പാരീസ് -ഫ്രാന്‍സിലെ പാര്‍ലമെന്ററി തിരഞ്ഞെടുപ്പില്‍ ബാലറ്റ് എണ്ണത്തെ അടിസ്ഥാനമാക്കിയുള്ള പ്രവചനങ്ങള്‍ അനുസരിച്ച് ഏറ്റവും കൂടുതല്‍ സീറ്റുകള്‍ നേടിയത് ഇടതുപക്ഷ പാര്‍ട്ടികളുടെ സഖ്യം. ആദ്യ റൗണ്ട് വോട്ടെടുപ്പില്‍ തീവ്ര വലതുപക്ഷ പാര്‍ട്ടിയായ ദേശീയ റാലിയും അതിന്റെ നേതാവ് മറൈന്‍ ലെ പെന്നും മുന്നേറ്റം നടത്തിയത് ആശങ്ക സൃഷ്ടിച്ചിരുന്നു.
കുടിയേറ്റ വിരുദ്ധ നിലപാടുമായി മുന്നേറിയ ദേശീയ റാലിയുടെ വിജയം തടയുന്നതിനുള്ള ശ്രമമാണ് രാജ്യത്ത് രണ്ടാം ഘട്ട വോട്ടെടുപ്പില്‍ പാര്‍ട്ടികള സ്വീകരിച്ചത്. ഇതിനായി പരസ്പരമുള്ള മത്സരം ഒഴിവാക്കാന്‍ വന്‍തോതില്‍ സ്ഥാനാര്‍ത്ഥികളെ പിന്‍വലിച്ച് ഐക്യത്തോടെയാണ് മുന്നോട്ടുപോയത്. 'റിപ്പബ്ലിക്കന്‍ ഫ്രണ്ട്' എന്നറിയപ്പെടുന്ന ഈ തന്ത്രത്തിന്റെ അടിസ്ഥാനത്തില്‍ തീവ്ര വലതുപക്ഷത്തോടുള്ള എതിര്‍പ്പിന്റെ അടിത്തറയില്‍ നിന്ന് പ്രചോദനം ഉള്‍ക്കൊണ്ട വോട്ടര്‍മാര്‍ ഇടതുപക്ഷത്തിന് അതിശയകരമായ വിജയം നല്‍കുകയായിരുന്നുവെന്നാണ് വിലയിരുത്തല്‍.
സോഷ്യലിസ്റ്റുകള്‍, ഗ്രീന്‍സ്, തീവ്ര ഇടതുപക്ഷ ഫ്രാന്‍സ് അണ്‍ബൗഡ് എന്നിവ ഉള്‍പ്പെടുന്ന പാര്‍ട്ടികളുടെ സഖ്യമായ ന്യൂ പോപ്പുലര്‍ ഫ്രണ്ട് 577 സീറ്റുകളുള്ള ദേശീയ അസംബ്ലിയില്‍ 184 മുതല്‍ 186 വരെ സീറ്റുകള്‍ നേടുമെന്ന് പോളിംഗ് സ്ഥാപനമായ എലാബെ കണക്കാക്കുന്നു. പ്രസിഡന്റ് ഇമ്മാനുവല്‍ മാക്രോണിന്റെയും സഖ്യകക്ഷികളുടെയും പാര്‍ട്ടി 160 നും 162 നും ഇടയില്‍ സീറ്റുകള്‍ നേടിയപ്പോള്‍ ലെ പെന്നിന്റെ ദേശീയ റാലിയും സഖ്യകക്ഷികളും 141 നും 143 നും ഇടയില്‍ സീറ്റുകള്‍ നേടി മൂന്നാം സ്ഥാനത്താണ്.
