ആലപ്പുഴ: മദ്യലഹരിയില്‍ ഭാര്യയുടെ മടിയിലിരുന്ന ഒരു വയസ്സുകാരിയായ മകളെ ബലമായി പിടിച്ചുവാങ്ങി തറയിലടിച്ച് കൊലപ്പെടുത്തിയതായി പിതാവിനെതിരെ ആരോപണം. മാവേലിക്കര കുറത്തിക്കാട് മങ്കാംകുഴിയിലാണ് സംഭവം. അസം സ്വദേശികളായ പരിതോഷ് മൊണ്ടേല്‍, റോണ്ട് വാലി ദമ്പതികളുടെ മകള്‍ ദീപികയാണ് മരിച്ചത്. സംഭവത്തില്‍ പിതാവ് പരിതോഷ് മൊണ്ടേലിനെ പൊലീസ് കസ്റ്റഡിയിലെടുത്തു.
ശനിയാഴ്ച രാത്രി പത്തരയോടെയാണ് കുട്ടിയെ മരിച്ച നിലയില്‍ ദമ്പതികള്‍ മാവേലിക്കര ജില്ലാ ആശുപത്രിയിലെത്തിച്ചത്. കുട്ടിയെ പരിശോധിച്ച ഡ്യൂട്ടി ഡോക്ടര്‍ ശരീരത്തില്‍ പരിക്കുകളുടെ പാടുകള്‍ കണ്ടെത്തി. മരണത്തില്‍ അസ്വാഭാവികത തോന്നിയതിനെ തുടര്‍ന്ന് ഡോക്ടര്‍ പൊലീസിനെ വിവരമറിയിക്കുകയായിരുന്നു. തുടര്‍ന്ന് നടത്തിയ അന്വേഷണത്തിലാണ് പിതാവിനെ പൊലീസ് കസ്റ്റഡിയിലെടുത്തത്. സംഭവത്തില്‍ കൂടുതല്‍ അന്വേഷണം നടന്നുവരികയാണ്.
മാതാവും കുട്ടികളും പരിതോഷ് മൊണ്ടേലും ഉൾപ്പെടെയുള്ളവർ 15 ദിവസം മുമ്പാണ് അസമിൽനിന്ന് കുറത്തിക്കാടുള്ള വാടകവീട്ടിൽ എത്തിയത്. മുൻപ് ഇയാൾ ഈ വീട്ടിൽ താമസിച്ചിരുന്നു. ഇതിനുശേഷമാണ് 15 ദിവസം മുൻപ് ഭാര്യയെയും കുട്ടികളെയും ഇവിടെ എത്തിച്ചത്. യുവതിയും പരിതോഷും ഒരുമിച്ചാണ് താമസിച്ചിരുന്നത്. നിയമപരമായി വിവാഹബന്ധമില്ല. അസമിൽ താമസിച്ച കാലത്തും ഇയാൾ യുവതിയെയും കുട്ടികളെയും നിരന്തരം ഉപദ്രവിച്ചതായാണ് വിവരം.
സംഭവത്തിൽ സംസ്ഥാന ബാലാവകാശ സംരക്ഷണ കമ്മിഷൻ സ്വമേധയാ കേസെടുത്തു. അസം ഗുവാഹട്ടി സ്വദേശി പരിതോഷ് മണ്ഡലാണ് കുട്ടിയെ കൊന്നതെന്നാണ് മാധ്യമവാർത്തകൾ. കൂടെയുള്ള മറ്റൊരു കുട്ടിയെ നാട്ടിലേക്ക് സുരക്ഷിതമായി എത്തിക്കുന്നത് ഉൾപ്പെടെയുള്ള നടപടികൾക്കായി അസം ബാലാവകാശ സംരക്ഷണ കമ്മിഷനുമായി ബന്ധപ്പെടുമെന്ന് കമ്മിഷൻ അറിയിച്ചു. ജില്ലാ പൊലീസ് മേധാവി, ജില്ലാ ശിശു സംരക്ഷണ ഓഫീസർ, തഴക്കര ഗ്രാമ പഞ്ചായത്ത് സെക്രട്ടറി എന്നിവരോട് കമ്മിഷൻ റിപ്പോർട്ട് ആവശ്യപ്പെട്ടിട്ടുണ്ട്.
ആലപ്പുഴയില്‍ ഒരു വയസ്സുകാരിയെ തറയിലടിച്ച് കൊലപ്പെടുത്തി; പിതാവ് കസ്റ്റഡിയില്‍
