തിരുവനന്തപുരം: ആലപ്പുഴ നവകേരള യാത്രയ്ക്കിടെയുണ്ടായ 'രക്ഷാപ്രവർത്തനത്തിൽ' എഡിജിപി എംആർ അജിത് കുമാറിൻ്റെ പങ്ക് കൂടുതൽ വ്യക്തമാക്കി എസ്ഐടി. അജിത് കുമാറിൻ്റെ പേര് എടുത്തു പറഞ്ഞുള്ള തുടരന്വേഷണ റിപ്പോർട്ട് നൽകി. കൂടുതൽ തെളിവുകളും കൈമാറി. എസ്ഐടി വ്യക്തത വരുത്തിയത് അതി വേഗത്തിലാണ്. റിപ്പോർട്ട് ഉടൻ സർക്കാരിന് കൈമാറുമോ എന്നതിലാണ് ആകാംക്ഷ.
ആദ്യം റിപ്പോർട്ട് നൽകിയത് കഴിഞ്ഞ 23നാണ്. എന്നാൽ, എസ്ഐടി റിപ്പോർട്ട് കഴിഞ്ഞ ദിവസം ഡിജിപി മടക്കി അയച്ചിരുന്നു. റിപ്പോർട്ടിലെ ചില ഭാഗങ്ങളിലെ വ്യക്തതക്കായി തുടരന്വേഷണം ആവശ്യപ്പെട്ടാണ് മടക്കിയത്. എസ്ഐടിയോട് ഡിജിപി ചോദിച്ചത് അഞ്ച് സംശയങ്ങളാണ്. ഇക്കാര്യങ്ങളിൽ എസ്ഐടി തുടരന്വേഷണം നടത്തിയ ശേഷമാണ് ഇപ്പോൾ റിപ്പോർട്ട് സമർപ്പിച്ചിരിക്കുന്നത്. അജിത്ത് കുമാർ പൊലീസ് മേധാവിക്ക് നൽകിയ മറുപടിയിലും എസ്ഐടി റിപ്പോർട്ടിലും പൊരുത്തക്കേടുണ്ടായിരുന്നു. ഇതിലും വ്യക്തത വരുത്തിയിട്ടുണ്ട്.