ലാസ: ടിബറ്റില് ഭൂചലനം. റിക്ടര് സ്കെയിലില് 5.7 തീവ്രത രേഖപ്പെടുത്തിയ ഭൂചലനം ഇന്ത്യന് സമയം തിങ്കളാഴ്ച പുലര്ച്ചെ 2.41നാണ് അനുഭവപ്പെട്ടത്. നാശനഷ്ടങ്ങള് റിപ്പോര്ട്ട് ചെയ്തിട്ടില്ല.
ഭൂ നിരപ്പില് നിന്ന് പത്തു കിലോമീറ്റര് താഴെയാണ് ഭൂചലനത്തിന്റെ പ്രഭവകേന്ദ്രമെന്ന് നാഷണല് സെന്റര് ഫൊര് സീസ്മോളജി അറിയിച്ചു.
ഇത്തരം ചലനങ്ങള് വലിയ നാശനഷ്ടങ്ങള് സൃഷ്ടിക്കാന് സാധ്യതയുള്ളവയാണ്. എന്നാല് നിലവില് ടിബറ്റിലെ ഈ ചലനത്തില് നാശനഷ്ടങ്ങളോ പരിക്കോ ഇതു വരെ റിപ്പോര്ട്ട് ചെയ്യപ്പെട്ടിട്ടില്ല. തുടര് ചലനങ്ങള് ഉണ്ടായതായും റിപ്പോര്ട്ടുകളില്ല.
കഴിഞ്ഞ ആഴ്ചകളില് തുടര്ച്ചയായ തീവ്രതയുള്ള ഭൂചലനങ്ങള് ടിബറ്റില് രേഖപ്പെടുത്തിയിരുന്നു. മെയ് 9ന് പ്രാദേശിക സമയം രാത്രി 8.18ന് 3.7 തീവ്രതയുള്ള ഭൂചലനം ടിബറ്റില് രേഖപ്പെടുത്തിയിരുന്നു. ഏപ്രില് 23ന് റിക്ടര് സ്കെയിലില് 3.9, 3.6 എന്നീ തീവ്രതയുള്ള ഭൂചലനങ്ങളും ടിബറ്റില് രേഖപ്പെടുത്തി.