സ്വിറ്റ്സർലൻഡിൽ നടക്കുന്ന യുഎസ്-ഇറാൻ സമാധാന ചർച്ചകൾ പ്രതിസന്ധിയിലായതായി റിപ്പോർട്ട്. അമേരിക്കൻ പ്രസിഡന്റ് ഡോണൾഡ് ട്രംപിന്റെ ഭീഷണിപരമായ പരാമർശങ്ങളിൽ പ്രതിഷേധിച്ച് ഇറാൻ പ്രതിനിധിസംഘം ചർച്ചാ വേദി വിട്ടുപോയതായി ഇറാനിയൻ വാർത്താ ഏജൻസിയായ തസ്നീം റിപ്പോർട്ട് ചെയ്തു.
ചർച്ചകൾ ആരംഭിക്കുന്നതിന് മുമ്പ് ഇരുരാജ്യങ്ങളുടെയും പ്രതിനിധികൾ തമ്മിൽ ഹസ്തദാനവും സംയുക്ത ഫോട്ടോ സെഷനും നടത്താൻ സംഘാടകരും അമേരിക്കൻ സംഘവും പദ്ധതിയിട്ടിരുന്നുവെങ്കിലും, മുഖ്യ ചർച്ചാകാരനായ മുഹമ്മദ് ബാഘർ ഖാലിബാഫിന്റെ നേതൃത്വത്തിലുള്ള ഇറാൻ സംഘം അതിൽ പങ്കെടുക്കാൻ തയ്യാറായില്ലെന്നാണ് വിവരം.
ഇതിനിടെ, കഴിഞ്ഞയാഴ്ച നടത്തിയ ആക്രമണം ഓർമ്മിപ്പിച്ച് ട്രംപ് ഇറാനെതിരെ വീണ്ടും കടുത്ത മുന്നറിയിപ്പ് നൽകിയിരുന്നു. ലെബനനിൽ ഹിസ്ബുല്ല ഉൾപ്പെടെയുള്ള ഇറാൻ അനുകൂല സംഘടനകൾ പ്രശ്നങ്ങൾ സൃഷ്ടിക്കുന്നത് ഉടൻ അവസാനിപ്പിക്കണമെന്ന് ആവശ്യപ്പെട്ട ട്രംപ്, ഇല്ലെങ്കിൽ ഇറാനെതിരെ കൂടുതൽ ശക്തമായ ആക്രമണം ഉണ്ടാകുമെന്ന് സോഷ്യൽ മീഡിയയിലൂടെ മുന്നറിയിപ്പ് നൽകി.
'ഇറാൻ അവരുടെ പണച്ചെലവിൽ പ്രവർത്തിക്കുന്ന ലെബനനിലെ പ്രതിനിധി സംഘങ്ങളെ ഉടൻ നിയന്ത്രിക്കണം. അങ്ങനെ ചെയ്യാത്ത പക്ഷം കഴിഞ്ഞ തവണത്തേക്കാൾ ശക്തമായി വീണ്ടും ആക്രമിക്കും,' എന്നാണ് ട്രംപ് ട്രൂത്ത് സോഷ്യലിൽ കുറിച്ചത്.
ട്രംപിന്റെ പരാമർശങ്ങൾക്ക് പിന്നാലെ ഇറാൻ പാർലമെന്റ് സ്പീക്കർ മുഹമ്മദ് ബാഘർ ഖാലിബാഫ് ശക്തമായി തിരിച്ചടിച്ചു. അമേരിക്കയുടെ ഭീഷണികളെ ഇറാൻ ഗൗരവമായി കാണുന്നില്ലെന്നും, അത്തരം സമ്മർദങ്ങൾ ഫലപ്രദമായിരുന്നെങ്കിൽ ഇന്ന് അമേരിക്ക ഈ അവസ്ഥയിലെത്തുമായിരുന്നില്ലെന്നും അദ്ദേഹം എക്സിലൂടെ പ്രതികരിച്ചു.
'അമേരിക്കൻ ഭീഷണികൾക്ക് യാതൊരു വിലയും നാം നൽകുന്നില്ല. ഞങ്ങളുടെ സായുധ സേന ഏത് സാഹചര്യത്തെയും നേരിടാൻ സജ്ജമാണ്. അവർ പറയട്ടെ, പ്രവർത്തിക്കുന്നത് ഞങ്ങളായിരിക്കും,' ഖാലിബാഫ് വ്യക്തമാക്കി.
അതേസമയം, ചർച്ചകൾക്ക് മുന്നോടിയായി സംസാരിച്ച യുഎസ് വൈസ് പ്രസിഡന്റ് ജെ.ഡി. വാൻസ്, ഇരുരാജ്യങ്ങൾക്കും തമ്മിൽ പുതിയ അധ്യായം തുറക്കാനും പശ്ചിമേഷ്യയിലെ ബന്ധങ്ങളെ സ്ഥിരമായി മാറ്റിമറിക്കാനുമുള്ള അവസരമാണ് നിലവിലെ ചർച്ചകളെന്ന് പറഞ്ഞിരുന്നു. എന്നാൽ ട്രംപിന്റെ പുതിയ പരാമർശങ്ങൾ ചർച്ചാ അന്തരീക്ഷത്തെ ബാധിച്ചിരിക്കുകയാണ്.
യുഎസ്–ഇറാൻ ബന്ധത്തിൽ പുതിയ വഴിത്തിരിവുണ്ടാകുമെന്ന പ്രതീക്ഷയ്ക്കിടെയാണ് സ്വിറ്റ്സർലൻഡിലെ ചർച്ചകൾ അനിശ്ചിതത്വത്തിലായത്.