ഒട്ടാവ: കാനഡയില് 2025-26 കാലയളവില് കാലഹരണപ്പെടുന്ന വര്ക്ക് പെര്മിറ്റുകള് ലക്ഷക്കണക്കിന് ആളുകളുടെ നിയമപരമായ സ്റ്റാറ്റസ് നഷ്ടപ്പെടുന്ന സാഹചര്യമിലേക്കെത്തിക്കാമെന്ന മുന്നറിയിപ്പ്. ഇതില് ഏറ്റവും വലിയ ആഘാതം നേരിടാന് പോകുന്നത് ഇന്ത്യന് പൗരന്മാരാണെന്ന് ഇമിഗ്രേഷന്, റെഫ്യൂജീസ് ആന്ഡ് സിറ്റിസണ്ഷിപ്പ് കാനഡ (IRCC)യുടെ കണക്കുകള് ഉദ്ധരിച്ച് ഇമിഗ്രേഷന് കണ്സല്ട്ടന്റുമാര് പറയുന്നു.
ഹിന്ദുസ്ഥാന് ടൈംസിനോട് സംസാരിച്ച മിസിസാഗയിലെ ഇമിഗ്രേഷന് കണ്സല്ട്ടന്റ് കന്വര് സെയ്റഹിന്റെ വിലയിരുത്തല് പ്രകാരം, 2025 അവസാനത്തോടെ ഏകദേശം 10.53 ലക്ഷം വര്ക്ക് പെര്മിറ്റുകളും 2026ല് കൂടി 9.27 ലക്ഷം പെര്മിറ്റുകളും കാലഹരണപ്പെടും. പുതിയ വിസാ വഴികളിലേക്കോ സ്ഥിരതാമസത്തിലേക്കോ മാറാന് കഴിയാതെ വന്നാല് ഇവരുടെ നിയമപരമായ സ്റ്റാറ്റസ് നഷ്ടപ്പെടും.
സര്ക്കാരിന്റെ നയമാറ്റങ്ങളും സ്ഥിരതാമസത്തിലേക്കുള്ള കര്ശനമായ മാനദണ്ഡങ്ങളും താല്ക്കാലിക തൊഴിലാളികള്ക്കും അന്തര്ദേശീയ വിദ്യാര്ത്ഥികള്ക്കും വലിയ വെല്ലുവിളിയായി മാറിയതായി സെയ്റഹ് ചൂണ്ടിക്കാട്ടുന്നു. വലിയ തോതില് താല്ക്കാലിക താമസക്കാര് നിലവിലുള്ളതിനിടയില് പ്രോസസ്സിംഗ് വൈകല്യങ്ങളും കുടിയേറ്റ സംവിധാനത്തിലെ സമ്മര്ദവും പ്രതിസന്ധി രൂക്ഷമാക്കുകയാണ്.
2026ലെ ആദ്യ മൂന്ന് മാസങ്ങള് നിര്ണായകമാകുമെന്നാണ് മുന്നറിയിപ്പ്. ഈ കാലയളവില് മാത്രം ഏകദേശം 3.15 ലക്ഷം പെര്മിറ്റുകള് കാലഹരണപ്പെടുമെന്നാണ് കണക്ക്. 2025ലെ അവസാന പാദത്തില് തന്നെ 2.91 ലക്ഷം പെര്മിറ്റുകള് കാലഹരണപ്പെട്ടിരുന്നു. ഈ പ്രവണത തുടര്ന്നാല് 2026 മധ്യത്തോടെ കാനഡയില് നിയമപരമായ രേഖകളില്ലാതെ കഴിയുന്നവരുടെ എണ്ണം 20 ലക്ഷം വരെ ഉയരാമെന്നും ഇതില് പകുതിയിലധികവും ഇന്ത്യന് പൗരന്മാരായിരിക്കുമെന്നുമാണ് സെയ്റഹിന്റെ വിലയിരുത്തല്.
ഗ്രേറ്റര് ടൊറന്റോ ഏരിയയിലെ ബ്രാംപ്ടണ്, കാലിഡണ് തുടങ്ങിയ പ്രദേശങ്ങളില് ഇതിനകം തന്നെ സാമൂഹിക സമ്മര്ദത്തിന്റെ സൂചനകള് കാണപ്പെടുന്നുണ്ടെന്ന് സെയ്റഹ് ആരോപിക്കുന്നു. രേഖകളില്ലാത്തവര് വനപ്രദേശങ്ങളില് ടെന്റ് ക്യാമ്പുകളിലായി കഴിയുന്ന സാഹചര്യം ഉണ്ടാകുന്നതായും അദ്ദേഹം പറഞ്ഞു. ഈ മുന്നറിയിപ്പ് ഹിന്ദുസ്ഥാന് ടൈംസ് റിപ്പോര്ട്ട് ചെയ്തിട്ടുണ്ട്.
കാനഡയിലെ താല്ക്കാലിക തൊഴിലാളികളും വിദ്യാര്ത്ഥികളും ഉള്പ്പെടുന്ന ജനസംഖ്യയില് ഭൂരിഭാഗം പേരും ഇന്ത്യന് പൗരന്മാരാണ് എന്നതാണ് ഈ പ്രതിസന്ധിയെ കൂടുതല് ഗൗരവമുള്ളതാക്കുന്നത്. വര്ക്ക് പെര്മിറ്റ് കാലഹരണപ്പെടല്, സ്ഥിരതാമസത്തിലേക്കുള്ള കടുപ്പമുള്ള മാറ്റങ്ങള്, ഭരണപരമായ വൈകല്യങ്ങള്-ഇവ ചേര്ന്നാല് നിയമപരവും സാമൂഹികവുമായ 'ഗ്രേ സോണ്' അവസ്ഥയിലേക്ക് ലക്ഷക്കണക്കിനാളുകള് തള്ളപ്പെടാനുള്ള സാധ്യതയാണ് ഉയരുന്നതെന്ന് വിദഗ്ധര് മുന്നറിയിപ്പ് നല്കുന്നു.
കാനഡയിലെ വര്ക്ക് പെര്മിറ്റ് കാലഹരണപ്പെടല് : ലക്ഷങ്ങള് നിയമവിരുദ്ധരാകാന് സാധ്യത; ഏറ്റവും കൂടുതല് ബാധിക്കുക ഇന്ത്യന് തൊഴിലാളികളെ
