മിനിയാപ്പൊളിസ്: മിനിയാപ്പൊളിസില് ഇമിഗ്രേഷന് ആന്ഡ് കസ്റ്റംസ് എന്ഫോഴ്സ്മെന്റ് (ICE) ഉദ്യോഗസ്ഥന്റെ വെടിയേറ്റ് റിനി ഗുഡ് എന്ന 37 വയസ്സുകാരി കൊല്ലപ്പെട്ട സംഭവത്തില് പൗരാവകാശ ലംഘനം സംബന്ധിച്ച ക്രിമിനല് അന്വേഷണം നടത്താന് നിലവില് യാതൊരു അടിസ്ഥാനവുമില്ലെന്ന് യുഎസ് നീതിന്യായ വകുപ്പ് (DOJ) അറിയിച്ചു. ഡെപ്യൂട്ടി അറ്റോര്ണി ജനറല് ടോഡ് ബ്ലാഞ്ചിന്റെ പ്രസ്താവനയാണ് പ്രതിഷേധങ്ങള് ശക്തമാകുന്ന സാഹചര്യത്തില് പുറത്ത് വന്നത്.
കഴിഞ്ഞ ബുധനാഴ്ച പുലര്ച്ചെ നടന്ന സംഭവത്തില്, നിയമസംരക്ഷണ ഉദ്യോഗസ്ഥരെ കാറിടിപ്പിച്ച് പരിക്കേല്പ്പിക്കാന് ശ്രമിച്ചുവെന്നാരോപിച്ചാണ് ഐസ് ഉദ്യോഗസ്ഥന് വെടിവെച്ചതെന്ന് ആഭ്യന്തര സുരക്ഷാ വകുപ്പ് വിശദീകരിച്ചിരുന്നത്. എന്നാല് ഈ വാദം പ്രാദേശിക ഭരണകൂടവും സംസ്ഥാന തലത്തിലെ ഉദ്യോഗസ്ഥരും ചോദ്യം ചെയ്തതോടെ സംഭവം ദേശീയതലത്തില് വലിയ വിവാദമായി മാറി.
പ്രതിഷേധങ്ങള്ക്കും വിമര്ശനങ്ങള്ക്കും മറുപടിയായി പ്രസിഡന്റ് ഡോണള്ഡ് ട്രംപ് വീണ്ടും കടുത്ത ഭാഷയിലാണ് പ്രതികരിച്ചത്. മിനസോട്ടയില് തന്റെ കുടിയേറ്റ നയങ്ങള് ശക്തമായി നടപ്പാക്കുമെന്ന് ആവര്ത്തിച്ച അദ്ദേഹം, ഐസിനെ വിമര്ശിക്കുന്ന ഡെമോക്രാറ്റുകളെ കടന്നാക്രമിച്ചു. വെടിവെപ്പിന് പിന്നാലെ നടന്ന പ്രതിഷേധങ്ങളെ 'നാടകീയ കലാപങ്ങള്' എന്നും ട്രംപ് വിശേഷിപ്പിച്ചു. കൂടാതെ, അഭയനഗരങ്ങള് പ്രഖ്യാപിച്ച നഗരങ്ങള്ക്കും സംസ്ഥാനങ്ങള്ക്കും ഫെഡറല് ഫണ്ടുകള് തടഞ്ഞുവയ്ക്കുമെന്നും അദ്ദേഹം പ്രഖ്യാപിച്ചു. ഇതുസംബന്ധിച്ച നടപടി നേരത്തെ ഒരു ഫെഡറല് ജഡ്ജി തടഞ്ഞിരുന്നുവെങ്കിലും, ട്രംപ് ഭരണകൂടം അപ്പീല് നല്കിയിട്ടുണ്ട്.
ഇതിനിടെ, സൊമാലിയന് കുടിയേറ്റക്കാര്ക്ക് അനുവദിച്ചിരുന്ന ടെംപററി പ്രൊട്ടക്ടഡ് സ്റ്റാറ്റസ് (TPS) അവസാനിപ്പിക്കാനുള്ള ഭരണകൂട തീരുമാനത്തിനെതിരെ മിനിയാപ്പൊളിസിലെ മിനസോട്ട നിയമസഭാംഗങ്ങള് ശക്തമായി രംഗത്തെത്തി. പതിറ്റാണ്ടുകളായി തുടരുന്ന ഇരുകക്ഷി മാനവിക നയങ്ങളില് നിന്നുള്ള വലിയ വിട്ടുമാറലാണിതെന്ന് അവര് കുറ്റപ്പെടുത്തി. TPS അവസാനിപ്പിക്കുന്നത് വിദേശരാജ്യങ്ങളിലെ യാഥാര്ഥ്യങ്ങള് മാറ്റില്ലെന്നും, മറിച്ച് കുടുംബങ്ങളെ ഛിന്നഭിന്നമാക്കുകയും സമൂഹങ്ങളില് ഭീതി സൃഷ്ടിക്കുകയും ചെയ്യുമെന്ന് പ്രതിനിധികള് വ്യക്തമാക്കി.
