പെന്ജ്വെന്: ഇറാനോട് ചേര്ന്നുള്ള ഇറാഖിലെ മലനിരകളില് കഴിയുന്ന കുര്ദിഷ് വിമതര് ആവശ്യമായാല് ഇറാനെതിരെ പോരാടാന് തയ്യാറാണെന്ന് പ്രഖ്യാപിച്ചു. എന്നാല് നേരിട്ട് സൈനിക ഇടപെടലിന് മുമ്പ് ഇറാനില് ജനകീയ വിപ്ലവം ഉയര്ന്നുവരുമെന്നാണ് അവര് പ്രതീക്ഷിക്കുന്നതെന്ന് വിമത നേതാക്കള് വ്യക്തമാക്കി.
ഇറാഖിലെ കുര്ദിസ്ഥാന് സ്വയംഭരണ മേഖലയിലെ പെന്ജ്വെന് പ്രദേശത്താണ് പാര്ട്ടി ഓഫ് ഫ്രീ ലൈഫ് ഓഫ് കുര്ദിസ്ഥാന് (പി ജെ എ കെ) എന്ന സംഘടനയുടെ താവളങ്ങള് സ്ഥിതി ചെയ്യുന്നത്. ഈ സംഘടനയിലെ മുതിര്ന്ന കമാന്ഡറായ റോകന് നെറാദ വാര്ത്താ ഏജന്സിയായ എ എഫ് പിയോട് സംസാരിക്കവെയാണ് ഇക്കാര്യങ്ങള് പറഞ്ഞത്.
കുര്ദിഷ് ജനതയെ ആക്രമിച്ചാല്, എപ്പോഴും ചെയ്തതുപോലെ എല്ലാ മാര്ഗങ്ങളിലൂടെയും പ്രതിരോധിക്കാന് തങ്ങള് തയ്യാറാണെന്ന് അദ്ദേഹം പറഞ്ഞു.
അതേസമയം, മുന്പ് ഇറാനെതിരെ കുര്ദിഷ് ആക്രമണത്തിന് പിന്തുണ നല്കുമെന്ന് പറഞ്ഞിരുന്ന അമേരിക്കന് പ്രസിഡന്റ് ഡൊണള്ഡ് ട്രംപ് പിന്നീട് നിലപാട് മാറ്റി. ശനിയാഴ്ച നടത്തിയ പ്രസ്താവനയില് ഇത്തരമൊരു ആക്രമണം താന് ആഗ്രഹിക്കുന്നില്ലെന്ന് അദ്ദേഹം വ്യക്തമാക്കി.
39-കാരനായ നെറാദ 17 വര്ഷം മുമ്പാണ് വിമത സംഘടനയില് ചേര്ന്നത്. അമേരിക്കയുടെയോ മറ്റേതെങ്കിലും രാജ്യത്തിന്റെയോ സഹായം ഇല്ലാതെ തന്നെ തങ്ങളുടെ അവകാശങ്ങള് നേടാന് കഴിയുമെന്നും അദ്ദേഹം പറഞ്ഞു.
ഇറാനിലെ കുര്ദിഷ് പ്രദേശങ്ങളിലെയും ഇറാഖിന്റെ വടക്കന് സ്വയംഭരണ മേഖലയിലെയും മലനിരകളിലാണ് ഈ സംഘടനയുടെ താവളങ്ങള്. ഇറാനിലെ ഭൂരിഭാഗം കുര്ദുകള് താമസിക്കുന്ന പ്രദേശങ്ങളിലും ഇവര് രഹസ്യ താവളങ്ങള് നിലനിര്ത്തുന്നുണ്ട്.
കുര്ദിഷ് വിമത സംഘടനകളെ ഇറാന് സര്ക്കാര് ഭീകരസംഘടനകളായി പ്രഖ്യാപിച്ചിട്ടുണ്ട്. മുമ്പ് അതിര്ത്തി പ്രദേശങ്ങളിലെ കുര്ദിഷ് മേഖലകളില് ഇവര് ഇറാന് സുരക്ഷാസേനയുമായി ഏറ്റുമുട്ടിയിട്ടുണ്ട്.
എന്നാല് കഴിഞ്ഞ വര്ഷങ്ങളില് പ്രധാനമായും ഇറാഖിലെ രാഷ്ട്രീയ സമ്മര്ദത്തെ തുടര്ന്ന് ഇവര് സായുധ പ്രവര്ത്തനങ്ങളില് നിന്ന് ഏറെക്കുറെ പിന്മാറിയിരുന്നു. അതിനാല് ഇപ്പോഴത്തെ സാഹചര്യത്തില് ഇറാനെതിരെ വലിയ ആക്രമണം നടത്താനുള്ള ശേഷി ഇവര്ക്കുണ്ടോയെന്ന സംശയവും നിലനില്ക്കുന്നു.
