വാഷിങ്ടണ്‍: ഇറാനെതിരെ വീണ്ടും വന്‍ സൈനിക നീക്കം നടത്താനുള്ള സാധ്യതകള്‍ പരിശോധിച്ച് അമേരിക്കന്‍ പ്രസിഡന്റ് ഡോണള്‍ഡ് ട്രംപ് ഭരണകൂടം. ഇറാനെതിരായ സൈനിക നടപടികളുടെ വിവിധ സാധ്യതകള്‍ സംബന്ധിച്ച് യുഎസ് സെന്‍ട്രല്‍ കമാന്‍ഡ് മേധാവി അഡ്മിറല്‍ ബ്രാഡ് കൂപ്പര്‍ വ്യാഴാഴ്ച വൈറ്റ് ഹൗസില്‍ ട്രംപിന് വിശദീകരണം നല്‍കിയതായി വാള്‍സ്ട്രീറ്റ് ജേണല്‍ റിപ്പോര്‍ട്ട് ചെയ്തു.
പ്രതിരോധ സെക്രട്ടറി പീറ്റ് ഹെഗ്‌സെത്ത്, ജോയിന്റ് ചീഫ്‌സ് ഓഫ് സ്റ്റാഫ് ചെയര്‍മാന്‍ ജനറല്‍ ഡാന്‍ കെയ്ന്‍ എന്നിവരും യോഗത്തില്‍ പങ്കെടുത്തു. മറ്റ് മന്ത്രിസഭാംഗങ്ങളും ചര്‍ച്ചകളില്‍ പങ്കെടുത്തതായാണ് വിവരം. ഇതിന് മുന്നോടിയായി ബുധനാഴ്ച വൈസ് പ്രസിഡന്റ് ജെ.ഡി. വാന്‍സുമായും സൈനിക ഉദ്യോഗസ്ഥര്‍ കൂടിക്കാഴ്ച നടത്തിയിരുന്നു.
ഇറാനെതിരെ വീണ്ടും സൈനിക നടപടി സ്വീകരിക്കാനുള്ള സാധ്യതയെക്കുറിച്ചുള്ള ചര്‍ച്ചകള്‍ പശ്ചിമേഷ്യയില്‍ ആശങ്ക വര്‍ധിപ്പിച്ചിട്ടുണ്ട്. അമേരിക്കന്‍ ഇടക്കാല തെരഞ്ഞെടുപ്പിന് ശേഷം ഹ്രസ്വവും ശക്തവുമായ സൈനിക നീക്കം നടത്താന്‍ തയ്യാറെടുക്കണമെന്ന് ഗള്‍ഫ് രാജ്യങ്ങളോട് ട്രംപ് ഭരണകൂടത്തിലെ ഉദ്യോഗസ്ഥര്‍ നിര്‍ദേശിച്ചതായും റിപ്പോര്‍ട്ടുകളുണ്ട്.
കഴിഞ്ഞയാഴ്ച നടന്ന പൊതുപരിപാടിയില്‍ ഇറാനെതിരെ വീണ്ടും ആക്രമണം നടത്താനുള്ള സാധ്യത ട്രംപ് പരാമര്‍ശിച്ചിരുന്നു. 'എപ്പിക് ഫ്യൂറി' എന്ന പേരില്‍ നേരത്തെ നടത്തിയ അമേരിക്കന്‍-ഇസ്രായേല്‍ വ്യോമാക്രമണത്തെ പരാമര്‍ശിച്ചുകൊണ്ട്, 'നമുക്ക് വീണ്ടും ഒരു ചെറിയ എപ്പിക് ഫ്യൂറി നടത്തേണ്ടിവന്നേക്കാം. അല്ലെങ്കില്‍ അവര്‍ സമ്മതിക്കും' എന്നായിരുന്നു ട്രംപിന്റെ പ്രതികരണം.
അതേസമയം, നയതന്ത്ര ചര്‍ച്ചകള്‍ പുനരാരംഭിക്കാനുള്ള ശ്രമങ്ങളും നടക്കുന്നുണ്ട്. ഇറാനിലെ ശക്തനായ കടുത്ത നിലപാടുകാരനായ ഒരു നേതാവുമായി വൈസ് പ്രസിഡന്റ് ജെ.ഡി. വാന്‍സ് സമാധാന ചര്‍ച്ചകള്‍ പുനരുജ്ജീവിപ്പിക്കാന്‍ ബന്ധപ്പെട്ടതായും വാള്‍സ്ട്രീറ്റ് ജേണല്‍ റിപ്പോര്‍ട്ട് ചെയ്തു.
