ബീജിംഗ്: ചാരപ്രവര്ത്തനത്തില് ഏര്പ്പെട്ടെന്നാരോപിച്ച് ഒരു അമേരിക്കന് പൗരനെ കസ്റ്റഡിയിലെടുത്തതായി ചൈന വെള്ളിയാഴ്ച അറിയിച്ചു. മ്യാന്മറിലെ രാഷ്ട്രീയ സംഭവവികാസങ്ങളെക്കുറിച്ച് പഠനം നടത്തുന്ന സ്വതന്ത്ര ഗവേഷണ സ്ഥാപനമായ ഇന്സ്റ്റിറ്റ്യൂട്ട് ഫോര് സ്ട്രാറ്റജി ആന്ഡ് പോളിസി- മ്യാന്മര് (ഐ എസ് പി- എം) സ്ഥാപകനും രാഷ്ട്രീയ വിശകലന വിദഗ്ധനുമായ മിന് സിന് ആണ് കസ്റ്റഡിയിലുള്ളതെന്ന് സ്ഥിരീകരിച്ചു.
ചൈനയുടെ ദേശീയ സുരക്ഷയെ അപകടത്തിലാക്കുന്ന തരത്തിലുള്ള ചാരപ്രവര്ത്തനങ്ങളില് ഏര്പ്പെട്ടുവെന്ന സംശയത്തിന്റെ അടിസ്ഥാനത്തിലാണ് മിന് സിനെതിരെ നടപടി സ്വീകരിച്ചിരിക്കുന്നതെന്ന് പ്രതിവാര വാര്ത്താസമ്മേളനത്തില് സംസാരിച്ച ചൈനീസ് വിദേശകാര്യ മന്ത്രാലയ വക്താവ് ലിന് ജിയാന് പറഞ്ഞു.
മിന് സിനെതിരെ ക്രിമിനല് നിര്ബന്ധ നടപടികള് സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി. എന്നാല് ആരോപണങ്ങളുടെ വിശദാംശങ്ങളോ അതിനെ സാധൂകരിക്കുന്ന തെളിവുകളോ ചൈനീസ് അധികൃതര് പുറത്തുവിട്ടിട്ടില്ല.
മ്യാന്മറിലെ രാഷ്ട്രീയ സാഹചര്യം, ആഭ്യന്തര സംഘര്ഷങ്ങള്, പ്രാദേശിക സുരക്ഷാ വിഷയങ്ങള് എന്നിവയാണ് മിന് സിന്റെ പ്രധാന ഗവേഷണ മേഖലകള്. മ്യാന്മറിലെ ആഭ്യന്തര യുദ്ധം, ഭരണപരമായ വെല്ലുവിളികള്, അതിര്ത്തി മേഖലകളില് ചൈനയുള്പ്പെടെയുള്ള വിദേശ ശക്തികളുടെ സ്വാധീനം തുടങ്ങിയ വിഷയങ്ങളില് ഐ എസ് പി- എം സ്ഥിരമായി പഠന റിപ്പോര്ട്ടുകള് പ്രസിദ്ധീകരിക്കാറുണ്ട്.
വാര്ത്താ ഏജന്സിയായ എ എഫ് പി റിപ്പോര്ട്ട് ചെയ്തതനുസരിച്ച് മിന് സിനുമായി തൊഴില്പരമായ ബന്ധമുള്ള ഒരാളാണ് അറസ്റ്റ് സംബന്ധിച്ച വിവരങ്ങള് പുറത്തുവിട്ടത്. ജൂണ് 3ന് ചൈനയിലെ യുന്നാന് പ്രവിശ്യയിലെ കുന്മിങ് വിമാനത്താവളത്തില് എത്തിയ ഉടന് അദ്ദേഹത്തെ കസ്റ്റഡിയിലെടുത്തതായാണ് റിപ്പോര്ട്ട്. മ്യാന്മറുമായി അതിര്ത്തി പങ്കിടുന്ന പ്രദേശമാണ് യുന്നാന്.