എ എഫ് പി റിപ്പോര്ട്ടര്മാര് പി ജെ എ കെയിലെ ഏകദേശം 30 പോരാളികളുമായി ഒരു ബങ്കറില് കൂടിക്കാഴ്ച നടത്തിയിരുന്നു. അവിടെ വീരമൃത്യു വരിച്ച സഹപ്രവര്ത്തകരുടെ ചിത്രങ്ങള് അലങ്കരിച്ചിരിക്കുകയും ടെലിവിഷനില് യുദ്ധ വാര്ത്തകള് പ്രദര്ശിപ്പിക്കുകയും ചെയ്തിരുന്നു. തെഹ്റാന്, ബെറൂത്ത് തുടങ്ങിയ നഗരങ്ങളില് നിന്നുള്ള പുകമറയുന്ന ദൃശ്യങ്ങളാണ് വാര്ത്തകളില് കാണപ്പെട്ടത്.
ഫെബ്രുവരി അവസാനം യു എസും ഇസ്രായേലും ചേര്ന്ന് ഇറാനെതിരെ നടത്തിയ ആക്രമണങ്ങള്ക്ക് ശേഷം പശ്ചിമേഷ്യയിലെ സംഘര്ഷം ശക്തമായിരുന്നു. ഇതിന് പിന്നാലെ ഇറാന് ഇറാഖിലെ കുര്ദിഷ് വിമതരുടെ താവളങ്ങളെ പലതവണ ലക്ഷ്യമാക്കി ആക്രമണം നടത്തിയതായി റിപ്പോര്ട്ടുകളുണ്ട്.
ഇറാനിലെ സര്ക്കാര് വിരുദ്ധ പ്രതിഷേധങ്ങള്ക്ക് പിന്നാലെ പി ജെ എ കെ ഉള്പ്പെടെയുള്ള കുര്ദിഷ് വിമത സംഘടനകള് ഇറാനിലെ ഇസ്ലാമിക് റിപ്പബ്ലിക്കിനെ അട്ടിമറിക്കാന് ലക്ഷ്യമിട്ട് കൂട്ടായ്മ രൂപീകരിച്ചിരുന്നു.
ഇതിനിടെ കുര്ദിഷ് വിമതര് അമേരിക്കയുമായി സഹകരിക്കുമെന്ന റിപ്പോര്ട്ടുകള് പുറത്തുവന്നതിനെ തുടര്ന്ന് കുര്ദിഷ് പോരാളികള് അതിര്ത്തി കടന്നാല് ഇറാഖിലെ കുര്ദിസ്ഥാന് മേഖലയിലെ എല്ലാ കേന്ദ്രങ്ങളെയും ലക്ഷ്യമാക്കി ആക്രമിക്കുമെന്ന് ഇറാന് മുന്നറിയിപ്പ് നല്കി.
അമേരിക്കന് പ്രതിനിധികളുമായി ചില രാഷ്ട്രീയ സംഭാഷണങ്ങള് നടന്നിട്ടുണ്ടെങ്കിലും ഇപ്പോള് ഭൂതല ആക്രമണം നടത്താനുള്ള പദ്ധതി ഇല്ലെന്നാണ് പി ജെ എ കെ കമാന്ഡര് ആമിര് കരീമി പറഞ്ഞത്.
തന്ത്രപരമായും സൈനികപരമായും ഇപ്പോള് അത്തരമൊരു ആക്രമണം ശരിയായ തീരുമാനം അല്ലെന്ന് തങ്ങള് കരുതുന്നുവെന്നും അദ്ദേഹം പറഞ്ഞു. അതിര്ത്തിയില് ഇറാന് സൈന്യം ശക്തമായി വിന്യസിച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു.
ഇറാനിലെ ജനങ്ങള് തന്നെ മുന്നിട്ടിറങ്ങി ജനകീയ വിപ്ലവം നടത്തുന്നതാണ് ഏറ്റവും നിര്ണായകമെന്ന് വിമത നേതാക്കള് പറഞ്ഞു.
ഭാവിയില് ജനാധിപത്യ ഇറാന് ഉറപ്പാക്കാന് കുര്ദുകള്ക്ക് ഉറപ്പുകള് വേണമെന്നും അദ്ദേഹം പറഞ്ഞു. നാളെ മറ്റൊരു ഏകാധിപതിയെ പിന്തുണച്ച് അധികാരത്തിലേക്ക് കൊണ്ടുവരില്ലെന്ന് ആരാണ് ഉറപ്പുനല്കുക? എന്നായിരുന്നു അമേരിക്കയെ സൂചിപ്പിച്ച് അദ്ദേഹം ചോദിച്ചത്.
ഇപ്പോള് നിലനില്ക്കുന്ന ഇരുട്ടിനെ മാറ്റി ജനാധിപത്യ ഇറാന് സൃഷ്ടിക്കുകയാണ് പ്രധാന ലക്ഷ്യമെന്നും നെറാദ കൂട്ടിച്ചേര്ത്തു.