കോട്ടയം: മുന്‍ മുഖ്യമന്ത്രി ഉമ്മന്‍ചാണ്ടിയുടെ രണ്ടാം ചരമവാര്‍ഷികത്തോടനുബന്ധിച്ച് കെ പി സി സിയുടെ നേതൃത്വത്തില്‍ ജൂലൈ 18 വെള്ളിയാഴ്ച പുതുപ്പള്ളിയില്‍ വിപുലമായ അനുസ്മരണ പരിപാടി സംഘടിപ്പിക്കും. പുതുപ്പള്ളി പള്ളി മൈതാനത്ത് പ്രത്യേകം സജ്ജീകരിച്ച പന്തലില്‍ രാവിലെ 9ന് പുഷ്പാര്‍ച്ചനയോടെ ആരംഭിക്കുന്ന അനുസ്മരണയോഗം ലോക്‌സഭ പ്രതിപക്ഷ നേതാവ് രാഹുല്‍ഗാന്ധി ഉദ്ഘാടനം ചെയ്യും. കെ പി സി സി പ്രസിഡണ്ട് അഡ്വ. സണ്ണി ജോസഫ് അധ്യക്ഷത വഹിക്കും.
റോഡ് മാര്‍ഗം പുതുപ്പള്ളിയില്‍ എത്തിച്ചേരുന്ന രാഹുല്‍ ഗാന്ധി പള്ളിമുറ്റത്തെ ഉമ്മന്‍ചാണ്ടിയുടെ കല്ലറയില്‍ പുഷ്പാര്‍ച്ചന നടത്തിയതിന് ശേഷമാണ് അനുസ്മരണ യോഗത്തില്‍ പങ്കെടുക്കുക. യോഗത്തില്‍ യു ഡി എഫ് നേതാക്കളും വിവിധ മത മേലധ്യക്ഷന്മാരും സാമൂഹിക- സാംസ്‌കാരിക മേഖലയിലെ പ്രമുഖ വ്യക്തികളും പങ്കെടുക്കും.
സമ്മേളനത്തില്‍ ഉമ്മന്‍ചാണ്ടിയുടെ സ്മരണയ്ക്കായി കെ പി സി സി ആരംഭിക്കുന്ന സ്മൃതി തരംഗം ജീവകാരുണ്യ പദ്ധതിയുടെ ഉദ്ഘാടനവും ഉമ്മന്‍ചാണ്ടി ഫൗണ്ടേഷന്റെ നേതൃത്വത്തില്‍ നിര്‍മാണം പൂര്‍ത്തിയാക്കിയ 11 വീടുകളുടെ താക്കോല്‍ദാനവും ലഹരിക്കെതിരെ നടത്തുന്ന ക്യാമ്പയിനിന്റെ ഭാഗമായി നിര്‍മിക്കുന്ന രണ്ടാമത്തെ ഉമ്മന്‍ ചാണ്ടി സ്‌പോര്‍ട്‌സ് അരീന മീനടം സ്‌പോര്‍ട്‌സ് ടര്‍ഫിന്റെ നിര്‍മാണോദ്ഘാടനവും നടക്കും. 10,000 പേര്‍ക്ക് ഇരിക്കാവുന്ന പന്തലാണ് ചടങ്ങുകള്‍ക്കായി പള്ളി മൈതാനത്ത് ക്രമീകരിക്കുന്നത്.