ന്യൂഡല്ഹി: തൃണമൂല് കോണ്ഗ്രസിന്റെ ഔദ്യോഗിക പേരും രണ്ട് പൂവും പുല്ലും ചിഹ്നവും ഉപയോഗിക്കുന്നതിന് തെരഞ്ഞെടുപ്പ് കമ്മിഷന് ഏര്പ്പെടുത്തിയ വിലക്കിനെതിരെ പശ്ചിമ ബംഗാള് മുന് മുഖ്യമന്ത്രിയും തൃണമൂല് കോണ്ഗ്രസ് നേതാവുമായ മമത ബാനര്ജി സുപ്രിം കോടതിയെ സമീപിച്ചു. പാര്ട്ടിയിലെ രണ്ട് വിഭാഗങ്ങള് തമ്മിലുള്ള തര്ക്കത്തെ തുടര്ന്ന് തെരഞ്ഞെടുപ്പ് കമ്മിഷന് ഏര്പ്പെടുത്തിയ ഇടക്കാല നിയന്ത്രണത്തിനെതിരെയാണ് ഹര്ജി.
ഒക്ടോബര് ആറിന് നടക്കുന്ന നന്ദിഗ്രാം, റേജിനഗര് നിയമസഭാ ഉപതിരഞ്ഞെടുപ്പുകള് മുന്നില്ക്കണ്ട് മമത വിഭാഗത്തിന് 'മമത ഓള് ഇന്ത്യ തൃണമൂല് കോണ്ഗ്രസ്' എന്ന പേരും 'ഫുട്ബോള് പ്ലെയര്' ചിഹ്നവും തെരഞ്ഞെടുപ്പ് കമ്മിഷന് അനുവദിച്ചിരുന്നു. എതിര് വിഭാഗത്തിന് 'ഡെമോക്രാറ്റിക് തൃണമൂല് കോണ്ഗ്രസ്' എന്ന പേരും 'കവര്' ചിഹ്നവുമാണ് അനുവദിച്ചത്. ഇരു വിഭാഗങ്ങളെയും പശ്ചിമ ബംഗാള്, മേഘാലയ, ത്രിപുര എന്നിവിടങ്ങളില് അംഗീകൃത രാഷ്ട്രീയ പാര്ട്ടികളായി കമ്മിഷന് പരിഗണിച്ചിട്ടുണ്ട്.
പുതിയ പേര് അംഗീകരിക്കാന് തയാറല്ലെന്ന് വ്യക്തമാക്കിയ മമത, യഥാര്ഥ പാര്ട്ടി പേരും ചിഹ്നവും തിരിച്ചുപിടിക്കുന്നതിനായി രാഷ്ട്രീയ, ജനാധിപത്യ, നിയമപരമായ മാര്ഗങ്ങളിലൂടെ പോരാട്ടം തുടരുമെന്ന് പറഞ്ഞു. പാര്ട്ടിയുടെ പേരും ചിഹ്നവും മരവിപ്പിച്ച നടപടിയെ രാജ്യത്തിന്റെ ജനാധിപത്യ ചരിത്രത്തിലെ 'കറുത്ത ദിനം' എന്നും അവര് വിശേഷിപ്പിച്ചിരുന്നു.
പാര്ട്ടി രൂപീകരിക്കുന്നതിനും വളര്ത്തിയെടുക്കുന്നതിനുമായി നടത്തിയ പോരാട്ടവുമായി ബന്ധപ്പെട്ട വൈകാരിക ബന്ധം ചൂണ്ടിക്കാട്ടിയ മമത, സംഘടന കെട്ടിപ്പടുക്കുന്നതില് പങ്കാളികളാകാത്തവര്ക്ക് ആ ബന്ധം മനസ്സിലാക്കാനാകില്ലെന്നും പ്രതികരിച്ചു.
അതേസമയം, നന്ദിഗ്രാം ഉപതെരഞ്ഞെടുപ്പില് കോണ്ഗ്രസ് സ്ഥാനാര്ഥി മിലന് പ്രധാന് മമത വിഭാഗം പിന്തുണ പ്രഖ്യാപിച്ചു. മമത വിഭാഗം നേരത്തെ സ്ഥാനാര്ഥിയായി പ്രഖ്യാപിച്ച സഞ്ചിത പ്രധാന് മത്സരത്തില്നിന്ന് പിന്മാറിയതിനെ തുടര്ന്നാണ് തീരുമാനം.
നന്ദിഗ്രാമില് പുതിയ സ്ഥാനാര്ഥിയെ നിര്ത്തില്ലെന്നും ബി ജെ പിക്കെതിരായ ഇന്ത്യ മുന്നണിയുടെ പോരാട്ടത്തിന് ഐക്യദാര്ഢ്യം പ്രകടിപ്പിക്കുന്നതിന്റെ ഭാഗമായാണ് കോണ്ഗ്രസ് സ്ഥാനാര്ഥിയെ പിന്തുണയ്ക്കുന്നതെന്നും മമത വ്യക്തമാക്കി.