ന്യൂഡല്‍ഹി: ട്രാവല്‍ വ്‌ളോഗിന്റെ മറവില്‍ പാക്കിസ്ഥാന് വിവരങ്ങള്‍ ചോര്‍ത്തിയ യൂട്യൂബര്‍ ജ്യോതി റാണി എന്നറിയപ്പെടുന്ന ജ്യോതി മല്‍ഹോത്ര അറസ്റ്റില്‍. ഹരിയാന ഹിസാറില്‍ നിന്നാണ് അറസ്റ്റ് രേഖപ്പെടുത്തിയത്.
ഇന്ത്യന്‍ സൈന്യവുമായി ബന്ധപ്പെട്ട വിവരങ്ങള്‍ ചോര്‍ത്തിയ കേസില്‍ ജ്യോതിറാണിക്കു പുറമേ 25കാരനായ വിദ്യാര്‍ഥിയും 24കാരനായ സുരക്ഷാ ജീവനക്കാരനും ഉള്‍പ്പെടെ ആറു പേര് അറസ്റ്റിലായിട്ടുണ്ട്.
പഞ്ചാബ് സ്വദേശി ഗുസാല, യാമീന്‍ മുഹമ്മദ്, ഹരിയാന സ്വദേശി ദേവീന്ദര്‍ സിങ് ധില്ലണ്‍, അര്‍മാന്‍ എന്നിവരാണ് അറസ്റ്റിലായത്. ട്രാവല്‍ വിത്ത് ജ്യോ എന്ന പേരിലുള്ള യൂ ട്യൂബ് അക്കൗണ്ട് വഴിയാണ് ജ്യോതി റാണി വീഡിയോകള്‍ പുറത്തു വിട്ടിരുന്നത്.
പാക്കിസ്ഥാന് ഹൈ കമ്മിഷനിലെ ഡാനിഷ് എന്നറിയപ്പെടുന്ന എഹ്‌സാന്‍ ഉര്‍ റഹിമുമായി 2023ലാണ് ജ്യോതി റാണി പരിചയത്തിലാകുന്നത്. പാക്കിസ്ഥാനിലേക്കുള്ള വിസ ലഭിക്കുന്നതിന് ഡല്‍ഹിയിലെ പാക്കിസ്ഥാന് ഹൈ കമ്മിഷനിലെത്തിയതിനു ശേഷം ജ്യോതിയെ പാക് ചാരസംഘടനകളുമായി ഡാനിഷ് പരിചയപ്പെടുത്തി. അതിനു ശേഷം രണ്ടിലേറെ തവണ പാക്കിസ്ഥാനില്‍ പോയിരുന്നുവെന്നുമാണ് പൊലീസ് കണ്ടെത്തിയിരിക്കുന്നത്. പാക് ചാരസംഘടനയില്‍ ഉള്‍പ്പെട്ട വ്യക്തിക്കൊപ്പം യുവതി ബാലിയിലേക്ക് യാത്ര നടത്തിയെന്നും സമൂഹ മാധ്യമങ്ങള്‍ വഴി പാക്കിസ്ഥാന്റെ പ്രതിച്ഛായ വര്‍ധിപ്പിക്കാന്‍ നിരവധി വീഡിയോകള്‍ ചെയ്തുവെന്നും പൊലീസ് കണ്ടെത്തിയിട്ടുണ്ട്. ഓപ്പറേഷന്‍ സിന്ദൂറിന് പിന്നാലെ ഇന്ത്യന്‍ സൈന്യത്തിന്റെ വിവരങ്ങള്‍ ചോര്‍ത്തിയെന്ന് കണ്ടെത്തിയതിനെ തുടര്‍ന്ന് ഡാനിഷിനോട് 24 മണിക്കൂറിനകം രാജ്യം വിടാന്‍ ഇന്ത്യ ആവശ്യപ്പെട്ടിരുന്നു.
പാക്കിസ്ഥാനില്‍ എത്തിയപ്പോള്‍ പാക് സുരക്ഷാ ജീവനക്കാരും ഇന്റലിജന്‍സ് ജീവനക്കാരുമായി കൂടിക്കാഴ്ച നടത്തിയിരുന്നുവെന്നും ചാര സംഘടനയില്‍ ഉള്‍പ്പെട്ട ഷകീര്‍, റാണ ഷഹബാസ് എന്നിവരുമായി പരിചയപ്പെട്ടുവെന്നും ജ്യോതി റാണി കുറ്റസമ്മതം നടത്തിയിട്ടുണ്ട്.
സംശയം ഒഴിവാക്കാനായി ഷകീറിന്റെ പേര് ജാട് റാണ്‍ധവ എന്ന പേരിലാണ് ഫോണില്‍ സേവ് ചെയ്തിരുന്നത്. പിന്നീട് ഇന്ത്യയിലെത്തിയതിനു ശേഷം വാട്‌സാപ്പ്, സ്‌നാപ് ചാറ്റ്, ടെലിഗ്രാം എന്നിവ വഴി ഷകീറുമായി നിരന്തരം ബന്ധപ്പെട്ടിരുന്നുവെന്നും രാജ്യവുമായി ബന്ധപ്പെട്ട ചില വിലപ്പെട്ട വിവരങ്ങള്‍ പങ്കുവച്ചിരുന്നുവെന്നും ജ്യോതി റാണി വെളിപ്പെടുത്തിയിട്ടുണ്ട്.