ഏഥന്‍സ്: ഹോര്‍മുസ് കടലിടുക്കിന്റെ പൂര്‍ണ നിയന്ത്രണം ഇറാന് നഷ്ടപ്പെട്ടെന്നും യുദ്ധത്തിന് മുമ്പുണ്ടായിരുന്ന അതേ അളവില്‍ എണ്ണയുടെ ഗതാഗതം പുനഃസ്ഥാപിച്ചെന്നും യു എസ് സ്റ്റേറ്റ് സെക്രട്ടറി മാര്‍ക്കോ റൂബിയോ.
ഗ്രീസില്‍ ബുധനാഴ്ച നടത്തിയ വാര്‍ത്താ സമ്മേളനത്തിലാണ് റൂബിയോ ഇക്കാര്യം വ്യക്തമാക്കിയത്. ഗ്രീക്ക് വിദേശകാര്യ മന്ത്രി ജോര്‍ജ് ജെറാപെട്രിറ്റിസിനൊപ്പം ഏഥന്‍സില്‍ നടത്തിയ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
ഹോര്‍മുസ് കടലിടുക്ക് തുറന്നുകിടക്കുകയാണെന്നും അതിലൂടെ ഇപ്പോള്‍ പുറത്തേക്ക് കടക്കുന്ന എണ്ണയുടെ അളവ്, കടലിടുക്ക് അടയ്ക്കുന്നതിന് മുമ്പ് പുറത്തേക്ക് പോയിരുന്ന അളവിന് തുല്യമാണെന്നും റൂബിയോ പറഞ്ഞു.
ആണവ പദ്ധതിയുമായി ബന്ധപ്പെട്ട് അമേരിക്കയുമായി ധാരണയിലെത്താന്‍ ഇറാന് ലഭിച്ച നിരവധി അവസരങ്ങള്‍ പ്രയോജനപ്പെടുത്തുന്നതില്‍ ഇറാന് പരാജയപ്പെട്ടെന്നും റൂബിയോ ആരോപിച്ചു.
ഹോര്‍മുസ് കടലിടുക്കില്‍ ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് വാണിജ്യ കപ്പലുകള്‍ക്കെതിരെ ആക്രമണം തുടരുന്ന സാഹചര്യത്തിലാണ് റൂബിയോയുടെ പ്രതികരണം.
ശക്തമായ സൈനിക ശേഷിയുടെ അടിസ്ഥാനത്തില്‍ മധ്യപൗരസ്ത്യ മേഖലയില്‍ സുരക്ഷ ഉറപ്പാക്കാനുള്ള കഴിവ് അമേരിക്കയ്ക്കുണ്ടെന്ന് റൂബിയോ വ്യക്തമാക്കി.
ഇറാന് ആണവായുധം സ്വന്തമാക്കുന്നത് ഒരിക്കലും അനുവദിക്കില്ലെന്ന അമേരിക്കയുടെ നിലപാട് അദ്ദേഹം ആവര്‍ത്തിച്ചു. മേഖലയില്‍നിന്ന് അമേരിക്കന്‍ സൈനികരെ പുറത്താക്കാനുള്ള ശ്രമമാണ് ഇറാന് നടത്തുന്നതെന്നും റൂബിയോ പറഞ്ഞു.
ആവശ്യമെങ്കില്‍ ഉപരോധത്തിലായ ഹോര്‍മുസ് കടലിടുക്കില്‍ അമേരിക്കയുമായി ഗ്രീസ് സഹകരിക്കുമെന്നും അദ്ദേഹം പറഞ്ഞു.
അമേരിക്ക ഏര്‍പ്പെടുത്തിയ ഉപരോധങ്ങളുടെ ഫലമായി ഇറാന്റെ സമ്പദ്വ്യവസ്ഥ വലിയ പ്രതിസന്ധിയിലേക്ക് നീങ്ങുകയാണെന്നും റൂബിയോ അവകാശപ്പെട്ടു.
ഇറാന് ആണവായുധം കൈവശം വയ്ക്കാന്‍ കഴിയില്ലെന്നും വിഷയം അവസാനിച്ചതായും അമേരിക്കയ്ക്ക് സ്വീകാര്യമായ ഒരു ധാരണയുണ്ടാകണമെങ്കില്‍ ഇറാന് ഒരിക്കലും ആണവായുധം സ്വന്തമാക്കില്ലെന്ന് ഉറപ്പാക്കുന്ന തരത്തിലുള്ളതായിരിക്കണം അതെന്നും റൂബിയോ പറഞ്ഞു.
ഇറാന് തങ്ങളുടെ പരമ്പരാഗത സൈനിക ശേഷി അത്രയും വലുതാക്കാന്‍ ശ്രമിക്കുകയാണെന്നും അതുവഴി രാജ്യത്തെ ആക്രമിക്കാനാകാത്ത സാഹചര്യം സൃഷ്ടിക്കാനാണ് ലക്ഷ്യമിടുന്നതെന്നും അദ്ദേഹം കൂട്ടിച്ചേര്‍ത്തു.
ഇതിനിടെ, അമേരിക്കയുടെ ആവശ്യങ്ങള്‍ അംഗീകരിച്ച് യുദ്ധം അവസാനിപ്പിക്കണമെങ്കില്‍ ഇറാന് ആണവ ഇന്ധന സമ്പുഷ്ടീകരണ ശേഷിയില്‍ പ്രധാനപ്പെട്ട കുറവ് വരുത്തണമെന്ന് യു എസ് വൈസ് പ്രസിഡന്റ് ജെ ഡി വാന്‍സ് പറഞ്ഞു.
അമേരിക്കന്‍ ആവശ്യങ്ങള്‍ അംഗീകരിക്കുന്ന ഏതൊരു കരാറിന്റെയും ഭാഗമായി ഇറാന് ആണവ ഇന്ധന സമ്പുഷ്ടീകരണ ശേഷി കുറയ്‌ക്കേണ്ടിവരുമെന്നും അലാസ്‌കയിലെ പ്രചാരണ യാത്രയ്ക്ക് ശേഷം നല്‍കിയ അഭിമുഖത്തില്‍ വാന്‍സ് വ്യക്തമാക്കി.
ആണവായുധം ആവശ്യമില്ലെങ്കില്‍ 60 ശതമാനം വരെ സമ്പുഷ്ടീകരിച്ച ഇന്ധനം എന്തിനാണെന്നും ആണവായുധം നിര്‍മിക്കില്ലെന്ന പ്രതിബദ്ധത തെളിയിക്കണമെങ്കില്‍, ഉയര്‍ന്ന തോതില്‍ സമ്പുഷ്ടീകരിച്ച ഇന്ധനം നിര്‍മിക്കരുതെന്നത് അടിസ്ഥാന നിബന്ധനയാണെന്നും വാന്‍സ് പറഞ്ഞു.
ആണവായുധം നിര്‍മിക്കില്ലെന്ന പ്രതിബദ്ധത ഇറാന് പ്രകടിപ്പിക്കാന്‍ ആഗ്രഹിക്കുന്നുവെങ്കില്‍ ആണവ ഇന്ധന സമ്പുഷ്ടീകരണ ശേഷിയില്‍ ഗണ്യമായ കുറവ് വരുത്തണമെന്നും വൈസ് പ്രസിഡന്റ് കൂട്ടിച്ചേര്‍ത്തു.