ന്യൂയോര്ക്ക്: ഫിഫ ലോകകപ്പ് അമേരിക്കയില് ആരംഭിച്ചിട്ടും രാജ്യത്തിന്റെ പല ഭാഗങ്ങളിലും അതിനോടുള്ള പൊതുജന താത്പര്യം പ്രതീക്ഷിച്ചതിലും കുറവാണെന്ന് സൂചന. ലോകകപ്പ് ചര്ച്ചകളെ മറികടന്ന് എന് ബി എ ഫൈനല് സൃഷ്ടിച്ച ആവേശമാണ് ഇതിന് ഉദാഹരണമായി ചൂണ്ടിക്കാട്ടുന്നത്.
ബുധനാഴ്ച നടന്ന എന് ബി എ ഫൈനലില് ന്യൂയോര്ക്ക് നിക്സ് ടീം സാന് അന്റോണിയോ സ്പേഴ്സിനെതിരെ ചരിത്രത്തിലെ ഏറ്റവും മികച്ച തിരിച്ചുവരവുകളിലൊന്ന് നടത്തി വിജയിച്ചതോടെ ന്യൂയോര്ക്ക് നഗരത്തില് ആഘോഷങ്ങളുടെ പെരുമഴയായിരുന്നു. മാന്ഹട്ടനിലെ തെരുവുകളില് ആരാധകര് കാറുകള്ക്ക് മുകളിലിരുന്ന് ആഘോഷിച്ചപ്പോള് ആയിരക്കണക്കിന് കിലോമീറ്റര് അകലെയുള്ള സാന്റാ മോണിക്കയിലെ കടല്ത്തീര ബാറുകളിലും ആഹ്ലാദാരവങ്ങള് മുഴങ്ങി.
എന്നാല് ഈ ആഘോഷങ്ങളൊന്നും ലോകകപ്പുമായി ബന്ധപ്പെട്ടതായിരുന്നില്ല. ശനിയാഴ്ച പരാഗ്വെയ്ക്കെതിരെ ലോകകപ്പ് പോരാട്ടത്തിന് ഇറങ്ങാനൊരുങ്ങുന്ന അമേരിക്കന് ദേശീയ ടീമിന് മുന്നിലുള്ള വെല്ലുവിളിയുടെ പ്രതീകമായാണ് ഈ സാഹചര്യം വിലയിരുത്തപ്പെടുന്നത്.
അമേരിക്കയില് ഫുട്ബോളിന് (സോക്കര്) ഇപ്പോഴും ബാസ്കറ്റ്ബോള്, അമേരിക്കന് ഫുട്ബോള് തുടങ്ങിയ കായിക ഇനങ്ങള്ക്കുള്ളത്ര ജനപ്രീതി ലഭിച്ചിട്ടില്ല. അടുത്തിടെ നടത്തിയ ഒരു സര്വേ പ്രകാരം പങ്കെടുത്ത അമേരിക്കക്കാരില് പകുതിയോളം പേര്ക്ക് ലോകകപ്പിനോട് താത്പര്യമില്ലെന്നാണ് കണ്ടെത്തിയത്.
1994-ല് ലോകകപ്പിന് ആതിഥേയത്വം വഹിച്ചപ്പോള് രാജ്യത്തെ ഫുട്ബോള് സംസ്കാരത്തില് വലിയ മാറ്റങ്ങള് ഉണ്ടായിരുന്നതായി വിലയിരുത്തപ്പെടുന്നു. അതാണ് പിന്നീട് മേജര് ലീഗ് സോക്കറിന്റെ (എം എല് എസ്) രൂപീകരണത്തിനും ഫുട്ബോളിന്റെ വളര്ച്ചയ്ക്കും വഴിയൊരുക്കിയത്.
എന്നാല് മൂന്ന് പതിറ്റാണ്ടുകള്ക്കിപ്പുറം ലോകകപ്പ് വീണ്ടും അമേരിക്കയിലെത്തിയിട്ടും പൊതുജന മനസ്സില് വലിയ തരംഗം സൃഷ്ടിക്കാന് ഇതുവരെ കഴിഞ്ഞിട്ടില്ലെന്നാണ് വിലയിരുത്തല്.
ന്യൂയോര്ക്കില് ലോകകപ്പ് ആരംഭിച്ചതിന്റെ ചില സൂചനകള് കാണാനാകും. ദേശീയ ടീമുകളുടെ നിറങ്ങളില് അലങ്കരിച്ച സബ്വേ ട്രെയിനുകള്, ടൈംസ് സ്ക്വയറിലെ ലയണല് മെസ്സിയുടെ വമ്പന് പരസ്യബോര്ഡുകള്, മൊറോക്കോയുടെയും ബ്രസീലിന്റെയും ജഴ്സി ധരിച്ച ആരാധകര് എന്നിവ അതില്പ്പെടുന്നു.
