കാസർകോട്: പെരിയയിലെ കേരള കേന്ദ്ര സർവകലാശാലയിൽ വന്ദേമാതരത്തിന്റെ നൂറ്റിയമ്പതാം വാർഷികത്തിന്റെ പേരിൽ സംഘടിപ്പിച്ച ദേശീയ സെമിനാർ രണ്ടാം ദിവസവും വിദ്യാർത്ഥി പ്രതിഷേധത്തിൽ മുങ്ങി. വൻ പ്രതിഷേധത്തെ തുടർന്ന് ബുധനാഴ്ച ഉച്ചയ്ക്ക് നിശ്ചയിച്ചിരുന്ന സെഷൻ പൂർത്തിയാക്കാനാവാതെ പൂർണ്ണമായി നിർത്തിവെച്ചു. ഉച്ചയ്ക്ക് 12.15 മുതൽ 1.30 വരെയുള്ള സെഷനാണ് വിദ്യാർത്ഥികളുടെ ശക്തമായ എതിർപ്പിനെ തുടർന്ന് ഉപേക്ഷിക്കേണ്ടി വന്നത്. സർവകലാശാലയിലെ ലിംഗ്വിസ്റ്റിക്സ് വിഭാഗം പ്രൊഫസറും പ്രോക്ടറുമായ പി. ശ്രീകുമാർ പ്രബന്ധം അവതരിപ്പിക്കാൻ തുടങ്ങിയതോടെയാണ് വിദ്യാർത്ഥികൾ പ്രതിഷേധവുമായി രംഗത്തെത്തിയത്.
‘ആർഎസ്എസ് ഗോ ബാക്ക്’ എന്ന് ഉറക്കെ മുദ്രാവാക്യം വിളിച്ച വിദ്യാർത്ഥികൾ, വേദിക്ക് മുന്നിൽ ഷൂ ഉയർത്തിപ്പിടിച്ചാണ് പ്രതിഷേധിച്ചത്. സർവകലാശാലയിൽ സംഘപരിവാർ അജണ്ടകളും കാവിവൽക്കരണവും നടപ്പാക്കുന്നത് ശ്രീകുമാറിന്റെ നേതൃത്വത്തിലാണെന്ന് വിദ്യാർത്ഥി സംഘടനകൾ ആരോപിച്ചു. സ്കൂൾ ഓഫ് ലാംഗ്വേജസ് ആൻഡ് കംപാരറ്റീവ് ലിറ്ററേച്ചർ സംഘടിപ്പിച്ച ദേശീയ സെമിനാറിനെ സംഘപരിവാർ വേദിയാക്കി മാറ്റിയത് ഇയാളുടെ ഇടപെടലിലൂടെയാണെന്നാണ് വിദ്യാർത്ഥികളുടെ പ്രധാന ആക്ഷേപം. പ്രോക്ടർ പദവിയിൽ തുടരാൻ അർഹനല്ലാത്ത ശ്രീകുമാർ ഉടൻ രാജിവെക്കണമെന്നും പ്രതിഷേധക്കാർ ആവശ്യപ്പെട്ടു. സെമിനാറിന്റെ സമാപന ദിനത്തിൽ ഇയാളെ പ്രബന്ധം അവതരിപ്പിക്കാൻ അനുവദിക്കില്ലെന്ന് എസ്എഫ്ഐ ഉൾപ്പെടെയുള്ള സംഘടനകൾ നേരത്തെ തന്നെ മുന്നറിയിപ്പ് നൽകിയിരുന്നു.
രജിസ്റ്റർ ചെയ്ത വിദ്യാർത്ഥികളെ തടഞ്ഞ് എബിവിപി പ്രവർത്തകരെ മാത്രം സെമിനാർ ഹാളിലേക്ക് പ്രവേശിപ്പിച്ചതിലും വിദ്യാർത്ഥികൾക്ക് കടുത്ത അമർഷമുണ്ട്. പരിപാടിയുടെ ആദ്യ ദിനമായ ചൊവ്വാഴ്ച ആർഎസ്എസ് നേതാവ് കെ. നന്ദകുമാർ മുഖ്യാതിഥിയായി എത്തിയതിനെതിരെ വിദ്യാർത്ഥികൾ വലിയ തോതിൽ പ്രക്ഷോഭം നടത്തിയിരുന്നു. അന്ന് പൊലീസിനെ കാമ്പസിനകത്തേക്ക് വിളിച്ചുവരുത്തി വിദ്യാർത്ഥികളെ കായികമായി നേരിടുകയും ക്രൂരമായി തല്ലിച്ചതയ്ക്കുകയും ചെയ്തിരുന്നു. ഇതിൽ നിരവധി വിദ്യാർത്ഥികൾക്ക് പരിക്കേറ്റിരുന്നു. വിദ്യാർത്ഥികളെ ആക്രമിക്കാൻ പൊലീസിന് ഒത്താശ ചെയ്ത പ്രോക്ടർ ഉൾപ്പെടെയുള്ള സർവകലാശാല അധികൃതർ പരസ്യമായി മാപ്പുപറയണമെന്നും ആവശ്യപ്പെട്ട് പ്രതിഷേധം ശക്തമായി തുടരുകയാണ്.
