വാഷിങ്ടണ്‍: ഏഷ്യന്‍ സന്ദര്‍ശനത്തിനിടെ ഉത്തരകൊറിയന്‍ നേതാവ് കിം ജോങ് ഉന്നുമായി കൂടിക്കാഴ്ച നടത്തിയേക്കുമെന്ന് യുഎസ് പ്രസിഡന്റ് ഡോണള്‍ഡ് ട്രംപ്. നവംബറില്‍ ചൈനയില്‍ നടക്കുന്ന ഏഷ്യപസഫിക് സാമ്പത്തിക സഹകരണ (എപെക്) ഉച്ചകോടിക്കായി എത്തുമ്പോള്‍ കിമ്മിനെ കണ്ടേക്കുമോ എന്ന മാധ്യമപ്രവര്‍ത്തകരുടെ ചോദ്യത്തിന് 'സാധ്യതയുണ്ട്' എന്നായിരുന്നു ട്രംപിന്റെ മറുപടി. കിമ്മുമായി തനിക്ക് നല്ല ബന്ധമാണുള്ളതെന്നും അദ്ദേഹം പറഞ്ഞു.
നവംബര്‍ 18, 19 തീയതികളില്‍ ചൈനയിലെ ഷെന്‍ഷെനിലാണ് എപെക് ഉച്ചകോടി നടക്കുന്നത്. സന്ദര്‍ശനത്തിനിടെ കൂടിക്കാഴ്ച നടത്താന്‍ തീരുമാനിച്ചിട്ടുണ്ടോയെന്ന് അമേരിക്കയോ ഉത്തരകൊറിയയോ ഔദ്യോഗികമായി സ്ഥിരീകരിച്ചിട്ടില്ല. അതിനാല്‍ ട്രംപിന്റെ പ്രസ്താവന സാധ്യതയിലേക്കുള്ള സൂചന മാത്രമായാണ് വിലയിരുത്തപ്പെടുന്നത്.
ട്രംപിന്റെ ആദ്യ ഭരണകാലത്ത് ഇരുനേതാക്കളും മൂന്നു തവണ നേരിട്ട് കൂടിക്കാഴ്ച നടത്തിയിരുന്നു. 2018 ജൂണില്‍ സിംഗപ്പൂരിലായിരുന്നു ആദ്യ കൂടിക്കാഴ്ച. 2019 ഫെബ്രുവരിയില്‍ വിയറ്റ്‌നാമിലെ ഹാനോയിയില്‍ നടന്ന രണ്ടാം ഉച്ചകോടി ധാരണയിലെത്താതെ അവസാനിച്ചു. അതേ വര്‍ഷം ജൂണില്‍ കൊറിയന്‍ അതിര്‍ത്തിയിലെ പാന്‍മുന്‍ജോമില്‍ ഇരുവരും വീണ്ടും കണ്ടുമുട്ടി.
കഴിഞ്ഞ ഓഗസ്റ്റിലും ഈ വര്‍ഷം അവസാനത്തോടെ കിമ്മുമായി കൂടിക്കാഴ്ച നടത്താന്‍ ആഗ്രഹിക്കുന്നതായി ട്രംപ് വ്യക്തമാക്കിയിരുന്നു. ഉത്തരകൊറിയയുമായി നേരിട്ടുള്ള നയതന്ത്ര ബന്ധം നിലനിര്‍ത്തുന്നതിനുള്ള താല്‍പര്യവും അദ്ദേഹം ആവര്‍ത്തിച്ചിട്ടുണ്ട്.
ഉത്തരകൊറിയയുമായി ചര്‍ച്ച നടത്തുന്നത് അമേരിക്കയുടെ ഭാഗത്തുനിന്നുള്ള വിട്ടുവീഴ്ചയായി കാണുന്നില്ലെന്നും ദേശീയ താല്‍പര്യങ്ങള്‍ക്ക് ഗുണകരമാണെങ്കില്‍ പ്യോങ്‌യാങ്ങുമായി ചര്‍ച്ചയ്ക്ക് തയ്യാറാണെന്നും യുഎസ് സ്‌റ്റേറ്റ് ഡിപ്പാര്‍ട്ട്‌മെന്റ് വക്താവ് ടോമി പിഗോട്ട് നേരത്തേ വ്യക്തമാക്കിയിരുന്നു.
കൂടിക്കാഴ്ച നടന്നാല്‍ ഉത്തരകൊറിയയുടെ ആണവപദ്ധതി, ഉപരോധങ്ങള്‍, ഇരുരാജ്യങ്ങളും തമ്മിലുള്ള ബന്ധം തുടങ്ങിയ വിഷയങ്ങള്‍ ചര്‍ച്ചയില്‍ ഉയര്‍ന്നുവരാന്‍ സാധ്യതയുണ്ട്. എന്നാല്‍ കൂടിക്കാഴ്ചയുടെ തീയതിയോ അജണ്ടയോ സംബന്ധിച്ച് ഇതുവരെ ഔദ്യോഗിക പ്രഖ്യാപനമില്ല.
ട്രംപ്-കിം കൂടിക്കാഴ്ചയ്ക്ക് സാധ്യത; ഔദ്യോഗിക സ്ഥിരീകരണമില്ല
