വാഷിംഗ്ടണ്‍: ഞായറാഴ്ച കൊളറാഡോയിലെ ബൗള്‍ഡറില്‍ ഇസ്രായേല്‍ അനുകൂല റാലിക്കു നേരെ നടന്ന ആക്രമണസംഭവത്തെക്കുറിച്ച് ഡൊണാള്‍ഡ് ട്രംപ് ട്രൂത്ത് സോഷ്യലില്‍ പ്രതികരിച്ചു. പ്രതിയെ നാടുകടത്തണമെന്ന് ട്രംപ് ആവശ്യപ്പെട്ടു. ബൈഡന്‍ ഭരണകൂടത്തിന്റെ കുടിയേറ്റ നയങ്ങളെ ആക്രമണവുമായി ബന്ധപ്പെടുത്തിയാണ് അദ്ദേഹം വിമര്‍ശിച്ചത്.
കൊളറാഡോയിലെ ബൗള്‍ഡറില്‍ നടന്ന ഭീകരമായ ആക്രമണം യു എസ് എയില്‍ സഹിക്കില്ലെന്ന് ട്രംപ് എഴുതി. ബൈഡന്റെ പരിഹാസ്യമായ തുറന്ന അതിര്‍ത്തി നയത്തിലൂടെയാണ് അക്രമി വന്നത്, അത് നമ്മുടെ രാജ്യത്തെ വളരെയധികം വേദനിപ്പിച്ചു. അദ്ദേഹം 'ട്രംപ്' നയത്തിന് കീഴില്‍ പുറത്തു പോകണം. തീവ്രവാദ പ്രവര്‍ത്തനങ്ങള്‍ക്കെതിരെ നിയമത്തിന്റെ പരമാവധി നടപടികള്‍ സ്വീകരിക്കുമെന്നും പ്രസിഡന്റ് പറഞ്ഞു.
നമ്മുടെ അതിര്‍ത്തികള്‍ സുരക്ഷിതമായി സൂക്ഷിക്കേണ്ടതിന്റെയും നിയമവിരുദ്ധരും അമേരിക്കന്‍ വിരുദ്ധരുമായവരെ നമ്മുടെ മാതൃരാജ്യത്ത് നിന്ന് നാടുകടത്തേണ്ടതിന്റെ മറ്റൊരു ഉദാഹരണമാണിതെന്നും അദ്ദേഹം കൂട്ടിച്ചേര്‍ത്തു. ദുരന്തത്തിന്റെ ഇരകള്‍ക്കും കൊളറാഡോയിലെ ബൗള്‍ഡറിലെ ആളുകള്‍ക്കും വേണ്ടി തന്റെ ഹൃദയം വേദനിക്കുന്നുവെന്നും അദ്ദേഹം പറഞ്ഞു.
കൊളറാഡോ സ്പ്രിംഗ്‌സില്‍ നിന്നുള്ള 45കാരനായ മുഹമ്മദ് സാബ്രി സോളിമാന്‍ എന്നയാളെയാണ് സംഭവസ്ഥലത്ത് വെച്ച് അറസ്റ്റ് ചെയ്തത്. ഇയാള്‍ക്ക് നിസ്സാര പരിക്കുകള്‍ ഏറ്റതിനാല്‍ ചികിത്സ നല്‍കിയിരുന്നു.