അതേസമയം, വിദ്യാർഥി പ്രതിഷേധങ്ങളിൽ രൂക്ഷ പ്രതികരണവുമായി ഗവർണർ രാജേന്ദ്ര വിശ്വനാഥ് ആർലേക്കർ രംഗത്തെത്തി. കാസർകോട് പെരിയയിലെ ക്യാമ്പസിൽ നടന്ന സെമിനാറിൻ്റെ സമാപന സമ്മേളനത്തിൽ മുഖ്യാതിഥിയായി പങ്കെടുത്ത് സംസാരിക്കവെയാണ് അദ്ദേഹം വിദ്യാർഥി സംഘടനകളുടെ സമരത്തെ കഠിനമായ ഭാഷയിൽ വിമർശിച്ചത്. ഇവിടെയുണ്ടായ പ്രതിഷേധങ്ങൾ സ്വയമേവ ഉണ്ടായ ഒറ്റപ്പെട്ട സംഭവമല്ലെന്നും, ഇതിന് പിന്നിൽ ചില പ്രത്യേക അജണ്ടകളും ആസൂത്രിതമായ നീക്കങ്ങളുമുണ്ടെന്നും ഗവർണർ വ്യക്തമാക്കി. ഇത്തരം പ്രവൃത്തികൾ രാജ്യത്തിന് തന്നെ അപമാനകരമാണെന്നും ഇതിനുപിന്നിൽ പ്രവർത്തിച്ചവരെ കണ്ടെത്തി കർശന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
വന്ദേമാതരത്തെ എന്തിനാണ് ചിലർ എതിർക്കുന്നതെന്ന് തനിക്ക് മനസിലാകുന്നില്ലെന്നും, കൊളോണിയൽ നിയമങ്ങളെയും അടിച്ചമർത്തലുകളെയും ചെറുത്തുതോൽക്കുന്നതിൽ വന്ദേമാതരം വഹിച്ച പങ്ക് വളരെ വലുതാണെന്നും ഗവർണർ ഓർമിപ്പിച്ചു. വിവാദങ്ങൾക്കും സംഘർഷങ്ങൾക്കുമിടയിലും സർവകലാശാലയിൽ വന്ദേമാതരം പൂർണമായി ആലപിച്ചു. കേന്ദ്ര സാംസ്‌കാരിക മന്ത്രാലയത്തിന് കീഴിലുള്ള സാഹിത്യ അക്കാദമി, അഖില ഭാരതീയ സാഹിത്യ പരിഷത്ത്, കേരള കേന്ദ്ര സർവകലാശാല എന്നിവയുടെ സംയുക്ത ആഭിമുഖ്യത്തിലാണ് രണ്ട് ദിവസത്തെ ദേശീയ സെമിനാർ സംഘടിപ്പിച്ചത്. പ്രജ്ഞാ പ്രവാഹ് ദേശീയ കൺവീനർ ജെ നന്ദകുമാർ പരിപാടിയിൽ പങ്കെടുക്കുന്നതിനെതിരെയാണ് എസ്എഫ്ഐ, എംഎസ്എഫ്, കെഎസ്‌യു, എഐഎസ്എഫ് തുടങ്ങിയ വിദ്യാർഥി സംഘടനകൾ കനത്ത പ്രതിഷേധവുമായി രംഗത്തെത്തിയത്.
കേന്ദ്ര സർവകലാശാലയിൽ വിദ്യാർഥി പ്രതിഷേധം ഇരമ്പി; വന്ദേമാതരം സെമിനാർ നിർത്തിവെച്ചു; വിമർശനവുമായി ഗവർണർ
