ഇന്ത്യ-യൂറോപ്യന്‍ യൂണിയന്‍ (ഇയു) വ്യാപാര ചര്‍ച്ചകളിലാണ് നിലവില്‍ ലോകം ഉറ്റുനോക്കുന്നത്. യുഎസ് പ്രസിഡന്റ് ഡോണള്‍ഡ് ട്രംപിന്റെ നികുതി പ്രഹരങ്ങള്‍ ലഘൂകരിക്കാന്‍ യൂറോപ്യന്‍ യൂണിയനുമായി ഒരു ഫ്രീ ട്രേഡ് ഉടമ്പടിക്കാണ് ഇന്ത്യ ശ്രമിക്കുന്നത്. യുക്രൈന്‍ യുദ്ധം തുടരുന്ന റഷ്യയ്ക്ക് മേല്‍ കടുത്ത ഉപരോധമാണ് ഇയുവും ഏര്‍പ്പെടുത്തിയിരിക്കുന്നത്. അതേസമയം റഷ്യയുടെ നിലവിലെ ഏറ്റവും വലിയ വ്യാപാര പങ്കാളിയാണ് ഇന്ത്യ. ഈ ഇടപാടുകളാണ് ട്രംപിന്റെ അധിക നികുതികളിലേയ്ക്ക് നയിച്ചത്. ഇയു അടുത്തിടെ റഷ്യന്‍ ഉല്‍പ്പന്നങ്ങള്‍ ഉപയോഗിച്ചുള്ള ഉപഉല്‍പ്പന്നങ്ങള്‍ക്കും വിപണി അടച്ചിരുന്നു. ഈ സാഹചര്യത്തില്‍ ഇന്ത്യ ഇയു ചര്‍ച്ചകള്‍ വളരെ പ്രധാനമാണ്.
റിപ്പോര്‍ട്ടുകള്‍ പ്രകാരം വ്യാപാര ചര്‍ച്ചകളുടെ ഭാഗമായി ഇന്ത്യയിലുള്ള യൂറോപ്യന്‍ യൂണിയന്‍ ട്രേഡ് കമ്മീഷണറെ സെപ്റ്റംബര്‍ 12ന് വാണിജ്യ മന്ത്രി പീയൂഷ് ഗോയല്‍ കാണും. ഖത്തറുമായുള്ള ഒരു സ്വതന്ത്ര വ്യാപാര കരാറും അടുത്ത മാസത്തോടെ ഇന്ത്യ പ്രഖ്യാപിക്കാന്‍ സാധ്യതയുണ്ട്. ന്യൂസിലാന്‍ഡ്, ചിലി, പെറു എന്നിവരമായുള്ള ചര്‍ച്ചകളും പുരോഗമിക്കുകയാണ്. കൂടുതല്‍ രാജ്യങ്ങളുമായി ബന്ധം ഉറപ്പിക്കുന്നതു വഴി യുഎസ് നികുതി മൂലമുള്ള ആഘാതം കുറയ്ക്കാന്‍ കഴിയുമെന്നാണ് വിദഗ്ധരുടെ വിലയിരുത്തല്‍.
ഇയുയുമായുള്ള വ്യാപാര കരാര്‍ ഇന്ത്യയ്ക്ക് ഗുണം ചെയ്യുമെന്നാണ് വിലയിരുത്തല്‍. 2023-24 ല്‍ ഇയുവുമായുള്ള ഇന്ത്യയുടെ വ്യാപാരം 137.41 ബില്യണ്‍ ഡോളറിന്റേതായിരുന്നു. പുതിയ സരാര്‍ സാധ്യമായല്‍ ഈ നമ്പറുകള്‍ കുതിക്കും. ഖത്തറുമായുള്ള കരാര്‍ ഊര്‍ജ്ജ, പെട്രോളിയം മേഖലയ്ക്ക് കൂടുതല്‍ കരുത്തേകും. ഇത്തരം നടപടികള്‍ ആഗോള വിതരണ ശൃംഖലയില്‍ ഇന്ത്യയെ ശക്തിപ്പെടുത്തും. അതേസമയം ഈ കരാറുകള്‍ ആഭ്യന്തര വ്യവസായങ്ങളെ ബാധിക്കാതെ നോക്കേണ്ടതും വളരെ അനിവാര്യമാണ്.
ഇതുവരെ ഉറപ്പിച്ച കരാറുകള്‍
2021: ഇന്ത്യ മൗറീഷ്യസ് സമഗ്ര സാമ്പത്തിക സഹകരണ പങ്കാളിത്ത കരാര്‍
2022: ഇന്ത്യ യുഎഇ സമഗ്ര സാമ്പത്തിക പങ്കാളിത്ത കരാര്‍
2024: ഇന്ത്യ ഓസ്‌ട്രേലിയ സാമ്പത്തിക സഹകരണ വ്യാപാര കരാര്‍
2024: ഇന്ത്യ യൂറോപ്യന്‍ സ്വതന്ത്ര വ്യാപാര അസോസിയേഷന്‍ വ്യാപാര സാമ്പത്തിക പങ്കാളിത്ത കരാര്‍
2025: ഇന്ത്യ യുകെ സമഗ്ര സാമ്പത്തിക വ്യാപാര കരാര്‍ (ഇന്ത്യ യുകെ കരാര്‍ ഇതുവരെ നടപ്പിലാക്കിയിട്ടില്ല.)
നിലവില്‍ ഇന്ത്യ കൂടുതല്‍ രാജ്യങ്ങളുമായി കരാറിലെത്താനുള്ള ശ്രമത്തിലാണ്. ഇന്ത്യ ഓസ്‌ട്രേലിയ സമഗ്ര സാമ്പത്തിക സഹകരണ കരാര്‍, ഇന്ത്യ ശ്രീലങ്ക സാമ്പത്തിക സാങ്കേതിക സഹകരണ കരാര്‍, ഇന്ത്യ പെറു എഫ്ടിഎ, ഇന്ത്യ ചിലി സിഇപിഎ, ഇന്ത്യ ന്യൂസിലാന്‍ഡ് എഫ്ടിഎ തുടങ്ങി മറ്റ് നിരവധി കരാറുകള്‍ ഇപ്പോഴും ചര്‍ച്ച ഘട്ടത്തിലാണ്.
ട്രംപിന്റെ നികുതി പ്രഹരം നേരിടാന്‍ യൂറോപ്യന്‍ യൂണിയനുമായി സ്വതന്ത്ര വ്യാപാര കരാറിന് ഇന്ത്യയുടെ ശ്രമം
