദൈര്‍ഘ്യമേറിയതായിരിക്കും പുതിയ യുദ്ധമെന്നും ഇറാന്റെ ഔദ്യോഗിക ടെലിവിഷന്‍ ചാനലിലൂടെ അദ്ദേഹം മുന്നറിയിപ്പ് നല്‍കി.
ഫെബ്രുവരി 28ന് ഇറാനെതിരെ അമേരിക്കയും ഇസ്രായേലും നടത്തിയ വ്യോമാക്രമണങ്ങളോടെയാണ് മുന്‍ യുദ്ധം ആരംഭിച്ചത്. ആക്രമണത്തില്‍ ഇറാന്റെ പരമോന്നത നേതാവ് ആയത്തുല്ല അലി ഖമനേയി കൊല്ലപ്പെട്ടിരുന്നു. ഇതിന് മറുപടിയായി ഇറാന്‍ മിസൈല്‍, ഡ്രോണ്‍ ആക്രമണങ്ങള്‍ നടത്തി. ലെബനനിലും യെമനിലുമുള്ള ഇറാന്‍ പിന്തുണയുള്ള സായുധസംഘങ്ങളും സംഘര്‍ഷത്തില്‍ പങ്കുചേര്‍ന്നിരുന്നു.
ഇറാനെതിരെ ഏതെങ്കിലും തരത്തിലുള്ള ആക്രമണമുണ്ടായാല്‍ അതിന് ആനുപാതികവും നിര്‍ണായകവും ശക്തമായ പ്രത്യാഘാതങ്ങളുണ്ടാക്കുന്നതുമായ തിരിച്ചടി നല്‍കുമെന്ന് പ്രതിരോധമന്ത്രി മെഹര്‍ദാദ് അഖ്ലാഖി ഞായറാഴ്ച മുന്നറിയിപ്പ് നല്‍കി.
ഇറാന്റെ പ്രതിരോധ പ്രതികരണത്തിന്റെ വ്യാപ്തിയോ സമയമോ അനന്തരഫലങ്ങളോ തീരുമാനിക്കാന്‍ ഭീഷണി ഉയര്‍ത്തുന്നവര്‍ക്ക് കഴിയില്ലെന്നും അദ്ദേഹം വ്യക്തമാക്കി.
ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സിന്റെ (ഐ ആര്‍ ജി സി) വക്താവ് ഹൊസൈന്‍ മൊഹെബിയും സമാന മുന്നറിയിപ്പ് നല്‍കി. ഇറാന്റെ പുതിയ പരമോന്നത നേതാവ് ആയത്തുല്ല മുജ്തബ ഖമനേയി നേരത്തെ നടത്തിയ പ്രസ്താവനകളെ അനുസ്മരിപ്പിച്ചായിരുന്നു അദ്ദേഹത്തിന്റെ പ്രതികരണം.
അമേരിക്കയുമായുള്ള സംഘര്‍ഷം ഒരു പ്രത്യേക ഭൂമിശാസ്ത്ര മേഖലയിലേക്ക് മാത്രമായി പരിമിതപ്പെടില്ലെന്നും ശത്രുവിന് നാശനഷ്ടം വരുത്താന്‍ വിപുലമായ യുദ്ധമേഖല നിര്‍വചിച്ചിട്ടുണ്ടെന്നും മൊഹെബി പറഞ്ഞു.
ഇറാന്റെ സൈനികശേഷി അമേരിക്ക തകര്‍ത്തതായും എന്നാല്‍ ഒന്നോ രണ്ടോ ലക്ഷ്യങ്ങള്‍ കൂടി അവശേഷിക്കുന്നുണ്ടെന്നും ട്രംപ് ശനിയാഴ്ച അവകാശപ്പെട്ടിരുന്നു.
ഇറാന്റെ ആണവശേഷി തകര്‍ത്തതായും അവശേഷിക്കുന്ന ഒന്നോ രണ്ടോ കേന്ദ്രങ്ങള്‍ കൈകാര്യം ചെയ്യാന്‍ പത്ത് മിനിറ്റ് മതിയാകുമെന്നും അദ്ദേഹം പറഞ്ഞു. ട്രംപിന്റെ പ്രസ്താവനയോട് ഇറാന്‍ ശക്തമായ ഭാഷയിലാണ് പ്രതികരിച്ചത്.
അമേരിക്കയും ഇറാനും തമ്മിലുള്ള സംഘര്‍ഷം അവസാനിപ്പിക്കുന്നതിനുള്ള നയതന്ത്ര നീക്കങ്ങളില്‍ പുരോഗതിയുണ്ടായതായി ഖത്തര്‍ ആസ്ഥാനമായ അല്‍ അറബി അല്‍ ജദീദ് പത്രം റിപ്പോര്‍ട്ട് ചെയ്തു.
ഖത്തറിന്റെയും പാകിസ്ഥാന്റെയും മധ്യസ്ഥശ്രമങ്ങളുമായി ബന്ധപ്പെട്ട വൃത്തങ്ങളെ ഉദ്ധരിച്ചുള്ള റിപ്പോര്‍ട്ട് പ്രകാരം, ഇറാന്റെ ആണവപദ്ധതി, ഹോര്‍മുസ് കടലിടുക്ക്, സാമ്പത്തിക ആനുകൂല്യങ്ങള്‍ തുടങ്ങിയ വിഷയങ്ങളില്‍ പ്രാഥമിക ധാരണയിലെത്താന്‍ വാഷിംഗ്ടണും തെഹ്റാനും ശ്രമം നടത്തിയിട്ടുണ്ട്.
സാധ്യമായ കരാറിന് ചൈനയും റഷ്യയും ഉറപ്പുനല്‍കുന്ന രാജ്യങ്ങളായി പ്രവര്‍ത്തിച്ചേക്കുമെന്നും റിപ്പോര്‍ട്ടില്‍ പറയുന്നു.
ഒക്ടോബര്‍ 30ന് തെഹ്റാനില്‍ ഖത്തര്‍ മധ്യസ്ഥരും ഇറാന്‍ ഉദ്യോഗസ്ഥരും തമ്മില്‍ 12 മണിക്കൂറിലേറെ നീണ്ട ചര്‍ച്ചകള്‍ നടത്തിയിരുന്നു. അമേരിക്കയും ഇറാനും തമ്മില്‍ വീണ്ടും നേരിട്ടുള്ള ചര്‍ച്ചകള്‍ക്ക് സാഹചര്യമൊരുക്കുകയും സംഘര്‍ഷം കൂടുതല്‍ രൂക്ഷമാകുന്നത് തടയുകയുമായിരുന്നു കൂടിക്കാഴ്ചയുടെ ലക്ഷ്യം.
ഖത്തറില്‍ ഇരുരാജ്യങ്ങളും നേരിട്ട് ചര്‍ച്ച നടത്തുമോയെന്ന കാര്യത്തില്‍ ഔദ്യോഗിക സ്ഥിരീകരണം പുറത്തുവന്നിട്ടില്ല. എങ്കിലും നയതന്ത്ര നീക്കങ്ങള്‍ മേഖലയില്‍ പുതിയ പ്രതീക്ഷകള്‍ക്ക് വഴിതുറന്നിരിക്കുകയാണ്.