ന്യൂഡല്‍ഹി: ഇന്ത്യ, യൂറോപ്പ്, വടക്കേ അമേരിക്ക എന്നിവ തമ്മിലുള്ള വ്യോമയാന കണക്റ്റിവിറ്റി വര്‍ദ്ധിപ്പിക്കുന്നതിനായി ഇന്‍ഡിഗോ ഡെല്‍റ്റ എയര്‍ ലൈന്‍സ്, എയര്‍ ഫ്രാന്‍സ്‌കെഎല്‍എം, വിര്‍ജിന്‍ അറ്റ്‌ലാന്റിക് എന്നിവ ഞായറാഴ്ച ഒരു പുതിയ പങ്കാളിത്തം പ്രഖ്യാപിച്ചു.
ടര്‍ക്കിഷ് എയര്‍ലൈന്‍സുമായുള്ള ബന്ധത്തിന് അടുത്തിടെ ലഭിച്ച വിമര്‍ശനങ്ങള്‍ക്കും ടര്‍ക്കിഷ് എയര്‍ലൈന്‍സ് വിമാനങ്ങളുടെ ഡാം പാട്ടക്കരാര്‍ മൂന്ന് മാസത്തേക്ക് മാത്രം നീട്ടുന്നതിന് ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (ഡിജിസിഎ) അംഗീകാരം നല്‍കിയതിനും ഇടയിലാണ് ഇത്.
ഒരു സംയുക്ത പ്രസ്താവന പ്രകാരം, അമേരിക്ക, കാനഡ, യൂറോപ്പ്, ഇന്ത്യ എന്നിവിടങ്ങളിലെ ഡസന്‍ കണക്കിന് നഗരങ്ങളെ ഈ സഖ്യം ബന്ധിപ്പിക്കും. ആഗോള വ്യോമയാന മേഖലയില്‍ കണക്റ്റിവിറ്റിക്കും സഹകരണത്തിനും പുതിയ മാനദണ്ഡങ്ങള്‍ സൃഷ്ടിക്കുന്നതിനൊപ്പം അന്താരാഷ്ട്ര യാത്രയ്ക്കുള്ള വര്‍ദ്ധിച്ചുവരുന്ന ആവശ്യം നിറവേറ്റുക എന്നതാണ് എയര്‍ലൈനുകളുടെ ലക്ഷ്യം.
ഇന്ത്യയിലെ ഏറ്റവും വലിയ എയര്‍ലൈന്‍ ഇന്‍ഡിഗോ അതിന്റെ അന്താരാഷ്ട്ര വ്യാപ്തി വര്‍ദ്ധിപ്പിക്കുന്നതില്‍ ശ്രദ്ധ കേന്ദ്രീകരിക്കുന്നു. 2026 മാര്‍ച്ചില്‍ അവസാനിക്കുന്ന നിലവിലെ സാമ്പത്തിക വര്‍ഷത്തില്‍ പത്ത് പുതിയ വിദേശ നഗരങ്ങളിലേക്ക് സര്‍വീസുകള്‍ ആരംഭിക്കാന്‍ പദ്ധതിയിടുന്നു.
ഇന്‍ഡിഗോ സിഇഒ പീറ്റര്‍ എല്‍ബേഴ്‌സ് ഡെല്‍റ്റ എയര്‍ ലൈന്‍സ് സിഇഒ എഡ് ബാസ്റ്റ്യന്‍ എയര്‍ ഫ്രാന്‍സ്‌കെഎല്‍എം സിഇഒ ബെഞ്ചമിന്‍ സ്മിത്തും വിര്‍ജിന്‍ അറ്റ്‌ലാന്റിക് സിഇഒ ഷായ് വെയ്‌സും പങ്കെടുത്ത ന്യൂഡല്‍ഹിയില്‍ നടന്ന മാധ്യമ സമ്മേളനത്തിലാണ് പ്രഖ്യാപനം.
സിവില്‍ ഏവിയേഷനില്‍ നിലവില്‍ അതിവേഗം വളരുന്ന വിപണികളില്‍ ഒന്നാണ് ഇന്ത്യ, ഈ ഗണ്യമായ വളര്‍ച്ച പ്രയോജനപ്പെടുത്താനാണ് ഈ സഹകരണം ശ്രമിക്കുന്നത്.
വരും വര്‍ഷങ്ങളില്‍ ഇന്ത്യയിലേക്കുള്ള സര്‍വീസുകള്‍ പുനരാരംഭിക്കാന്‍ എയര്‍ലൈന്‍ പദ്ധതിയിടുന്നതായി ഡെല്‍റ്റ എയര്‍ ലൈന്‍സ് സിഇഒ എഡ് ബാസ്റ്റ്യന്‍ വാര്‍ത്താ സമ്മേളനത്തില്‍ സ്ഥിരീകരിച്ചു. സര്‍ക്കാര്‍ അനുമതി ലഭിച്ചാല്‍ അറ്റ്‌ലാന്റയ്ക്കും ഡല്‍ഹിക്കും ഇടയില്‍ നേരിട്ടുള്ള വിമാന സര്‍വീസുകള്‍ ആരംഭിക്കാനാണ് ഡെല്‍റ്റ ഉദ്ദേശിക്കുന്നത്. 2022 മുതല്‍ എയര്‍ ഫ്രാന്‍സ് കെഎല്‍എമ്മുമായും വിര്‍ജിന്‍ അറ്റ്‌ലാന്റിക്കുമായും ഇന്‍ഡിഗോ പങ്കാളിത്തം നിലനിര്‍ത്തിയിട്ടുണ്ട്, പുതിയ സഹകരണം നിലവിലുള്ള ബന്ധങ്ങളെ അടിസ്ഥാനമാക്കിയുള്ളതാണ്.
ഇന്‍ഡിഗോ ഡെല്‍റ്റ, എയര്‍ ഫ്രാന്‍സ്‌കെഎല്‍എം, വിര്‍ജിന്‍ അറ്റ്‌ലാന്റിക് എന്നിവയുമായി ധാരണാപത്രത്തില്‍ ഒപ്പുവച്ചു
