റിയാദ്: സൗദി അറേബ്യയിലെ പ്രധാന എണ്ണകയറ്റുമതി കേന്ദ്രമായ റാസ് തനൂറയിൽ സൗദി അരാംകോയുടെ ഹെലികോപ്റ്റർ തകർന്നുവീണ് 14 പേർ മരിച്ചു. മരിച്ചവരെല്ലാം സൗദി പൗരന്മാരാണെന്ന് ഔദ്യോഗിക വാർത്താ ഏജൻസിയായ സൗദി പ്രസ് ഏജൻസി റിപ്പോർട്ട് ചെയ്തു.
ഞായറാഴ്ച രാവിലെ ആറുമണിയോടെയാണ് അപകടമുണ്ടായത്. ഹെലികോപ്റ്ററിലുണ്ടായിരുന്ന 14 പേരും അപകടത്തിൽ മരിച്ചതായി സൗദി ഊർജമന്ത്രാലയം സ്ഥിരീകരിച്ചു.
അപകടകാരണം ഇതുവരെ വ്യക്തമായിട്ടില്ല. സംഭവത്തെക്കുറിച്ച് ബന്ധപ്പെട്ട അധികൃതർ വിശദമായ അന്വേഷണം ആരംഭിച്ചതായി ഊർജമന്ത്രാലയം അറിയിച്ചു. മരിച്ചവരുടെ കുടുംബങ്ങൾക്ക് മന്ത്രാലയം അനുശോചനവും രേഖപ്പെടുത്തി.
സൗദി അറേബ്യയുടെ ഗൾഫ് തീരത്തുള്ള റാസ് തനൂറ ലോകത്തിലെ ഏറ്റവും വലിയ എണ്ണകയറ്റുമതി കേന്ദ്രങ്ങളിലൊന്നാണ്. സൗദി അരാംകോയുടെ പ്രധാന എണ്ണസംഭരണ, ശുദ്ധീകരണ, കയറ്റുമതി സൗകര്യങ്ങൾ ഇവിടെയാണ് പ്രവർത്തിക്കുന്നത്.
അമേരിക്ക-ഇറാൻ സംഘർഷത്തെ തുടർന്ന് ഏകദേശം നാല് മാസത്തോളം തടസപ്പെട്ടിരുന്ന റാസ് തനൂറ തുറമുഖത്തിലെ ക്രൂഡ് ഓയിൽ കയറ്റുമതി പ്രവർത്തനങ്ങൾ വെള്ളിയാഴ്ചയാണ് പുനരാരംഭിച്ചത്. അതിന് പിന്നാലെയുണ്ടായ ഹെലികോപ്റ്റർ അപകടം വലിയ ആശങ്കയ്ക്കിടയാക്കിയിട്ടുണ്ട്.
അപകടത്തിന്റെ കാരണം കണ്ടെത്താൻ അന്വേഷണം പുരോഗമിക്കുകയാണെന്നും കൂടുതൽ വിവരങ്ങൾ പിന്നീട് പുറത്തുവിടുമെന്നും അധികൃതർ അറിയിച്ചു.
സൗദി അരാംകോ ഹെലികോപ്റ്റർ തകർന്ന് 14 പേർ മരിച്ചു