അതേസമയം 2027 ല്‍ തന്റെ കാലാവധിയുണ്ടായിരുന്നപ്പോളാണ് പ്രസിഡന്റ് മാക്രോണ്‍ രാജ്യത്ത് തെരഞ്ഞെടുപ്പ് പ്രഖ്യാപിച്ചത്. ഒന്നാംഘട്ട വോട്ടെടുപ്പില്‍ തീവ്രവലതുപക്ഷത്തിന് ഭൂരിപക്ഷം കിട്ടിയാല്‍ കാലാവധി അവസാനിക്കും വരെ രാജിവയ്ക്കില്ലെന്ന് മാക്രോണ്‍ നിലപാട് എടുത്തിരുന്നു. തീവ്ര വലതുപക്ഷത്തെ അധികാരത്തില്‍ നിന്ന് അകറ്റിനിര്‍ത്താനുള്ള ആഗ്രഹത്തിനുപുറമെ പൊതുവായി ഒന്നുമില്ലാത്ത വ്യത്യസ്ത പാര്‍ട്ടികളുടെ ഒരു ഗ്രൂപ്പില്‍ നിന്ന് ഒരു സര്‍ക്കാരിനെ ഒരുമിച്ച് കൊണ്ടുവരുന്നതിനുള്ള വെല്ലുവിളിയാണ് മാക്രോണ്‍ ഇപ്പോള്‍ ഇപ്പോള്‍ അഭിമുഖീകരിക്കുന്നത്. 2024ലെ വേനല്‍ക്കാല ഒളിമ്പിക്‌സിന് പാരീസ് ആതിഥേയത്വം വഹിക്കുന്നതിന് മൂന്നാഴ്ചയില്‍ താഴെ മാത്രമുള്ളപ്പോള്‍ മാക്രോണിനുമേല്‍ രാജിസമ്മര്‍ദ്ദം ശക്തമായേക്കും.
ന്യൂ പോപ്പുലര്‍ ഫ്രണ്ടിലെ ഏറ്റവും വലിയ പാര്‍ട്ടിയായ ഫ്രാന്‍സ് അണ്‍ബോഡിന്റെ ഫയര്‍ബ്രാന്‍ഡ് സ്ഥാപകനായ ജീന്‍-ലൂക്ക് മെലെഞ്ചോണ്‍ ഫലങ്ങള്‍ വന്നതിന് ശേഷം മാക്രോണിന്റെ പ്രധാനമന്ത്രി ഗബ്രിയേല്‍ അറ്റാല്‍ രാജിവയ്ക്കണമെന്ന് ആവശ്യപ്പെട്ടിരുന്നു. ന്യൂ പോപ്പുലര്‍ ഫ്രണ്ടിന് സര്‍ക്കാര്‍ രൂപീകരിക്കാനും പ്രചാരണ വാഗ്ദാനങ്ങള്‍ വിട്ടുവീഴ്ചയില്ലാതെ നടപ്പാക്കാനും അധികാരം നല്‍കണമെന്നും അദ്ദേഹം മാക്രോണിനോട് ആവശ്യപ്പെട്ടു.
'ഒരു തരത്തിലും മറികടക്കാന്‍ ശ്രമിക്കാതെ വഴങ്ങുകയും പ്രസിഡന്റ് ഈ തോല്‍വി അംഗീകരിക്കുകയും വേണമെന്ന് മെലെഞ്ചോണ്‍ ആവശ്യപ്പെട്ടു.
നിയമപരമായ വിരമിക്കല്‍ പ്രായം 64 ആയി ഉയര്‍ത്താനുള്ള തീരുമാനം ഉള്‍പ്പെടെ മാക്രോണിന്റെ നിരവധി സാമ്പത്തിക മാറ്റങ്ങള്‍ പിന്‍വലിക്കാനുള്ള പ്രതിജ്ഞകളെക്കുറിച്ച് ന്യൂ പോപ്പുലര്‍ ഫ്രണ്ട് പ്രചാരണം നടത്തിയിരുന്നു. വിരമിക്കല്‍ പ്രായം 60 ആയി കുറയ്ക്കാനും സ്വത്ത് നികുതി പുനഃസ്ഥാപിക്കാനും കൂടുതല്‍ ഭവന ആനുകൂല്യങ്ങള്‍ നല്‍കാനും പൊതുമേഖലാ വേതനം വര്‍ദ്ധിപ്പിക്കാനും ഇടതുപക്ഷ സഖ്യം ആഗ്രഹിക്കുന്നു. ഈ നടപടികള്‍ക്ക് 2025 ല്‍ 100 ബില്യണ്‍ യൂറോയോ അല്ലെങ്കില്‍ ഏകദേശം 108 ബില്യണ്‍ ഡോളറോ 2027 ല്‍ 150 ബില്യണ്‍ യൂറോയോ ചെലവാകുമെന്ന് സഖ്യം കണക്കാക്കുന്നു.
'ന്യൂ പോപ്പുലര്‍ ഫ്രണ്ട് അതിന്റെ പരിപാടി പ്രയോഗിക്കുമെന്നും നിലപാടുകളില്‍ മാറ്റമില്ലെന്നും മെലെഞ്ചോണ്‍ പറഞ്ഞു.
ഫ്രഞ്ച് പാര്‍ലമെന്റ് തെരഞ്ഞെടുപ്പില്‍ ഇടതുപക്ഷത്തിന് മേല്‍ക്കൈ