ശനിയാഴ്ച മെറ്റ്ലൈഫ് സ്റ്റേഡിയത്തില് നടക്കുന്ന ബ്രസീല്- മൊറോക്കോ മത്സരത്തോടെ ന്യൂയോര്ക്ക് മേഖലയില് ലോകകപ്പ് മത്സരങ്ങള്ക്ക് തുടക്കമാകും.
എന്നാല് ന്യൂയോര്ക്കുകാരുടെ മനസ്സില് ഇപ്പോള് ഇടംപിടിച്ചിരിക്കുന്നത് ഫുട്ബോള് അല്ല, ബാസ്കറ്റ്ബോളാണ്.
അമേരിക്കയുടെ ഗ്രൂപ്പ് മത്സരങ്ങളില് രണ്ടെണ്ണത്തിന് വേദിയാകുന്ന ലോസ് ആഞ്ചലസിലും ലോകകപ്പിനോടുള്ള പ്രചാരണം പരിമിതമാണെന്നാണ് റിപ്പോര്ട്ടുകള്.
വിമാനത്താവളത്തിന് സമീപം 'എല്എ26' എന്ന പേരില് ലോകകപ്പ് പ്രചാരണ ബോര്ഡുകളും അമേരിക്കന് താരങ്ങളുടെ ചിത്രങ്ങള് ഉള്പ്പെടുത്തിയ ഡിജിറ്റല് പരസ്യങ്ങളും അര്ജന്റീനന് ഇതിഹാസം ലയണല് മെസ്സിയുടെ ചുമര്ചിത്രവും സ്ഥാപിച്ചിട്ടുണ്ടെങ്കിലും ഫുട്ബോളില് താത്പര്യമില്ലാത്തവര്ക്ക് ലോകകപ്പ് തുടങ്ങിയെന്ന കാര്യം അറിയാതിരിക്കാനും സാധ്യതയുണ്ട്.
ബി ബി സി വേള്ഡ് സര്വീസിന്റെ മാധ്യമ പ്രവര്ത്തകരെ കൊണ്ടുപോയ ഒരു ടാക്സി ഡ്രൈവര് പോലും 'ലോകകപ്പ് നടക്കുന്നുണ്ടോ? ആരൊക്കെയാണ് കളിക്കുന്നത്?' എന്ന് അത്ഭുതത്തോടെ ചോദിച്ചതായി റിപ്പോര്ട്ടില് പറയുന്നു.
അതേസമയം, ടൂര്ണമെന്റ് പുരോഗമിക്കുന്തോറും പൊതുജന താത്പര്യം വര്ധിക്കുമെന്ന പ്രതീക്ഷയിലാണ് സംഘാടകര്.
ലോസ് ആഞ്ചലസ് ലോകകപ്പ് സംഘാടക സമിതിയുടെ സഹ അധ്യക്ഷന് ലാറി ഫ്രീഡ്മാന് പറയുന്നതനുസരിച്ച് ലോകകപ്പിനോടുള്ള ആവേശം ക്രമേണ ഉയര്ന്നുവരികയാണ്. ലോസ് ആഞ്ചലസില് നിരവധി കായിക ഇനങ്ങളും മറ്റ് പരിപാടികളും നടക്കുന്നതിനാല് ആളുകള് ഭാവിയെക്കാള് നാളത്തെ കാര്യങ്ങളിലാണ് കൂടുതല് ശ്രദ്ധ കേന്ദ്രീകരിച്ചിരുന്നതെന്നും എന്നാല് ടൂര്ണമെന്റ് മുന്നോട്ട് പോകുമ്പോള് ആവേശം വര്ധിക്കുമെന്നും അദ്ദേഹം പറഞ്ഞു.
ലോകത്തിലെ ഏറ്റവും വലിയ കായിക മാമാങ്കങ്ങളില് ഒന്നായ ഫിഫ ലോകകപ്പ് അമേരിക്കയില് നടക്കുമ്പോഴും രാജ്യത്തെ ജനശ്രദ്ധ സ്വന്തമാക്കാന് ഫുട്ബോളിന് ഇപ്പോഴും ബാസ്കറ്റ്ബോളും മറ്റ് ജനപ്രിയ കായിക ഇനങ്ങളും ഉയര്ത്തുന്ന വെല്ലുവിളി മറികടക്കേണ്ടി വരുന്നതായാണ് നിലവിലെ സാഹചര്യം സൂചിപ്പിക്കുന്നത്.