തെഹ്‌റാന്‍: ശത്രുവിന്റെ ആക്രമണം തടയുന്നതിന് ആവശ്യമായിവന്നാല്‍ ഇറാന് മുന്‍കൂര്‍ സൈനിക നടപടികള്‍ സ്വീകരിക്കുമെന്ന് ഇറാന് സൈന്യം. മുന്‍പും ഇത്തരം നടപടികള്‍ സ്വീകരിച്ചിട്ടുണ്ടെന്നും ഭാവിയിലും ആവശ്യമെങ്കില്‍ അത് ആവര്‍ത്തിക്കുമെന്നും ഇറാന് സൈനിക വക്താവ് ബ്രിഗേഡിയര്‍ ജനറല്‍ മുഹമ്മദ് അക്രാമിനിയ പറഞ്ഞു.
യുദ്ധത്തിനിടയിലും സൈനിക ഉപകരണങ്ങളുടെ ഉത്പാദനം പ്രതിദിനം തുടരുകയാണെന്നും വലിയ ആയുധശേഖരത്തിന്റെ പിന്‍ബലത്തില്‍ ഏത് ആക്രമണത്തെയും നേരിടാന്‍ സൈന്യം സജ്ജമാണെന്നും ഫാര്‍സ് വാര്‍ത്താ ഏജന്‍സിക്ക് നല്‍കിയ അഭിമുഖത്തില്‍ അക്രാമിനിയ പറഞ്ഞു.
കഴിഞ്ഞ ഏതാനും മാസങ്ങളായി ഇറാന്റെ സൈനിക തന്ത്രം പ്രതിരോധ നിലപാടില്‍നിന്ന് ആക്രമണാത്മക സമീപനത്തിലേക്ക് മാറിയതായും ഈ മാറ്റം അതിവേഗം പുരോഗമിക്കുകയാണെന്നും അദ്ദേഹം പറഞ്ഞു.
അമേരിക്കയും ഇസ്രായേലും നയിച്ച യുദ്ധത്തില്‍ ഈ സൈനിക തന്ത്രമാണ് ഇറാന് പ്രയോഗിച്ചതെന്നും അദ്ദേഹം അവകാശപ്പെട്ടു. ഇതിന്റെ ഭാഗമായി ജോര്‍ദാനിലെ യു എസ് സൈനിക താവളത്തിന് നേരെ മിസൈല്‍ ആക്രമണം നടത്തിയതായും പ്രതിവിപ്ലവ, വിഘടനവാദ ഗ്രൂപ്പുകളുടെ താവളങ്ങള്‍ വ്യോമസേനാ യുദ്ധവിമാനങ്ങള്‍, സൈനിക ഡ്രോണുകള്‍, ഇസ്ലാമിക് റെവല്യൂഷനറി ഗാര്‍ഡ് കോര്‍പ്‌സിന്റെ (ഐ ആര്‍ ജി സി) ഡ്രോണുകളും മിസൈലുകളും ഉപയോഗിച്ച് പലതവണ ലക്ഷ്യമിട്ടതായും അക്രാമിനിയ പറഞ്ഞു.
ഇറാനെതിരെ വീണ്ടും ആക്രമണമുണ്ടായാല്‍ കൂടുതല്‍ ശക്തവും വിപുലവും നിര്‍ണായകവും വേഗത്തിലുള്ളതുമായ തിരിച്ചടി നല്‍കാന്‍ രാജ്യം സജ്ജമാണെന്നും അദ്ദേഹം വ്യക്തമാക്കി. ശത്രുവിന്റെ ആക്രമണം തടയുന്നതിന് ആവശ്യമായിവന്നാല്‍ ഭാവിയിലും മുന്‍കൂര്‍ സൈനിക നടപടികള്‍ സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.
യുദ്ധകാലത്തുടനീളം സൈനിക ഉപകരണങ്ങളുടെ ഉത്പാദനം ദിവസേന തുടര്‍ന്നുവെന്നും നിലവില്‍ വലിയ ആയുധശേഖരവും കൂടുതല്‍ യുദ്ധപരിചയവും സൈനികരുടെ ഉയര്‍ന്ന ആത്മവിശ്വാസവുമായാണ് ഇറാന് ഏത് ആക്രമണത്തെയും നേരിടാന്‍ ഒരുങ്ങുന്നതെന്നും അക്രാമിനിയ പറഞ്ഞു.
