തിരുവനന്തപുരം: ഈന്തപ്പഴം നിറച്ച പെട്ടിയില്‍ ഒളിപ്പിച്ച് ഒമാനില്‍ നിന്ന് വിമാനത്തില്‍ കടത്തിക്കൊണ്ടുവന്ന 1.26 കിലോ എംഡിഎംഎ തിരുവനന്തപുരം കല്ലമ്പലത്ത് സംസ്ഥാന പോലീസ് പിടികൂടി.
കടത്തിക്കൊണ്ടുവന്ന എംഡിഎംഎക്ക് മൂന്നു കോടിരൂപ വിലവരും. സംഭവവുമായി ബന്ധപ്പെട്ട് നാലുപേരെ അറസ്റ്റ് ചെയ്യുകയും ചെയ്തു. 17 ലിറ്റര്‍ വിദേശ മദ്യവും ഇവരുടെ പക്കല്‍ നിന്ന് പിടിച്ചെടുത്തു. കസ്റ്റംസിന്റെ പിടിയില്‍ പെടാതെ തിരുവനന്തപുരം അന്താരാഷ്ട്ര വിമാനത്താവളത്തിന് പുറത്തെത്തിയത് എങ്ങനെ എന്നതിനെക്കുറിച്ചും പൊലീസ് അന്വേഷിക്കുന്നു. വിമാനത്താവളത്തിന് പുറത്തുവച്ച് മയക്കുമരുന്ന് നിറച്ച ബാഗേജുകള്‍ പിക്ക് അപ്പ് വാനിലാക്കി കൊണ്ടുവരുമ്പോഴാണ് പിടികൂടിയത്.
നിരവധി മയക്കുമരുന്ന് കേസുകളില്‍ പ്രതിയായ വര്‍ക്കല സ്വദേശി സഞ്ജു എന്ന സൈജു (42), ഞെക്കാട് വലിയവിള സ്വദേശി നന്ദു (32), ഉണ്ണിക്കണ്ണന്‍ (39), പ്രവീണ്‍ (35) എന്നിവരാണ് അറസ്റ്റിലായത്. ഇവരെ റിമാന്‍ഡ് ചെയ്തു. ജില്ലയില്‍ വിതരണത്തിനാണ് എംഡിഎംഎ എത്തിച്ചത്. റൂറല്‍ എസ്പി സുദര്‍ശന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ബുധനാഴ്ച രാത്രി 11നാണ് പിടികൂടിയത്
ഈന്തപ്പഴം നിറച്ച പെട്ടികള്‍ക്കുള്ളില്‍ കറുത്ത കവറിലാണ് എംഡിഎംഎ സൂക്ഷിച്ചിരുന്നത്. മയക്കുമരുന്ന് മാഫിയയുടെ പ്രധാന കണ്ണിയാണ് സഞ്ജു. ഇയാളുടെ നേതൃത്വത്തില്‍ രാസലഹരി വിതരണം നടത്തുന്ന സംഘത്തെക്കുറിച്ച് പൊലീസിന് വിവരം ലഭിച്ചിരുന്നു.
ഒമാനില്‍ നിന്ന് മയക്കുമരുന്ന് കൊണ്ടുവന്നത് സഞ്ജുവും നന്ദുവുമാണ്. ഭാര്യയ്ക്കും രണ്ട് മക്കള്‍ക്കുമൊപ്പമായിരുന്നു സഞ്ജു. വിമാനത്താവളത്തില്‍ ഇവരെ സ്വീകരിക്കാന്‍ ഇന്നോവ കാറുമായി ഉണ്ണിക്കണ്ണനും പ്രവീണും എത്തി. ഒപ്പം വാടകയ്‌ക്കെടുത്ത പിക്ക്അപ്പ് വാനും. വിമാനത്താവളത്തിന് പുറത്ത് ബാഗേജുകള്‍ പിക്ക്അപ്പിലേക്ക് മാറ്റിയശേഷം എല്ലാവരും ഇന്നോവയില്‍ കയറി. ഇന്നോവ മുന്നിലും പിക്ക്അപ്പ് വാന്‍ പിന്നിലുമായി സഞ്ചരിക്കുമ്പോഴാണ് പിടിയിലായത്. മയക്കുമരുന്ന് കടത്തിനായാണ് ഇവര്‍ ഒമാനില്‍ പോയതെന്നാണ് സൂചന. സഞ്ജുവിന്റെ കുടുംബത്തെ തത്കാലം വിട്ടയച്ചു. ഇവര്‍ക്ക് കടത്തില്‍ പങ്കുണ്ടെന്ന് തെളിഞ്ഞാല്‍ അറസ്റ്റുചെയ്യുമെന്ന് പൊലീസ് പറഞ്ഞു.
ഒമാനില്‍ നിന്നെത്തിയ മൂന്ന് കോടിയുടെ എംഡിഎംഎ പിടികൂടി
