അമേരിക്കയില്‍ ഇടക്കാല തിരഞ്ഞെടുപ്പുകള്‍ക്ക് മുന്നോടിയായി ഡെമോക്രാറ്റിക് പാര്‍ട്ടിക്കെതിരെ രൂക്ഷമായ രാഷ്ട്രീയ മുന്നറിയിപ്പുമായി ശതകോടീശ്വരനും ടെസ്‌ല, സ്‌പേസ് എക്‌സ് മേധാവിയുമായ ഇലോണ്‍ മസ്‌ക്. 2028ലെ തിരഞ്ഞെടുപ്പില്‍ പ്രസിഡന്‍സി, ജനപ്രതിനിധിസഭ, സെനറ്റ് എന്നിവയില്‍ ഡെമോക്രാറ്റുകള്‍ ഒരേസമയം വിജയം നേടിയാല്‍ രാജ്യത്ത് ജനാധിപത്യത്തിന്റെ അന്ത്യത്തിന് വഴിയൊരുങ്ങുമെന്നാണ് മസ്‌കിന്റെ വാദം. വാഷിങ്ടണ്‍ ഡിസിക്കും പ്യൂര്‍ട്ടോ റിക്കോയ്ക്കും സംസ്ഥാന പദവി നല്‍കുക, രാജ്യത്ത് അനധികൃതമായി കഴിയുന്ന കുടിയേറ്റക്കാര്‍ക്ക് നിയമപരമായ പദവി നല്‍കുക, സുപ്രീംകോടതിയിലെ ജഡ്ജിമാരുടെ എണ്ണം വര്‍ധിപ്പിക്കുക എന്നിവയാണ് ഡെമോക്രാറ്റുകള്‍ അധികാരം ഉറപ്പിക്കാന്‍ സ്വീകരിച്ചേക്കാവുന്ന മൂന്ന് നടപടികളായി അദ്ദേഹം ചൂണ്ടിക്കാട്ടിയത്.
സാമൂഹിക മാധ്യമമായ എക്‌സിലെ കുറിപ്പിലാണ് മസ്‌ക് ഈ ആശങ്കകള്‍ പങ്കുവെച്ചത്. വാഷിങ്ടണ്‍ ഡിസിക്കും പ്യൂര്‍ട്ടോ റിക്കോയ്ക്കും സംസ്ഥാന പദവി നല്‍കിയാല്‍ സെനറ്റില്‍ ഡെമോക്രാറ്റുകള്‍ക്ക് കൂടുതല്‍ സീറ്റുകള്‍ ലഭിക്കുമെന്നാണ് അദ്ദേഹത്തിന്റെ വിലയിരുത്തല്‍. കുടിയേറ്റ നയങ്ങളില്‍ ഇളവ് വരുത്തുന്നതും കൂടുതല്‍ കുടിയേറ്റക്കാര്‍ക്ക് നിയമപരമായ പദവി നല്‍കുന്നതും പാര്‍ട്ടിക്ക് ദീര്‍ഘകാല തിരഞ്ഞെടുപ്പ് നേട്ടമുണ്ടാക്കുമെന്നും അദ്ദേഹം ആരോപിച്ചു. സുപ്രീംകോടതിയിലെ ജഡ്ജിമാരുടെ എണ്ണം വര്‍ധിപ്പിച്ച് കോടതിയില്‍ അനുകൂല ഭൂരിപക്ഷം ഉറപ്പിക്കാനും ഡെമോക്രാറ്റുകള്‍ ശ്രമിക്കുമെന്നാണ് മസ്‌കിന്റെ മറ്റൊരു മുന്നറിയിപ്പ്. ഇത്തരം നടപടികള്‍ അമേരിക്കയെ സ്ഥിരമായ ഏകകക്ഷി ഭരണത്തിലേക്ക് നയിക്കുമെന്നും ജനാധിപത്യത്തിന്റെ അര്‍ഥം തന്നെ ഇല്ലാതാക്കുമെന്നും അദ്ദേഹം അവകാശപ്പെട്ടു.