ഇറാന്റെ ആവശ്യങ്ങള്‍ അമേരിക്ക അംഗീകരിക്കുന്നതുവരെ ഹോര്‍മുസ് കടലിടുക്ക് അടച്ചിടുമെന്ന് ഇസ്ലാമിക് റെവല്യൂഷനറി ഗാര്‍ഡ് കോര്‍പ്‌സ് (ഐ ആര്‍ ജി സി) ഉപദേഷ്ടാവ് മുഹമ്മദ് റേസ നഖ്ദി പറഞ്ഞു.
ഹോര്‍മുസ് കടലിടുക്ക് അടച്ചിരിക്കുകയാണെന്നും സായുധസേനയ്ക്ക് കടലിടുക്കിന്മേല്‍ പൂര്‍ണ നിയന്ത്രണമുണ്ടെന്നും ഇറാന്റെ നിയമാനുസൃത ആവശ്യങ്ങള്‍ അംഗീകരിക്കുന്നതുവരെ ഈ സ്ഥിതി തുടരുമെന്നും ഫാര്‍സ് വാര്‍ത്താ ഏജന്‍സിയെ ഉദ്ധരിച്ച് അദ്ദേഹം പറഞ്ഞു.
കടത്തിക്കൊണ്ടുപോകുന്ന എണ്ണയുടെ അളവ് വളരെ കുറവാണെന്നും ചെറിയ ബോട്ടുകള്‍ ഉപയോഗിച്ചാണ് എണ്ണ ടാങ്കറുകളിലേക്ക് മാറ്റുന്നതെന്നും നഖ്ദി അവകാശപ്പെട്ടു.
എന്നാല്‍ ഹോര്‍മുസിന് ചുറ്റുമുള്ള കപ്പലുകള്‍ക്ക് നേരെയുള്ള ആക്രമണങ്ങള്‍ വര്‍ധിച്ചിട്ടും ഗള്‍ഫ് മേഖലയിലെ എണ്ണ കയറ്റുമതി അടുത്ത ആഴ്ചകളില്‍ ഗണ്യമായി പുന:രാരംഭിച്ചതായി സമുദ്രഗതാഗത വിദഗ്ധരും നിരീക്ഷകരും ചൂണ്ടിക്കാട്ടുന്നു.
സമുദ്രവ്യാപാര രഹസ്യാന്വേഷണ സ്ഥാപനമായ കെപ്ലറിന്റെ കണക്കുകള്‍ പ്രകാരം ഇറാനെ ഒഴികെയുള്ള ഗള്‍ഫ് മേഖലയിലെ എണ്ണ നീക്കം സെപ്റ്റംബറില്‍ യുദ്ധത്തിന് മുമ്പുണ്ടായിരുന്ന നിലവാരത്തിന്റെ 81 ശതമാനത്തിലേറെയായി തിരിച്ചെത്തി. കഴിഞ്ഞ മാസം 14 ദിവസങ്ങളില്‍ വിശാലമായ മിഡില്‍ ഈസ്റ്റ് മേഖലയില്‍ നിന്നുള്ള ക്രൂഡ് ഓയില്‍ കയറ്റുമതി യുദ്ധത്തിന് മുമ്പുള്ള നിലവാരത്തെയും മറികടന്നതായും കെപ്ലര്‍ റിപ്പോര്‍ട്ട് ചെയ്തു.
ഇറാന് നിയമവിരുദ്ധമെന്ന് കരുതുന്ന ഹോര്‍മുസ് കടലിടുക്കിലെ ചില ഗതാഗത പാതകള്‍ ഉടന്‍ പൂര്‍ണമായി അടച്ചിടുമെന്നും നഖ്ദി പറഞ്ഞു.
കടലിടുക്കിലെ പാറക്കെട്ടുകള്‍ തകര്‍ത്തും നശിപ്പിച്ചും ചിലര്‍ സൃഷ്ടിച്ച ഗതാഗത പാതകളാണ് ചെറിയ ബോട്ടുകള്‍ എണ്ണ കടത്താന്‍ ഉപയോഗിക്കുന്നതെന്നും ഇത്തരം പാതകള്‍ ഉടന്‍ അടയ്ക്കുമെന്നും ഐ ആര്‍ ജി സി ഉപദേഷ്ടാവ് വ്യക്തമാക്കി.
കടലിടുക്കിലൂടെയുള്ള ഗള്‍ഫ് എണ്ണനീക്കം യുദ്ധത്തിന് മുമ്പുണ്ടായിരുന്ന നിലയിലേക്ക് തിരിച്ചെത്തുകയാണെന്ന വിലയിരുത്തലുകള്‍ക്ക് വിരുദ്ധമാണ് നഖ്ദിയുടെ പ്രസ്താവന.