ഡെട്രോയിറ്റില് നടത്തിയ പ്രസംഗത്തില് ട്രംപ് സൊമാലിയന് വംശജരായ അമേരിക്കന് പൗരന്മാരെ കുറിച്ചും കടുത്ത പരാമര്ശം നടത്തി. തട്ടിപ്പ് കേസുകളില് കുറ്റക്കാരായതായി കണ്ടെത്തുന്ന നാചുറലൈസ്ഡ് പൗരന്മാരുടെ പൗരത്വം റദ്ദാക്കി നാടുകടത്തുമെന്ന് അദ്ദേഹം ഭീഷണി മുഴക്കി. ഇത് സൊമാലിയന് സമൂഹത്തില് കൂടുതല് ആശങ്കയും പ്രതിഷേധവും ഉയര്ത്തിയിട്ടുണ്ട്.
റിനി ഗുഡിന്റെ മരണവുമായി ബന്ധപ്പെട്ട അന്വേഷണത്തിന്റെ ദിശയെച്ചൊല്ലി മിനിയാപ്പൊളിസില് കുറഞ്ഞത് നാല് ഫെഡറല് പ്രോസിക്യൂട്ടര്മാര് രാജിവച്ചതായും റിപ്പോര്ട്ടുണ്ട്. റിനി ഗുഡിനെതിരേ പ്രതിഷേധസംഘടനകളുമായുള്ള ബന്ധം പരിശോധിക്കുന്നതിലേക്കാണ് അന്വേഷണം വഴിതിരിച്ചുവിടുന്നതെന്ന ആശങ്കയാണ് രാജിക്ക് കാരണമെന്നാണ് വിവരം. സംഭവത്തില് വെടിവെച്ച ഐസ് ഉദ്യോഗസ്ഥനെ കുറിച്ചുള്ള അന്വേഷണ വിവരങ്ങള് എഫ്ബിഐ പങ്കുവയ്ക്കാത്തതിലും സംസ്ഥാന, പ്രാദേശിക ഭരണകൂടങ്ങള് അതൃപ്തി പ്രകടിപ്പിച്ചിട്ടുണ്ട്.
അതേസമയം, മിനസോട്ട ഗവര്ണര് ടിം വാള്സ്, യുഎസ് അറ്റോര്ണി ഓഫീസില് നിന്നുള്ള രാജികളോട് പ്രതികരിച്ച്, നീതിന്യായ വകുപ്പില് നിന്നുള്ള പക്ഷപാതരഹിതരായ കരിയര് ഉദ്യോഗസ്ഥരെ ട്രംപ് ഭരണകൂടം പുറത്താക്കുകയാണെന്ന് ആരോപിച്ചു. ഇത് സംസ്ഥാനത്തിന് വലിയ നഷ്ടമാണെന്നും അദ്ദേഹം പറഞ്ഞു.
വെടിവെപ്പ്, കുടിയേറ്റ നയം, ഫെഡറല് അന്വേഷണങ്ങള്-എല്ലാം ചേര്ന്ന് മിനിയാപ്പൊളിസിലെ സംഭവങ്ങള് അമേരിക്കന് രാഷ്ട്രീയത്തിലും സാമൂഹികാന്തരീക്ഷത്തിലും വലിയ ചലനങ്ങളാണ് സൃഷ്ടിക്കുന്നത്. പ്രതിഷേധങ്ങളും ഭരണകൂടത്തിന്റെ കടുത്ത നിലപാടുകളും തുടരുന്ന സാഹചര്യത്തില്, റിനി ഗുഡിന്റെ മരണത്തെ ചുറ്റിയുള്ള വിവാദം ഇനിയും കത്തിക്കൊണ്ടിരിക്കാനാണ് സാധ്യത.
മിനിയാപ്പൊളിസിലെ ഐസ് വെടിവെപ്പ്: പൗരാവകാശ ലംഘനത്തിന്റെ പേരില് അന്വേഷണമില്ലെന്ന് നീതിന്യായ വകുപ്പ്
