കോഴിക്കോട്: കേരളത്തിലെ എംപിമാരുടെ പ്രവര്ത്തനം സംബന്ധിച്ച് സംവാദത്തിന് താന് തയ്യാറാണെന്ന് മുഖ്യമന്ത്രി പിണറായി വിജയന് വ്യക്തമാക്കി. എഐസിസി ജനറല് സെക്രട്ടറി കെ.സി. വേണുഗോപാല് ഉയര്ത്തിയ വെല്ലുവിളിക്കുള്ള മറുപടിയായിരുന്നു ഇത്. 'തീര്ച്ചയായും തയ്യാറാണ്; സമയം, സ്ഥലവും നിശ്ചയിച്ചാല് മതി,' എന്ന് മുഖ്യമന്ത്രി കോഴിക്കോട് മാധ്യമങ്ങളോട് പറഞ്ഞു.
കേരളത്തിലെ എംപിമാരുടെ പ്രവര്ത്തനങ്ങളെക്കുറിച്ച് തനിക്ക് മറച്ചുവയ്ക്കേണ്ട ഒന്നുമില്ലെന്നും, അവരുടെ പ്രവര്ത്തനം എന്താണെന്ന് പ്രത്യേകിച്ച് വിശദീകരിക്കേണ്ട സാഹചര്യമില്ലെന്നും മുഖ്യമന്ത്രി കൂട്ടിച്ചേര്ത്തു. അതിദാരിദ്ര്യമുക്ത സംസ്ഥാനമെന്ന വ്യാജേന കേരളത്തിന്റെ റേഷന് വിഹിതം പ്രശ്നത്തിലാക്കുന്ന തരത്തില് യുഡിഎഫ് എംപിമാര് പാര്ലമെന്റില് അനാവശ്യ ചോദ്യങ്ങള് ഉയര്ത്തിയതായും അദ്ദേഹം ആരോപിച്ചു.
'കേരളത്തെ അതിദാരിദ്ര്യമുക്തമെന്ന് പ്രഖ്യാപിച്ചതുകൊണ്ട് സംസ്ഥാനത്തെ മുഴുവന് എഎവൈ കാര്ഡുകള് റദ്ദാക്കുമോ എന്ന ചോദ്യത്തിന് പിന്നില് ദുരുദ്ദേശമായിരുന്നു,' എന്ന് മുഖ്യമന്ത്രി അഭിപ്രായപ്പെട്ടു. അന്ന് ആവശ്യമില്ലാതെ ഒരു പ്രചാരണം സൃഷ്ടിക്കാന് ചിലര് ശ്രമിക്കുകയും, കേന്ദ്ര സര്ക്കാരിന്റെ കേരളവിരുദ്ധ നിലപാടിന് പിന്തുണ നല്കുന്ന തരത്തിലായിരുന്നു യുഡിഎഫ് എംപിമാരുടെ സമീപനമെന്നും അദ്ദേഹം വിമര്ശിച്ചു.
കഴിഞ്ഞ ദിവസമാണ് കെ.സി. വേണുഗോപാല് മുഖ്യമന്ത്രിയെ സംവാദത്തിന് വെല്ലുവിളിച്ചത്. 'മുഖ്യമന്ത്രി നുണ പറയുന്നത് എന്തിന്? എല്ലാ വിവരങ്ങളും കിട്ടുന്നയാളല്ലേ? പാര്ലമെന്റില് കേരളവുമായി ബന്ധപ്പെട്ട വിഷയങ്ങള് ഇങ്ങനെ ഉയര്ത്തിയ കാലമില്ല. പാര്ലമെന്റിന്റെ വെബ്സൈറ്റ് പരിശോധിച്ചാല് മതി,' എന്നും അദ്ദേഹം പ്രസ്താവിച്ചിരുന്നു.
'കേരളത്തിന്റെ വികസന പ്രശ്നങ്ങള്ക്കും ജനജീവിതവുമായി ബന്ധപ്പെട്ട വിഷയങ്ങള്ക്കുമെല്ലാം ഞങ്ങള് ശബ്ദമുയര്ത്തിയിട്ടുണ്ട്. ഇതിനെക്കുറിച്ച് മുഖ്യമന്ത്രിയുടെ കൂടെ പരസ്യ സംവാദത്തിന് ഞാന് സന്നദ്ധനാണ്, എന്നും വേണുഗോപാല് പറഞ്ഞിരുന്നു.
എംപിമാരുടെ പ്രവര്ത്തനത്തെ കുറിച്ച് സംവാദത്തിന് തയ്യാര്; കെ.സി. വേണുഗോപാലിന്റെ വെല്ലുവിളി സ്വീകരിച്ച് മുഖ്യമന്ത്രി
