കൊച്ചി: കോണ്ഗ്രസ് പുറത്താക്കിയ പാലക്കാട് എം എല് എ രാഹുല് മാങ്കൂട്ടത്തിലിന്, ലൈംഗിക പീഡനക്കേസില് താല്ക്കാലിക ആശ്വാസം. അറസ്റ്റ് തത്കാലത്തേക്ക് തടഞ്ഞ് ഹൈക്കോടതി.രാഹുവിന്റെ മുന്കൂര് ജാമ്യഹര്ജി ഡിസംബര് 15ന് പരിഗണിക്കും.
തിരുവനന്തപുരം പ്രിന്സിപ്പല് സെഷന്സ് കോടതി മുന്കൂര് ജാമ്യം നിഷേധിച്ചതിനു പിന്നാലെ മുന്കൂര് ജാമ്യാപേക്ഷയുമായി രാഹുല് ഹൈക്കോടതിയെ സമീപിക്കുകയായിരുന്നു. ജസ്ററിസ് കെ.ബാബുവിന്റേതാണ് ഇതുസംബന്ധിച്ച ഉത്തരവ്.
കേസില് വിശദമായ വാദം കേള്ക്കണമെന്ന് കോടതി വ്യക്തമാക്കി. കേസ് ഡയറി ഹാജരാക്കാനും കോടതി നിര്ദേശം നല്കിയിട്ടുണ്ട്.
തെറ്റൊന്നും ചെയ്തിട്ടില്ലെന്നും അന്വേഷണവുമായി സഹകരിക്കാന് തയ്യാറാണെന്നും, അറസ്റ്റുചെയ്താല് ജാമ്യത്തില് വിടണമെന്നുമാണ് ഹര്ജിയില് ബോധിപ്പിച്ചത്.
അതിജീവിതയായ മാധ്യമപ്രവര്ത്തകയുമായി അടുപ്പത്തിലായിരുന്നുവെന്ന് രാഹുല് സമ്മതിച്ചു. എന്നാല് സ്വകാര്യസംഭാഷണത്തിന്റെ വോയ്സ് ക്ലിപ്പുകള് സാമൂഹികമാധ്യമങ്ങളില് വന്നതോടെ പുറത്തുവിട്ടത് താനാണെന്നു സംശയിച്ച് പരാതിക്കാരി അകന്നെന്നും ഹര്ജിയില് പറയുന്നു.
വിവാഹിതയായിരുന്നെന്നും അകന്നുകഴിയുകയാണെന്നും അറിയാമായിരുന്നു. അതിനാല് വോയ്സ് ക്ലിപ്പുകള് ചോര്ന്നതുമായി ബന്ധപ്പെട്ട പരാതി ഇപ്പോള് ഉന്നയിക്കേണ്ടതില്ലെന്നായിരുന്നു രണ്ടുപേരും തീരുമാനിച്ചത്.
എന്നാല്, താന് രാഷ്ട്രീയപ്രവര്ത്തകനായതിനാല് മാധ്യമങ്ങള് വ്യാപകപ്രചാരണം നല്കി. എതിര്പക്ഷത്തുള്ളവര് നിലവിലെ രാഷ്ട്രീയസാഹചര്യം ഉപയോഗിച്ചു. ഇതോടെയാണ് പരാതിക്കാരി തന്നെ തള്ളിപ്പറയുന്നത്. സംഭാഷണത്തിന്റെ വിവരങ്ങള് തന്റെ പക്കലുണ്ടെന്നും പോലീസ് പിന്നാലെയുള്ളതിനാല് ഇത് ഹാജരാക്കാനാകുന്നില്ലെന്നും ഹര്ജിയില് പറയുന്നു.
വൈകിയുള്ള പരാതിയില് പ്രാഥമിക അന്വേഷണം നടത്തണമെന്ന് സുപ്രീംകോടതിതന്നെ പറഞ്ഞിട്ടുണ്ടെന്നും അന്വേഷണ ഉദ്യോഗസ്ഥനു മുന്പില് ഹാജരാകാന് അവസരം ലഭിച്ചാല് കാര്യങ്ങള് വിശദീകരിക്കാന് തയ്യാറാണെന്നും ഹര്ജിയില് വ്യക്തമാക്കിയിട്ടുണ്ട്.
തിരുവനന്തപുരം: യുവതിയെ ബലാത്സംഗം ചെയ്തുവെന്നും നിര്ബന്ധിച്ച് ഗര്ഭഛിദ്രത്തിന് വിധേയമാക്കിയെന്നുമുള്ള കേസിലെ പ്രതി രാഹുല് മാങ്കൂട്ടം എംഎല്എയുടെ അറസ്റ്റ് ഹൈക്കോടതി താല്ക്കാലികമായി തടഞ്ഞു. കേസ് 15ന് വീണ്ടും പരിഗണിക്കുന്നതുവരെ അറസ്റ്റ് ചെയ്യരുതെന്നാണ് ജസ്റ്റിസ് കെ ബാബു അധ്യക്ഷനായ സിംഗിള് ബെഞ്ച് ഉത്തരവിട്ടത്.
അറസ്റ്റുതടയണമെന്നാവശ്യപ്പെട്ട് രാഹുല് മാങ്കൂട്ടം മുമ്പ് നല്കിയ അപേക്ഷ സെഷന്സ് കോടതി തള്ളുകയും അറസ്റ്റ് ചെയ്യാമെന്ന് നിര്ദേശിക്കുകയും ചെയ്തിരുന്നു. ഇതിന് പിന്നാലെയാണ് രാഹുല് ഹൈക്കോടതിയെ സമീപിച്ചത്. അതിജീവിതയ്ക്ക് എതിരെ നല്കിയ തെളിവുകള് പരിഗണിച്ചില്ലെന്നു വാദിച്ചാണ് വീണ്ടും ജാമ്യാപേക്ഷ നല്കിയത്.
പത്ത് ദിവസമായി രാഹുല് ഒളിവിലാണ്. തമിഴ്നാട് കര്ണാടക അതിര്ത്തിയായ ഹൊസൂരിലും ബംഗളുരു നഗരത്തിന് പുറത്തുള്ള ആഡംബരവില്ലയിലും രാഹുല് മാങ്കൂട്ടത്തില് ഒളിവില് കഴിഞ്ഞതായി വിവരം ലഭിച്ചിരുന്നു. ഒളിവില് പോകാന് സഹായിച്ച ചിലരെ പൊലീസ് കസ്റ്റഡിയിലെടുത്ത് ചോദ്യം ചെയ്യുകയാണ്. രാഹുലിനെ രക്ഷപെടാന് സഹായിച്ച പാലക്കാട് ഓഫീസിലെ പേഴ്സണല് സ്റ്റാഫ് ഫസലിനെതിരെയും ഡ്രൈവര് ആല്ബിനെതിരെയും കേസെടുത്തു. ഇരുവരെയും കസ്റ്റഡിയിലെടുത്ത് ചോദ്യം ചെയ്ത ശേഷം ജാമ്യത്തില് വിട്ടയച്ചു.