2028ലെ തിരഞ്ഞെടുപ്പിനു ശേഷം സെനറ്റില്‍ റിപ്പബ്ലിക്കന്‍മാര്‍ക്ക് കുറഞ്ഞത് 51 സീറ്റുകളെങ്കിലും നിലനിര്‍ത്തേണ്ടത് അനിവാര്യമാണെന്നും അതിനാല്‍ ഇത്തവണ റിപ്പബ്ലിക്കന്‍ സെനറ്റ് സ്ഥാനാര്‍ഥികള്‍ക്ക് വോട്ട് ചെയ്യണമെന്നും മസ്‌ക് ആഹ്വാനം ചെയ്തു. റിപ്പബ്ലിക്കന്‍ പാര്‍ട്ടിയുടെ തിരഞ്ഞെടുപ്പ് പ്രചാരണങ്ങള്‍ക്കായി വന്‍തുക ചെലവഴിക്കുന്നതിനിടെയാണ് അദ്ദേഹത്തിന്റെ പരാമര്‍ശം. കഴിഞ്ഞ മൂന്ന് മാസത്തിനിടെ റിപ്പബ്ലിക്കന്‍ അനുകൂല രാഷ്ട്രീയ സംഘടനകള്‍ക്ക് 27.6 കോടി ഡോളര്‍ നല്‍കിയതായി മസ്‌കിന്റെ അമേരിക്ക പി എ സി പ്രതിനിധി ഫോക്‌സ് ന്യൂസിനോട് സ്ഥിരീകരിച്ചതായി റിപ്പോര്‍ട്ടില്‍ പറയുന്നു. ഇതില്‍ 15.8 കോടി ഡോളര്‍ സെനറ്റ് ലീഡര്‍ഷിപ്പ് ഫണ്ടിനും ഒരു കോടി ഡോളര്‍ ടെക്‌സസിലെ റിപ്പബ്ലിക്കന്‍ സെനറ്റ് സ്ഥാനാര്‍ഥി കെന്‍ പാക്സ്റ്റണെ പിന്തുണയ്ക്കുന്ന ലോണ്‍ സ്റ്റാര്‍ ലിബര്‍ട്ടി പിഎസിക്കുമാണ് നല്‍കിയതെന്നാണ് വിവരം.
മസ്‌കിന്റെ രാഷ്ട്രീയ സാമ്പത്തിക ഇടപെടലുകളെ മുന് അമേരിക്കന്‍ സ്‌റ്റേറ്റ് സെക്രട്ടറി ഹിലരി ക്ലിന്റണ്‍ വിമര്‍ശിച്ചു. തന്റെ സമ്പത്ത് ഉപയോഗിച്ച് ഇടക്കാല തിരഞ്ഞെടുപ്പില്‍ റിപ്പബ്ലിക്കന്‍മാര്‍ക്ക് അനുകൂലമായി സ്വാധീനം ചെലുത്താനാണ് മസ്‌ക് ശ്രമിക്കുന്നതെന്നാണ് ക്ലിന്റന്റെ ആരോപണം. തിരഞ്ഞെടുപ്പ് പ്രചാരണങ്ങളിലെ വന്‍ സാമ്പത്തിക ഇടപെടലുകളും കുടിയേറ്റം, സുപ്രീംകോടതി, സംസ്ഥാന പദവി തുടങ്ങിയ വിഷയങ്ങളിലെ നയപരമായ ഭിന്നതകളും അമേരിക്കന്‍ രാഷ്ട്രീയത്തില്‍ വീണ്ടും ചര്‍ച്ചയാകുകയാണ്. മസ്‌ക് മുന്നോട്ടുവച്ച ആശങ്കകള്‍ അദ്ദേഹത്തിന്റെ രാഷ്ട്രീയ വിലയിരുത്തലുകളാണെന്നും അവ ഡെമോക്രാറ്റുകളുടെ പ്രഖ്യാപിത നയങ്ങളായി കാണാനാവില്ലെന്നും ശ്രദ്ധിക്കേണ്ടതുണ്ട്.
ഡെമോക്രാറ്റുകള്‍ക്ക് വാഷിങ്ടണില്‍ സമ്പൂര്‍ണ നിയന്ത്രണം ലഭിച്ചാല്‍ ജനാധിപത്യം അവസാനിക്കുമെന്ന് മസ്‌കിന്റെ മുന്നറിയിപ്പ്; മൂന്ന് നീക്കങ്ങള്‍ ചൂണ്ടിക്കാട്ടി
