ഒട്ടാവ: യുഎസില്‍ പ്രവേശിക്കുന്ന പൗരന്മാര്‍ തങ്ങളുടെ ഫോണുകളുടെയും ഇലക്ട്രോണിക് ഉപകരണങ്ങളും ഉള്‍പ്പെടെ കൂടുതല്‍ സൂക്ഷ്മപരിശോധന പ്രതീക്ഷിക്കണമെന്ന് കാനഡ ഒരു പുതിയ യാത്രാ ഉപദേശം പുറപ്പെടുവിച്ചു.
അതിര്‍ത്തി, കുടിയേറ്റ നയങ്ങള്‍ കര്‍ശനമാക്കാനുള്ള യുഎസ് പ്രസിഡന്റ് ഡോണള്‍ഡ് ട്രംപിന്റെ നീക്കത്തെ തുടര്‍ന്നാണ് പുതുക്കിയ യാത്രാ ഉപദേശം. യുകെ, ജര്‍മ്മനി, ഫ്രാന്‍സ് എന്നിവയുള്‍പ്പെടെയുള്ള രാജ്യങ്ങള്‍ ഇതിനകം തന്നെ സമാനമായ യാത്രാ ഉപദേശങ്ങള്‍ തങ്ങളുടെ പൗരന്മാര്‍ക്ക് നല്‍കിയിട്ടുണ്ട്.
കാനഡയ്‌ക്കെതിരായ ട്രംപിന്റെ കടുത്ത സാമ്പത്തിക, അധിനിവേശ ഭീഷണികള്‍ മൂലം കാനഡക്കാരുടെ യുഎസിലേക്കുള്ള യാത്രകളിലും ബുക്കിംഗുകളിലും ഗണ്യമായ കുറവ് സംഭവിച്ചിട്ടുണ്ട്. അന്താരാഷ്ട്ര സന്ദര്‍ശകരുടെ പ്രധാന ഉറവിടമായ കാനഡ കഴിഞ്ഞ വര്‍ഷം 20.5 ബില്യണ്‍ ഡോളര്‍ യുഎസ് യാത്രകള്‍ക്കായി ചെലവഴിച്ചുവെന്ന് യുഎസ് ട്രാവല്‍ അസോസിയേഷന്‍ പറയുന്നു. യുഎസില്‍ നിന്ന് കാറില്‍ കനേഡിയന്‍ നിവാസികളുടെ മടക്കയാത്രകളുടെ എണ്ണം ഫെബ്രുവരിയില്‍ ഒരു വര്‍ഷം മുമ്പുള്ളതിനേക്കാള്‍ 23% കുറഞ്ഞുവെന്ന് സ്റ്റാറ്റിസ്റ്റിക്‌സ് കാനഡ പറഞ്ഞു.
'അതിര്‍ത്തി അധികാരികളുമായുള്ള എല്ലാ ഇടപെടലുകളിലും അനുസരിക്കുകയും ഉടന്‍ തന്നെ മുന്നോട്ട് പോകുകയും ചെയ്യുക. നിങ്ങള്‍ക്ക് പ്രവേശനം നിഷേധിക്കപ്പെട്ടാല്‍, പിടിക്കപ്പെട്ടടിനുശേഷം നാടുകടത്തലിനായി കാത്തിരിക്കുന്ന വേളയില്‍ നിങ്ങളെ തടങ്കലില്‍ വയ്ക്കാനും സാധ്യതയുണ്ട്'- കനേഡിയന്‍ സര്‍ക്കാരിന്റെ പുതിയ യാത്രാ ഉപദേശത്തില്‍ പറയുന്നു.
മാര്‍ച്ചില്‍, തന്റെ തൊഴില്‍ വിസ പുതുക്കാന്‍ ശ്രമിച്ച ഒരു കനേഡിയന്‍ നടിയെ യുഎസ് മെക്‌സിക്കോ അതിര്‍ത്തിയില്‍ വെച്ച് കസ്റ്റഡിയിലെടുത്ത് 11 ദിവസത്തേക്ക് തടങ്കലില്‍ വച്ചതായി കനേഡിയന്‍ ബ്രോഡ്കാസ്റ്റിംഗ് കോര്‍പറേഷന്‍ അറിയിച്ചു.
അതേ മാസം, ട്രംപിനെ വിമര്‍ശിക്കുന്ന ഫോണിലെ സന്ദേശങ്ങളുമായി ബന്ധപ്പെട്ടതാണെന്ന് ഫ്രഞ്ച് സര്‍ക്കാര്‍ പറഞ്ഞ കേസില്‍ ഒരു ഫ്രഞ്ച് ശാസ്ത്രജ്ഞന് യുഎസിലേക്കുള്ള പ്രവേശനം നിഷേധിച്ചു. ഒരു യുഎസ് ലബോറട്ടറിയില്‍ നിന്നുള്ള രഹസ്യ വിവരങ്ങള്‍ അടങ്ങിയ ഒരു ഇലക്ട്രോണിക് ഉപകരണം ശാസ്ത്രജ്ഞന് കൈവശം വച്ചിരുന്നുവെന്ന് പറഞ്ഞാണ് ഭരണകൂടം അദ്ദേഹത്തിന് പ്രവേശനം നിഷേധിച്ചത്.