ആക്രമണമുണ്ടായാല്‍ തിരിച്ചടിക്കുമെന്ന് ഇറാന്‍
അമേരിക്ക വീണ്ടും ആക്രമണം നടത്തിയാല്‍ പശ്ചിമേഷ്യയിലെ വിവിധ അമേരിക്കന്‍ സൈനിക കേന്ദ്രങ്ങള്‍ക്കും ഗള്‍ഫ് രാജ്യങ്ങളിലെ ലക്ഷ്യങ്ങള്‍ക്കും നേരെ തിരിച്ചടി നല്‍കുമെന്ന് ഇറാന്‍ മുന്നറിയിപ്പ് നല്‍കിയിട്ടുണ്ട്. ഭൂഗര്‍ഭ കേന്ദ്രങ്ങളില്‍ സംഭരിച്ചിരുന്ന ഘടകങ്ങള്‍ ഉപയോഗിച്ച് ബാലിസ്റ്റിക് മിസൈല്‍ നിര്‍മാണം പുനരാരംഭിച്ചതായും റിപ്പോര്‍ട്ടുകളുണ്ട്. മേഖലയിലെ അമേരിക്കന്‍ സൈനികര്‍ക്കെതിരായ നീക്കങ്ങളും ഇറാന്‍ ശക്തമാക്കിയതായി സൂചനകളുണ്ട്.
മിഡില്‍ ഈസ്റ്റില്‍ സൈനിക സന്നാഹം ശക്തമാക്കി അമേരിക്ക
സാധ്യമായ സൈനിക നീക്കത്തിന്റെ മുന്നൊരുക്കമായി പശ്ചിമേഷ്യയിലേക്ക് കൂടുതല്‍ വ്യോമപ്രതിരോധ സംവിധാനങ്ങളും വെടിക്കോപ്പുകളും മറ്റ് സൈനിക സാമഗ്രികളും അമേരിക്ക എത്തിച്ചുകൊണ്ടിരിക്കുകയാണ്. ആക്രമണസാധ്യത കൂടുതലുള്ളതായി വിലയിരുത്തുന്ന ചില സൈനിക താവളങ്ങളില്‍നിന്ന് സൈനികരെ മാറ്റുകയും ചെയ്തിട്ടുണ്ട്.
ഇസ്രായേലിന്റെ മിസൈല്‍ പ്രതിരോധ ശേഷി വര്‍ധിപ്പിക്കുന്നതിനായി അധിക പാട്രിയറ്റ് മിസൈല്‍ പ്രതിരോധ സംവിധാനം കൂടി വിന്യസിക്കാന്‍ അമേരിക്കന്‍ സൈന്യം നടപടികള്‍ ആരംഭിച്ചിട്ടുണ്ട്.
അമേരിക്കയില്‍ രാഷ്ട്രീയ എതിര്‍പ്പും
ഇറാനെതിരെ വീണ്ടും സൈനിക നടപടി സ്വീകരിക്കാനുള്ള നീക്കത്തിനെതിരെ അമേരിക്കന്‍ രാഷ്ട്രീയ നേതൃത്വത്തില്‍നിന്നും വിമര്‍ശനമുയരുന്നുണ്ട്. ഡെമോക്രാറ്റിക് സെനറ്റര്‍ ക്രിസ് മര്‍ഫി ഇത്തരം നീക്കങ്ങളെ 'ഭ്രാന്തമായ പദ്ധതി' എന്നാണ് വിശേഷിപ്പിച്ചത്. ഇത് മേഖലയിലെ സംഘര്‍ഷം അതിരൂക്ഷമാക്കുമെന്നും നിയമവാഴ്ചയോടുള്ള അമേരിക്കയുടെ പ്രതിബദ്ധതയെ തകര്‍ക്കാന്‍ സാധ്യതയുണ്ടെന്നും അദ്ദേഹം മുന്നറിയിപ്പ് നല്‍കി.
വൈറ്റ് ഹൗസിലെ നിര്‍ണായക ചര്‍ച്ചകളും പശ്ചിമേഷ്യയിലെ സൈനിക വിന്യാസവും ഇറാനെതിരായ അമേരിക്കയുടെ അടുത്ത നീക്കങ്ങളെക്കുറിച്ചുള്ള ആശങ്ക വര്‍ധിപ്പിക്കുകയാണ്. എന്നാല്‍ ആക്രമണത്തിന് അന്തിമ തീരുമാനമെടുത്തതായി ഔദ്യോഗിക സ്ഥിരീകരണമില്ല.
ഇറാനെതിരെ വീണ്ടും സൈനിക നീക്കത്തിന് ട്രംപ്? വൈറ്റ് ഹൗസില്‍ നിര്‍ണായക ചര്‍ച്ച; മിഡില്‍ ഈസ്റ്റില്‍ പ്രതിരോധം ശക്തമാക്കി പെന്റഗണ്‍
