റഷ്യന്‍ എണ്ണ വാങ്ങലുകള്‍ നിരോധിക്കാന്‍ ബില്‍ അവതരിപ്പിക്കും; യുക്രെയ്ന്‍ യുദ്ധത്തിന് റഷ്യയ്ക്ക് സാമ്പത്തിക സഹായം ലഭിക്കുമെന്ന ആശങ്ക
വാഷിങ്ടണ്‍: റഷ്യയില്‍നിന്നുള്ള എണ്ണ വാങ്ങലുകള്‍ തടയുന്നതിനായി യുഎസ് പ്രസിഡന്റ് ഡോണള്‍ഡ് ട്രംപിന്റെ നടപടിക്കെതിരെ കോണ്‍ഗ്രസില്‍ ബില്‍ അവതരിപ്പിക്കാനൊരുങ്ങി റിപ്പബ്ലിക്കന്‍ പ്രതിനിധി ബ്രയാന്‍ ഫിറ്റ്‌സ്പാട്രിക്. റഷ്യന്‍ ഡീസല്‍ കയറ്റുമതിക്കുള്ള നിയന്ത്രണങ്ങളില്‍ ഇളവ് വരുത്താനുള്ള ട്രംപിന്റെ തീരുമാനത്തെ ചോദ്യം ചെയ്താണ് നീക്കം. റഷ്യന്‍ എണ്ണയുടെ വില്‍പ്പനയിലൂടെ ലഭിക്കുന്ന വരുമാനം യുക്രെയ്‌നെതിരായ യുദ്ധത്തിന് ഉപയോഗിക്കപ്പെടാമെന്ന് നിയമനിര്‍മാതാക്കള്‍ ആശങ്കപ്പെടുന്നു.
പെന്‍സില്‍വാനിയയില്‍നിന്നുള്ള പ്രതിനിധിയും ഹൗസ് യുക്രെയ്ന്‍ കോക്കസിന്റെ സഹഅധ്യക്ഷനുമായ ഫിറ്റ്‌സ്പാട്രിക് ഒക്ടോബര്‍ 10നാണ് റൊണാള്‍ഡ് റീഗന്‍ പീസ് ത്രൂ സ്‌ട്രെങ്ത് ആക്ട് എന്ന പേരില്‍ ബില്‍ അവതരിപ്പിക്കുമെന്ന് പ്രഖ്യാപിച്ചത്. നെബ്രാസ്‌കയില്‍നിന്നുള്ള റിപ്പബ്ലിക്കന്‍ പ്രതിനിധി ഡോണ്‍ ബേക്കണ്‍ ബില്ലിന്റെ സഹപ്രായോജകനാകാന്‍ സമ്മതിച്ചിട്ടുണ്ട്. എന്നാല്‍ ഡെമോക്രാറ്റിക് പാര്‍ട്ടിയില്‍നിന്നുള്ള സഹപ്രായോജകനെ ഇതുവരെ പ്രഖ്യാപിച്ചിട്ടില്ല.
റഷ്യന്‍ എണ്ണയുടെ എല്ലാ വാങ്ങലുകളും തടയുന്നതിനുള്ള ഉഭയകക്ഷി നിയമനിര്‍മാണമാണ് ലക്ഷ്യമെന്ന് ഫിറ്റ്‌സ്പാട്രിക് എക്‌സില്‍ കുറിച്ചു. ബില്‍ സഭയുടെ പരിഗണനയിലെത്തിക്കാന്‍ ഡിസ്ചാര്‍ജ് പെറ്റീഷന്‍ നടപടിക്രമം ഉപയോഗിക്കുമെന്നും വന്‍ ഭൂരിപക്ഷത്തോടെ ബില്‍ പാസാകുമെന്നും അദ്ദേഹം അവകാശപ്പെട്ടു.
ബന്ധപ്പെട്ട സമിതിയുടെയോ സഭാ നേതൃത്വത്തിന്റെയോ അനുമതിയില്ലാതെ ഒരു ബില്‍ വോട്ടെടുപ്പിന് കൊണ്ടുവരാന്‍ ഡിസ്ചാര്‍ജ് പെറ്റീഷനിലൂടെ സാധിക്കും. ഇതിനായി ജനപ്രതിനിധിസഭയിലെ 218 അംഗങ്ങളുടെ ഒപ്പാണ് ആവശ്യമായത്.
എന്നാല്‍ നീക്കത്തിന് സമയപരിമിതികളുണ്ട്. കോണ്‍ഗ്രസ് വീണ്ടും വോട്ടെടുപ്പിനായി സമ്മേളിക്കാന്‍ ഏതാനും ആഴ്ചകള്‍ ശേഷിക്കെ, നിലവിലെ കോണ്‍ഗ്രസ് കാലാവധി ജനുവരിയില്‍ അവസാനിക്കും. ജനപ്രതിനിധിസഭയില്‍ പാസായാലും ബില്ലിന് സെനറ്റിന്റെ അംഗീകാരം ആവശ്യമാണ്. വൈറ്റ് ഹൗസിന്റെ എതിര്‍പ്പും ബില്ലിന്റെ മുന്നോട്ടുള്ള പ്രയാണത്തിന് തടസ്സമായേക്കാം.
മുന്‍ പ്രസിഡന്റ് റൊണാള്‍ഡ് റീഗന്റെ റഷ്യയോടുള്ള സമീപനത്തെ പരാമര്‍ശിച്ച ഫിറ്റ്‌സ്പാട്രിക്, യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കിക്കുള്ള കോണ്‍ഗ്രസിന്റെ പിന്തുണയും ആവര്‍ത്തിച്ചു. സെലെന്‍സ്‌കിക്കെതിരെ ട്രംപ് വീണ്ടും വിമര്‍ശനം ഉന്നയിച്ച പശ്ചാത്തലത്തിലാണ് ഈ പ്രതികരണം.
റഷ്യയാണ് യുക്രെയ്‌നെതിരായ യുദ്ധത്തിന് ഉത്തരവാദിയെന്നും യുക്രെയ്‌നില്‍ റഷ്യ നടത്തിയ അധിനിവേശം നിയമവിരുദ്ധമാണെന്നും ഫിറ്റ്‌സ്പാട്രിക് പറഞ്ഞു. യുക്രെയ്ന്‍ വിജയം നേടുന്നതുവരെ സെലെന്‍സ്‌കിക്കൊപ്പം കോണ്‍ഗ്രസും അമേരിക്കന്‍ ജനതയും നിലകൊള്ളുമെന്നും അദ്ദേഹം കൂട്ടിച്ചേര്‍ത്തു.