ഒട്ടാവ: സർക്കാർ ചെലവ് വരുമാനത്തെക്കാൾ വേഗത്തിൽ ഉയർന്നതോടെ 2025-26 സാമ്പത്തിക വർഷത്തിൽ കാനഡയുടെ ബജറ്റ് കമ്മി 55.28 ബില്യൺ കാനഡ ഡോളറായി ഉയർന്നു. കാനഡ ധനമന്ത്രാലയം പുറത്തുവിട്ട കണക്കുകളിലാണ് ഇത് വ്യക്തമാക്കിയത്. കഴിഞ്ഞ വർഷം ഇതേ കാലയളവിൽ ബജറ്റ് കമ്മി 43.15 ബില്യൺ കാനഡ ഡോളറായിരുന്നു.
സർക്കാർ പദ്ധതികൾക്കായുള്ള ചെലവുകൾ എല്ലാ പ്രധാന മേഖലകളിലും വർധിച്ചതോടെ ആകെ ചെലവ് 1.6 ശതമാനം ഉയർന്നു. പൊതുകടത്തിന്റെ പലിശഭാരവും നേരിയ തോതിൽ വർധിച്ചു. വിപണിയിൽ പുറത്തിറക്കിയ ബോണ്ടുകളുടെ പലിശനിരക്കുകൾ ഉയർന്നതും ചില ബോണ്ടുകളിൽ വിലക്കയറ്റ ക്രമീകരണങ്ങൾ ഉണ്ടായതുമാണ് ഇതിന് പ്രധാന കാരണം. എന്നാൽ ട്രഷറി ബില്ലുകളിലെ കുറഞ്ഞ ഹ്രസ്വകാല പലിശനിരക്കുകൾ ഈ വർധനവിനെ ഭാഗികമായി നിയന്ത്രിച്ചതായി ധനമന്ത്രാലയം അറിയിച്ചു.
അതേസമയം വരുമാനത്തിൽ 1.1 ശതമാനം വർധനയുണ്ടായി. ഇറക്കുമതി തീരുവ, കോർപ്പറേറ്റ് നികുതി, വ്യക്തിഗത വരുമാന നികുതി എന്നിവയിൽ നിന്നുള്ള കൂടുതൽ വരുമാനമാണ് ഇതിന് സഹായകമായത്.
മാർച്ച് മാസത്തിൽ മാത്രം കാനഡയ്ക്ക് 29.73 ബില്യൺ കാനഡ ഡോളറിന്റെ കുറവാണ് രേഖപ്പെടുത്തിയത്. കഴിഞ്ഞ വർഷം മാർച്ചിൽ ഇത് 23.88 ബില്യൺ ഡോളറായിരുന്നു. ആഗോള സാമ്പത്തിക അനിശ്ചിതത്വവും ഉയർന്ന സർക്കാർ ചെലവും കാനഡയുടെ ധനകാര്യ നിലയ്ക്ക് സമ്മർദം വർധിപ്പിക്കുന്നതായി സാമ്പത്തിക വിദഗ്ധർ വിലയിരുത്തുന്നു.
ചെലവ് കുത്തനെ കൂടി; കാനഡയുടെ ബജറ്റ് കമ്മി 55 ബില്യൺ ഡോളർ കടന്നു
