ന്യൂയോര്ക്ക്: ലോകപ്രശസ്ത കാര്ട്ടൂണ് പരമ്പരയായ 'ഡില്ബര്ട്ട്' കോമിക് സ്ട്രിപ്പിന്റെ സ്രഷ്ടാവായ കാര്ട്ടൂണിസ്റ്റ് സ്കോട്ട് ആഡംസ് അന്തരിച്ചു. 68 വയസ്സായിരുന്നു. പ്രോസ്റ്റേറ്റ് കാന്സറിനെ തുടര്ന്നായിരുന്നു അന്ത്യം.
അദ്ദേഹത്തിന്റെ മരണവാര്ത്ത മുന് ഭാര്യ ഷെല്ലി മൈല്സ് യൂട്യൂബ് ലൈവ് പരിപാടിയിലൂടെയാണ് സ്ഥിരീകരിച്ചത്.
1989-ല് ആരംഭിച്ച 'ഡില്ബര്ട്ട്' എന്ന കാര്ട്ടൂണ് സ്ട്രിപ്പിലൂടെയാണ് അദ്ദേഹം ആഗോളതലത്തില് ശ്രദ്ധിക്കപ്പെട്ടത്. കോര്പ്പറേറ്റ് ഓഫീസ് സംസ്കാരത്തെയും അവിടുത്തെ രസകരമായ സംഭവങ്ങളെയും ആക്ഷേപഹാസ്യ രൂപേണ അവതരിപ്പിക്കുന്നതില് അദ്ദേഹം മികവ് പുലര്ത്തിയിരുന്നു.
ജീവിതത്തിലെ വ്യംഗ്യവും സാമൂഹിക നിരീക്ഷണവും ഹാസ്യത്തിലൂടെ അവതരിപ്പിച്ച സ്കോട്ട് ആഡംസ് ആഗോളതലത്തില് കോടിക്കണക്കിന് വായനക്കാരെ സ്വാധീനിച്ചു. കാര്ട്ടൂണ് ലോകത്ത് അദ്ദേഹം നല്കിയ സംഭാവനകള് എന്നും സ്മരണീയമായിരിക്കും.
അമേരിക്കന് പ്രസിഡന്റ് ഡൊണാള്ഡ് ട്രംപിന്റെ ശക്തനായ പിന്തുണക്കാരനായിരുന്നു ആഡംസ്. ട്രംപ് സോഷ്യല് മീഡിയയിലൂടെ അദ്ദേഹത്തിന് ആദരാഞ്ജലികള് അര്പ്പിച്ചു. 'ധീരനായ ഒരു മനുഷ്യനായിരുന്നു സ്കോട്ട് ആഡംസ്, അദ്ദേഹം എന്നും സ്മരിക്കപ്പെടും,' ട്രംപ് കുറിച്ചു.
ക്യാന്സര് രോഗാവസ്ഥയെക്കുറിച്ച് തന്റെ യൂട്യൂബ് ചാനലായ 'റിയല് കോഫി വിത്ത് സ്കോട്ട് ആഡംസ്' വഴി അദ്ദേഹം സ്ഥിരമായി ആരാധകരുമായി സംവദിക്കാറുണ്ടായിരുന്നു.