ഒരു യോഗത്തില് പങ്കെടുക്കുന്നതിനായാണ് മിന് സിന് കുന്മിങിലെത്തിയതെന്നാണ് കേസുമായി അടുത്ത ബന്ധമുള്ളവര് പറയുന്നത്. എന്നാല് ഈ സന്ദര്ശനം ഗവേഷണ പ്രവര്ത്തനങ്ങളുമായി ബന്ധപ്പെട്ടതാണോ എന്ന കാര്യത്തില് ഇതുവരെ വ്യക്തതയില്ല.
കേസുമായി ബന്ധപ്പെട്ട വിവരങ്ങള് ചൈനീസ് അധികൃതര് ഗ്വാങ്ഷുവിലെ അമേരിക്കന് കോണ്സുലേറ്റിനെ അറിയിച്ചതായും റിപ്പോര്ട്ടുകളുണ്ട്.
മിന് സിന്റെ കുടുംബാംഗങ്ങളും സഹപ്രവര്ത്തകരും കോണ്സുലേറ്റ് അധികൃതരുമായി ബന്ധപ്പെട്ട് തുടര്നടപടികള് സ്വീകരിക്കുന്നുണ്ട്. കുടുംബം വലിയ ആശങ്കയിലാണെന്ന് എ എഫ് പി ഉദ്ധരിച്ച ഉറവിടം വ്യക്തമാക്കി.
ഇതിനിടെ, അമേരിക്കന് സ്റ്റേറ്റ് ഡിപ്പാര്ട്ട്മെന്റോ ഐ എസ് പി- എം സ്ഥാപനമോ വിഷയത്തില് ഇതുവരെ ഔദ്യോഗിക പ്രതികരണം നടത്തിയിട്ടില്ല.
2021-ല് നടന്ന സൈനിക അട്ടിമറിയിലൂടെ ആങ് സാന് സൂ ചിയുടെ നേതൃത്വത്തിലുള്ള സിവിലിയന് ഭരണകൂടം പുറത്താക്കപ്പെട്ടതിന് ശേഷം മ്യാന്മറില് നിന്ന് പല രാഷ്ട്രീയ പ്രവര്ത്തകരും അഭയം തേടിയ പ്രധാന കേന്ദ്രമായി തായ്ലന്ഡിലെ ചിയാങ് മായ് മാറിയിരുന്നു. ഐ എസ് പി- എം പ്രവര്ത്തിക്കുന്നത് ഈ നഗരത്തില് നിന്നാണ്.
ഐ എസ് പി- എം ഉള്പ്പെടെയുള്ള നിരവധി ഗവേഷണ സ്ഥാപനങ്ങളിലെ വിശകലന വിദഗ്ധര് മ്യാന്മറിലെ സംഘര്ഷത്തില് ചൈനയുടെ പങ്കിനെക്കുറിച്ച് മുമ്പും ചോദ്യങ്ങള് ഉയര്ത്തിയിട്ടുണ്ട്. തന്ത്രപരവും സാമ്പത്തികവും സുരക്ഷാ സംബന്ധവുമായ താത്പര്യങ്ങള്ക്കനുസരിച്ച്, മ്യാന്മറിലെ സൈനിക ഭരണകൂടത്തെയും ചില വിമത ഗ്രൂപ്പുകളെയും ചൈന വിവിധ ഘട്ടങ്ങളില് പിന്തുണച്ചിട്ടുണ്ടെന്നാണ് അവരുടെ വിലയിരുത്തല്.
അമേരിക്കന് ഗവേഷകനെതിരായ ചാരപ്രവര്ത്തനാരോപണം അന്താരാഷ്ട്ര തലത്തില് കൂടുതല് ശ്രദ്ധ നേടുന്നതിനിടെയാണ് ഈ സംഭവവികാസം. കേസ് സംബന്ധിച്ച കൂടുതല് വിവരങ്ങള് പുറത്തുവരുന്നതിനനുസരിച്ച് ചൈന- അമേരിക്ക ബന്ധത്തിലും ഇത് പ്രതിഫലിച്ചേക്കാമെന്നാണ് രാഷ്ട്രീയ നിരീക്ഷകരുടെ വിലയിരുത്തല്.