ടെഹ്രാൻ: അടുത്തിടെ നടന്ന യുദ്ധത്തിൽ വലിയ നാശനഷ്ടങ്ങൾ നേരിട്ടതോടെ ഇറാന്റെ സമ്പദ്വ്യവസ്ഥ ഗുരുതര പ്രതിസന്ധിയിലേക്കു നീങ്ങുന്നു. അമേരിക്കയും ഇസ്രായേലും നടത്തിയ ശക്തമായ ആക്രമണങ്ങൾക്ക് പിന്നാലെ രാജ്യത്തിന്റെ അടിസ്ഥാന സൗകര്യങ്ങൾ വ്യാപകമായി തകർന്ന സാഹചര്യത്തിൽ, ഉപരോധ ഇളവുകൾ നേടാൻ ചർച്ചകൾക്ക് ഇറാൻ നിർബന്ധിതമാകുന്നതായാണ് വിലയിരുത്തൽ.
യുദ്ധകാലത്ത് അമേരിക്കയും ഇസ്രായേലും ചേർന്ന് അഞ്ച് ആഴ്ചക്കിടെ ഇറാനിലെ ഏകദേശം 17,000 കേന്ദ്രങ്ങളെയാണ് ആക്രമിച്ചത്. ഫാക്ടറികൾ, റെയിൽറോഡ് ശൃംഖലകൾ, തുറമുഖങ്ങൾ, സർക്കാർ കെട്ടിടങ്ങൾ, സൈനിക കേന്ദ്രങ്ങൾ എന്നിവയൊക്കെ ഇതിൽ ഉൾപ്പെടുന്നു. ഇതോടെ രാജ്യത്തിന്റെ ഉൽപ്പാദനവും ഗതാഗത സംവിധാനങ്ങളും തകരാറിലായി.
രാജ്യത്തിന്റെ പുനർനിർമാണ ചെലവ് ഏകദേശം 270 ബില്യൺ ഡോളറായിരിക്കാമെന്ന് ഇറാൻ സർക്കാർ മാധ്യമങ്ങൾ വിലയിരുത്തുന്നു. എന്നാൽ യഥാർത്ഥ നാശനഷ്ടത്തിന്റെ വ്യാപ്തി ഇനിയും പൂർണമായി വ്യക്തമാകാത്തതിനാൽ കൃത്യമായ കണക്ക് പിന്നീട് മാത്രമേ ലഭ്യമാകൂവെന്ന് സാമ്പത്തിക വിദഗ്ധർ പറയുന്നു.
ഇതിനിടെ, യുദ്ധത്തിൽ നിന്നുള്ള വെടിനിർത്തലിനെ ഇറാൻ നേതൃത്വം വിജയമായി ചിത്രീകരിച്ചുവെങ്കിലും, യുദ്ധാനന്തര പുനർനിർമാണത്തിന്റെ വലിയ വെല്ലുവിളിയാണ് ഇപ്പോൾ മുന്നിലുള്ളത്. സാമ്പത്തിക സമ്മർദ്ദം ഉയരുന്ന സാഹചര്യത്തിൽ, ഉപരോധങ്ങൾ ഇളവുനൽകാൻ അന്താരാഷ്ട്ര തലത്തിൽ ചർച്ചകൾക്ക് ഇറാൻ കൂടുതൽ സജീവമാകുമെന്ന് സൂചനകളുണ്ട്.
യുദ്ധം തകർത്ത ഇറാൻ സമ്പദ്വ്യവസ്ഥ; ഉപരോധ ഇളവിനായി ചർച്ചകൾക്ക് സമ്മർദ്ദം ഉയരുന്നു
