മെൽബൺ: സോഷ്യൽ മീഡിയ പ്ലാറ്റ്ഫോമുകളിൽ 16 വയസ്സിന് താഴെയുള്ള കുട്ടികൾക്ക് വിലക്കേർപ്പെടുത്താനുള്ള ഓസ്ട്രേലിയയുടെ തീരുമാനത്തെ അഭിനന്ദിച്ച് പ്രധാനമന്ത്രി നരേന്ദ്ര മോദി. ഡിജിറ്റൽ ഇടങ്ങൾ നിയന്ത്രിക്കുന്നതിനും യുവ ഉപഭോക്താക്കളെ സംരക്ഷിക്കുന്നതിനും ഓസ്ട്രേലിയ നടത്തുന്ന ശ്രമങ്ങൾ ഇന്ത്യയ്ക്കും ലോകമെമ്പാടുമുള്ള മറ്റ് രാജ്യങ്ങൾക്കും വിലപ്പെട്ട പാഠങ്ങളാണ് നൽകുന്നതെന്ന് അദ്ദേഹം പറഞ്ഞു. മെൽബണിൽ നടന്ന ഓസ്ട്രേലിയ-ഇന്ത്യ വാർഷിക ലീഡേഴ്സ് സമ്മിറ്റിൽ ഓസ്ട്രേലിയൻ പ്രധാനമന്ത്രി ആന്റണി അൽബാനീസും മറ്റ് പ്രമുഖ നേതാക്കളും പങ്കെടുത്ത ചടങ്ങിൽ സംസാരിക്കുകയായിരുന്നു പ്രധാനമന്ത്രി.
കുട്ടികൾക്കായി സുരക്ഷിതമായ ഒരു ഓൺലൈൻ അന്തരീക്ഷം സൃഷ്ടിക്കുന്നതിനുള്ള ഓസ്ട്രേലിയയുടെ നിയമനിർമ്മാണത്തിൽ നിന്നും സമീപനത്തിൽ നിന്നും ഇന്ത്യ ഒരുപാട് കാര്യങ്ങൾ പഠിക്കുന്നുണ്ടെന്നും അദ്ദേഹം കൂട്ടിച്ചേർത്തു. വിവരസാങ്കേതികവിദ്യ നിയന്ത്രണത്തിലും ഓൺലൈൻ സുരക്ഷയിലും, പ്രത്യേകിച്ച് സോഷ്യൽ മീഡിയയുടെ ദോഷകരമായ ഫലങ്ങളിൽ നിന്ന് കുട്ടികളെ സംരക്ഷിക്കുന്നതിനായി ഓസ്ട്രേലിയ സ്വീകരിച്ചിരിക്കുന്ന നടപടികളെ പ്രധാനമന്ത്രി പ്രശംസിച്ചു.
വിവരസാങ്കേതിക വിദ്യയുമായും സോഷ്യൽ മീഡിയയുമായും ബന്ധപ്പെട്ട നിയമങ്ങളിൽ ഓസ്ട്രേലിയ വരുത്തുന്ന മാറ്റങ്ങളും സമൂഹത്തെ സംരക്ഷിക്കാൻ നടത്തുന്ന പ്രവർത്തനങ്ങളും ലോകത്തിന് തന്നെ ഏറെ പ്രചോദനകരമാണെന്ന് പ്രധാനമന്ത്രി വ്യക്തമാക്കി. 16 വയസ്സിന് താഴെയുള്ള കുട്ടികൾ സോഷ്യൽ മീഡിയ അക്കൗണ്ടുകൾ ഉണ്ടാക്കുന്നത് തടയാൻ പ്രമുഖ പ്ലാറ്റ്ഫോമുകളോട് ആവശ്യപ്പെടുന്ന ലോകത്തിലെ ഏറ്റവും കർശനമായ സോഷ്യൽ മീഡിയ നിയന്ത്രണങ്ങളുമായാണ് ഓസ്ട്രേലിയ മുന്നോട്ട് പോകുന്നത്. സൈബർ ആക്രമണങ്ങൾ, ഓൺലൈൻ വഴിയുള്ള ദ്രോഹങ്ങൾ, കുട്ടികളുടെ മാനസികാരോഗ്യത്തെ സോഷ്യൽ മീഡിയ എങ്ങനെ ബാധിക്കുന്നു തുടങ്ങിയ ആശങ്കകൾ പരിഹരിക്കാനാണ് ഈ നിയമനിർമ്മാണം ലക്ഷ്യമിടുന്നതെന്നും മോദി ചൂണ്ടിക്കാട്ടി.
16 വയസിനു താഴെ സോഷ്യല് മീഡിയ നിരോധനം; ഓസ്ട്രേലിയയില് നിന്നു പാഠം പഠിക്കാനുണ്ടെന്ന് നരേന്ദ്ര മോദി
