ചെന്നൈ: വിദേശ നാണ്യ വിനിമയ നിയമത്തിലെ ക്രമക്കേട് ആരോപിച്ച് എമ്പുരാൻ സിനിമ നിർമാതാവ് കൂടെയായ ഗോകുലം ഗോപാലൻ്റെ ഓഫീസിൽ നടന്ന റെയിഡ് എൻഫോഴ്സ്മന്റ് ഡയറക്ടറേറ്റ് അവസാനിപ്പിച്ചു. ഗോകുലം ഗോപാലനെ ഏഴര മണിക്കൂറിലേറെ ചോദ്യം ചെയ്തിരുന്നു. മറ്റ് സാമ്പത്തിക ഇടപാടുകളും ഇഡി നിരീക്ഷിക്കുന്നുണ്ട്. രേഖകളും ഒന്നരക്കോടി രൂപയും പിടിച്ചെടുത്തതായി ആണ് സൂചന. സാമ്പത്തിക ഇടപാടുകൾ വിലയിരുത്തിയ ശേഷം റെയ്ഡ് തുടരണോ വേണ്ടയോ എന്ന് തീരുമാനിക്കും.
വിവിധ സിനിമകളിൽ പണം നിക്ഷേപിച്ചതുൾപ്പെടെ ചട്ടം ലംഘിച്ചാണെന്നാണ് ആരോപണം.
കേരളത്തിലും തമിഴ്നാട്ടിലുമായി അഞ്ച് ഓഫീസുകളിൽ ആയാണ് പരിശോധന നടന്നത്. നീലാങ്കരയിലെ വീട്ടിലും ചെന്നൈയിലെ ഓഫീസിലും ഉൾപ്പെടെ റെയ്ഡ് നടന്നു. നീലാങ്കരയിലെ വീട്ടിൽ നടത്തിയ പരിശോധനയിലെ കണ്ടെത്തലുകളുടെ തുടർച്ചയായാണ് ഗോകുലം ഗോപാലനെ ചോദ്യംചെയ്തത് എന്നാണ് റിപ്പോർട്ടുകൾ. ഗോകുലം ഗോപാലന്റെ മകൻ ബൈജു ഗോപാലനെയും എൻഫോഴ്സ്മൻ്റ് ഡയറക്ടറേറ്റ് ചോദ്യം ചെയ്തിരുന്നു.
ആയിരം കോടി രൂപയുടെ ഫെമ നിയമലംഘനമാണ് കേന്ദ്ര ഏജൻസി ആരോപിക്കുന്നത്.
ഒരു ഇടവേളയ്ക്കു ശേഷമാണ് കേന്ദ്ര ഏജൻസി വീണ്ടും ഗോകുലം ഗോപാലനെതിരെ രംഗത്തെത്തുന്നത്.
കോഴിക്കോട്ടെ കോർപറേറ്റ് ഓഫീസ്, ഗോകുലം മാൾ, ചെന്നെയിലെ ഓഫീസ്, വീട് എന്നിവടങ്ങളിലെല്ലാം ഇഡി റെയ്ഡ് നടത്തി.ഗോകുലം ഗോപാലൻ ഡയറക്ടറായ മറ്റ് കമ്പനികൾ നടത്തിയ നിക്ഷേപങ്ങളും അന്വേഷണ പരിധിയിലുണ്ട്. ഗോകുലം ചിറ്റ്സും അന്വേഷണ പരിധിയിലുണ്ട്. 2017 ൽ ആദായ നികുതി വകുപ്പും 2023ൽ ഇഡിയും ഗോകുലം ഗോപാലനെതിരെ അന്വേഷണം നടത്തിയിരുന്നു.
പൃഥ്വിരാജിനെതിരെയും നടപടി
ശ്രീ ഗോകുലം ഗ്രൂപ്പ് ഓഫ് കമ്പനീസിന്റെ സ്ഥാപകനും ഉടമയുമായ ഗോപാലൻ, ധനകാര്യ രംഗത്ത് മാത്രമല്ല വിദ്യാഭ്യാസം, ആരോഗ്യ സംരക്ഷണം, ഹോസ്പിറ്റാലിറ്റി, മാധ്യമം, റിയൽ എസ്റ്റേറ്റ്, തുടങ്ങി വിവിധ മേഖലകളിൽ സ്ഥാപനങ്ങൾ നടത്തുന്നു. ഗോകുലം ഗോപാലൻ്റെ സിനിമ ഡിസ്ട്രിബ്യൂഷൻ കമ്പനിയാണ് ശ്രീ ഗോകുലം മൂവീസ്. ഫ്ലവേഴ്‌സ് ടിവി, 24 ന്യൂസ് തുടങ്ങിയ മാധ്യമ സ്ഥാപനങ്ങളിലും നിക്ഷേപമുണ്ട്.
എമ്പുരാൻ സിനിമ സംവിധാനം ചെയ്ത് നടൻ പൃഥ്വിരാജിനെതിരെയും ആദായ നികുതി വകുപ്പ് നടപടി സ്വീകരിച്ചിട്ടുണ്ട്. കഴിഞ്ഞ മാസം അവസാനം ആദായ നികുതി നിയമ ലംഘനം ആരോപിച്ച് ആദായ നികുതി വകുപ്പ് നോട്ടീസ് നൽകിയിരുന്നു. എന്നാൽ പിഴഈടാക്കിയതായാണ് സൂചന.