ന്യൂഡല്‍ഹി: ലേസര്‍ അധിഷ്ഠിത ആയുധ വികസനത്തില്‍ ചരിത്ര മുന്നേറ്റവുമായി ഇന്ത്യാഗവണ്മെന്റിനുകീഴിലുള്ള പ്രതിരോധ ഗവേഷണ കേന്ദ്രം(Defence Research and Development Organisation). ഡ്രോണുകളെയും മിസൈലുകളെയും നിമിഷങ്ങള്‍ക്കുള്ളില്‍ തകര്‍ക്കാന്‍ ശേഷിയുള്ള ലേസര്‍ ആയുധം വിജയകരമായി പരീക്ഷിച്ചു. 30 കിലോവാട്ട് ശക്തിയുള്ള ആയുധമാണ് ഡിആര്‍ഡിഒ വികസിപ്പിച്ചിരിക്കുന്നത്. ഇതോടെ ഈ സാങ്കേതിക വിദ്യ സ്വന്തമായുള്ള യുഎസ്, ചൈന, റഷ്യ എന്നീ രാജ്യങ്ങളുടെ പട്ടികയില്‍ ഇന്ത്യയും ഇടംപിടിച്ചു.
മിസൈലുകള്‍, ഡ്രോണുകള്‍, ചെറുവിമാനങ്ങള്‍ തുടങ്ങി അഞ്ച് കിലോമീറ്റര്‍ പരിധിയിലുള്ള വ്യോമാക്രമണങ്ങളെ നിര്‍വീര്യമാക്കാന്‍ ശേഷിയുള്ള ഹൈപവര്‍ പവര്‍ ലേസര്‍ സാങ്കേതികവിദ്യയാണ് ഡിആര്‍ഡിഒ വികസിപ്പിച്ചെടുത്തത്. അത്യുഗ്ര ശേഷിയുള്ള കൗണ്ടര്‍ ഡ്രോണ്‍ സിസ്റ്റമാണിത്. തദ്ദേശീയമായി നിര്‍മിച്ച 30 കിലോവാട്ട് എംകെടു എ ലേസര്‍ഡയറക്ടഡ് എനര്‍ജി വെപ്പണ്‍ സിസ്റ്റം കുര്‍ണൂലിലെ നാഷണല്‍ ഓപ്പണ്‍ എയര്‍ റേഞ്ചിലാണ് ഡിആര്‍ഡിഒ വിജയകരമായി പരീക്ഷിച്ചത്. ലക്ഷ്യങ്ങള്‍ കണ്ടെത്തി പ്രകാശവേഗത്തില്‍ തകര്‍ക്കുന്നതാണ് ഈ സംവിധാനത്തിന്റെ ഏറ്റവും വലിയ പ്രത്യേകത.
ജാമിങ് കമ്മ്യൂണിക്കേഷന്‍, സാറ്റലൈറ്റ് സിഗ്‌നലുകള്‍ എന്നിവയുള്‍പ്പെടെ വിപുലമായ ഇലക്ട്രോണിക് സാങ്കേതിക വിദ്യകളും ലേസര്‍ ആയുധത്തില്‍ ഉള്‍ക്കൊള്ളിച്ചിട്ടുണ്ട്. കരയിലും കടലിലും ഒരുപോലെ ഉപയോഗിക്കാന്‍ സാധിക്കുമെന്ന പ്രത്യേകതയും ഈ ആയുധത്തിനുണ്ട്. വ്യോമ, റെയില്‍, റോഡ്, ജല മാര്‍ഗങ്ങള്‍ വഴി വേഗത്തില്‍ ഈ ആയുധം വിന്യസിക്കാന്‍ കഴിയും. വൈകാതെ തന്നെ ഇന്ത്യന്‍ സേനകള്‍ക്കും അര്‍ധസൈനിക വിഭാഗങ്ങള്‍ക്കും ലേസര്‍ ആയുധം ലഭ്യമാകും. ഇതോടെ യുഎസ്, ചൈന, റഷ്യ എന്നിവര്‍ക്ക് പുറമേ ലേസര്‍ അധിഷ്ഠിത ആയുധ ശേഷിയുള്ള ലോകത്തിലെ നാലാമത്തെ രാജ്യമായി ഇന്ത്യ മാറും.
നിലവിലെ വ്യോമ പ്രതിരോധ സംവിധാനങ്ങള്‍ക്ക് ഭീമമായ ചെലവാണ് ഓരോസമയത്തും വേണ്ടിവരിക. ലേസര്‍ ആയുധങ്ങളിലൂടെ കുറഞ്ഞ ചെലവില്‍ ശത്രുവിന്റെ ആക്രമണങ്ങളെ പ്രതിരോധിക്കാന്‍ സാധിക്കും. 20 കിലോമീറ്റര്‍ ദൂരപരിധിയില്‍ എതിരാളികളുടെ ആയുധങ്ങളെ തകര്‍ക്കുന്ന 'സൂര്യ' എന്ന പ്രതിരോധ സംവിധാനവും ഡിആര്‍ഡിഒ വികസിപ്പിക്കുന്നുണ്ട്. 300 കിലോവാട്ട് ശേഷിയുള്ള സൂര്യയും ലേസര്‍ അധിഷ്ഠിത ആയുധ സംവിധാനമാണ്.
നിമിഷങ്ങള്‍ക്കകം ഡ്രോണുകളും മിസൈലുകളും നശിപ്പിക്കും: ലേസര്‍ അധിഷ്ഠിത ആയുധ വികസനത്തില്‍ ചരിത്ര മുന്നേറ്റവുമായി ഡിആര്‍ഡിഒ
