വാഷിങ്ടണ്‍: മയക്കുമരുന്നു കടത്തുമായി ബന്ധപ്പെട്ട് 45 വര്‍ഷത്തെ ഫെഡറല്‍ ജയില്‍ ശിക്ഷ അനുഭവിക്കുന്ന യുവാന്‍ ഓര്‍ലാന്‍ഡോ ഹെര്‍ണാണ്ടസിന് പൂര്‍ണവും സമഗ്രവുമായ മാപ്പ് നല്‍കാന്‍ ഉദ്ദേശിക്കുന്നതായി പ്രസിഡന്റ് ഡൊണള്‍ഡ് ട്രംപ് അറിയിച്ചു. ട്രൂത്ത് സോഷ്യല്‍ പ്ലാറ്റ്‌ഫോമിലൂടെയാണ് ഇക്കാര്യം പ്രഖ്യാപിച്ചത്.
പലരുടെയും അഭിപ്രായത്തില്‍ വളരെ ക്രൂരമായും അന്യായമായുമാണ് അദ്ദേഹത്തോട് പെരുമാറിയതെന്നും ഹോണ്ടുറാസ് മുന്‍ പ്രസിഡന്റ് യുവാന്‍ ഓര്‍ലാന്‍ഡോ ഹെര്‍ണാണ്ടസിന് താന്‍ പൂര്‍ണവും സമഗ്രവുമായ മാപ്പ് നല്‍കുമെന്നും പ്രത്യേകിച്ച് ടിറ്റോ അസ്ഫുര തെരഞ്ഞെടുപ്പില്‍ വിജയിച്ച സാഹചര്യത്തിലാണിതെന്നും ട്രംപ് പറഞ്ഞു. ഹോണ്ടുറാസ് മഹത്തായ രാഷ്ട്രീയ- സാമ്പത്തിക വിജയത്തിലേയ്ക്ക് നീങ്ങുകയാണെന്നും പ്രസിഡന്റ് സ്ഥാനത്തേയ്ക്ക് ടിറ്റോ അസ്ഫുരയ്ക്ക് വോട്ട് ചെയ്യണമെന്നും കൂടാതെ നിങ്ങള്‍ക്ക് ലഭിക്കാന്‍ പോകുന്ന മാപ്പില്‍ യുവാന്‍ ഓര്‍ലാന്‍ഡോ ഹെര്‍ണാണ്ടസിന് അഭിനന്ദനങ്ങളെന്നുമായിരുന്നു ട്രംപിന്റെ കുറിപ്പ്.
2014 മുതല്‍ 2022 വരെ ഹോണ്ടുറാസ് പ്രസിഡന്റായിരുന്ന ഹെര്‍ണാണ്ടസിന് മയക്കുമരുന്നു കടത്ത് കുറ്റങ്ങള്‍ക്ക് കഴിഞ്ഞ വര്‍ഷം യു എസ് കോടതി 45 വര്‍ഷത്തെ തടവും എട്ടു മില്യണ്‍ ഡോളര്‍ പിഴയും വിധിച്ചിരുന്നു.