വാഷിംഗ്ടണ്‍: അമേരിക്കന്‍ പ്രസിഡന്റ് ഡോണാള്‍ഡ് ട്രംപും ന്യുയോര്‍ക്ക് മേയറായി തെരഞ്ഞെടുക്കപ്പെട്ട സോഹ്രാന്‍ മംദാനിയും വെള്ളിയാഴ്ച ഒവല്‍ ഓഫിസില്‍ കൂടിക്കാഴ്ച നടത്തി. 'വളരെ നല്ലതും അതിജീവനക്ഷമവുമായ' യോഗമായിരുന്നുവെന്ന് ട്രംപ് വാര്‍ത്താ മാധ്യമങ്ങളോട് പറഞ്ഞു. 'ഞങ്ങള്‍ക്ക് പൊതു ലക്ഷ്യം ഒന്നാണ് - നമ്മുടെ പ്രിയപ്പെട്ട ഈ നഗരത്തെ(ന്യൂയോര്‍ക്കിനെ) മുന്നോട്ട് കൊണ്ടുപോകുക,' ട്രംപ് കൂട്ടിച്ചേര്‍ത്തു.
തമ്മിലുള്ള രാഷ്ട്രീയ വൈരുധ്യങ്ങളെ മറികടന്ന് ന്യൂയോര്‍ക്കിന്റെ ഭാവിയിലെ വിലക്കുറവും സുരക്ഷയും ഇരുവരുടെയും പ്രധാന ചര്‍ച്ചാവിഷയങ്ങളായി. നഗരത്തിലെ ഹൗസിംഗ്, ഭക്ഷണം തുടങ്ങി ജീവിത ചെലവുകള്‍ കുറയ്ക്കാനുള്ള നിര്‍ദേശങ്ങളും ഇരുവരും ചേര്‍ന്ന് പരിശോധിച്ചു. 'ഞാന്‍ ചെയ്യുന്നതെല്ലാം ന്യുയോര്‍ക്കിന് ഗുണമാകുന്നതായിരിക്കും,' എന്ന് ട്രംപ് പറഞ്ഞു.
കൂടിക്കാഴ്ചയെ 'ഉപകാരപ്രദമായ സംഭാഷണം' എന്ന് മംദാനിയും വിശേഷിപ്പിച്ചു. 'ഞങ്ങള്‍ രണ്ടുപേരും സ്‌നേഹിക്കുന്ന നഗരം-ആ ന്യൂയോര്‍ക്ക്- കൂടുതല്‍ സുലഭ്യവും സുസ്ഥിരവുമായിരിക്കേണ്ടതുണ്ട്,' അദ്ദേഹം പറഞ്ഞു.
പ്രതീക്ഷിച്ചതിനെക്കാള്‍ കൂടുതല്‍ കാര്യങ്ങളിലാണ് ഇരുവരും ഒത്തുപോകാന്‍ കഴിയുന്നതെന്ന് ട്രംപ് പറഞ്ഞു. നേരത്തെ ട്രംപിനെ സ്വച്ഛാധിപതി എന്നു വിശേഷിപ്പിച്ച പ്രസ്താവനയെക്കുറിച്ച് ചോദിച്ചപ്പോള്‍, പഴയ പ്രസ്താവനകളില്‍ തങ്ങാതെ 'പൊതു ലക്ഷ്യത്തിലേക്ക്' ശ്രദ്ധ കേന്ദ്രീകരിക്കാനാണ് ആഗ്രഹമെന്ന് മംദാനി വ്യക്തമാക്കി.
ഏകാധിപതി എന്നതിനേക്കാളും വലിയ വിശേഷണങ്ങള്‍ താന്‍ പലപ്പോഴായി കേട്ടിട്ടുണ്ടെന്ന് പറഞ്ഞ ട്രംപ് അത് അപമാനമായി കരുതുന്നില്ലെന്ന് പറഞ്ഞു. തന്റെ മനസ് കുറെയേറെ മാറി. ഞങ്ങള്‍ ഒരുമിച്ചു പ്രവര്‍ത്തിക്കാന്‍തുടങ്ങുമ്പോള്‍ മംദാനിയുടെ മനസും മാറും. നമ്മള്‍ ഓരോരുത്തരും അഭിപ്രായങ്ങളില്‍ മാറ്റം വരുത്താറുണ്ട്.-ട്രംപ് പറഞ്ഞു.
സുരക്ഷയാണ് നഗരത്തിന്റെ അടിസ്ഥാനം
ന്യൂയോര്‍ക്കിലെ സുരക്ഷാ പ്രശ്‌നം ഇരുവരും പ്രത്യേകമായി ചര്‍ച്ച ചെയ്തു. 'സുരക്ഷയില്ലെങ്കില്‍ മറ്റൊന്നിനും അര്‍ത്ഥമില്ലെന്ന് ട്രംപ് വ്യക്തമാക്കി. 'വിലക്കുറവും വികസനവും ചര്‍ച്ച ചെയ്യാം, പക്ഷേ തെരുവുകളില്‍ സുരക്ഷ ഇല്ലെങ്കില്‍ നഗരത്തെ വിജയിപ്പിക്കാനാകില്ല.'
മംദാനിയും അത് അംഗീകരിച്ചു. 'നമ്മുടെ നഗരത്തിലെ നിരവധി പ്രശ്‌നങ്ങള്‍ മുന്‍കാലത്ത് നിന്ന് തന്നെ ഉണ്ടായിരുന്നു. ആ പഴയ രാഷ്ട്രീയത്തെ ചോദ്യം ചെയ്യുക തന്നെയായിരുന്നു ഞങ്ങളുടെ വാഗ്ദാനം,' അദ്ദേഹം പറഞ്ഞു.
മിഡില്‍ ഈസ്റ്റ് സമാധാനവും ചര്‍ച്ചാവിഷയം
ഇരുവരും മിഡില്‍ ഈസ്റ്റിലെ സമാധാനാഭ്യര്‍ത്ഥനയും പങ്കുവച്ചു. 'ആ ഭാഗത്ത് സമാധാനം നമുക്ക് ഇരുവര്‍ക്കും ആവശ്യമാണ് എന്ന് ട്രംപ് പറഞ്ഞപ്പോള്‍, 'അത് ഞങ്ങള്‍ ദിവസവും ആഗ്രഹിക്കുന്നതാണ്' എന്ന് മംദാനി മറുപടി നല്‍കി.
വ്യത്യസ്ത ആശയങ്ങള്‍, പക്ഷേ ലക്ഷ്യം ഒന്ന്
മംദാനിയുടെ മുന്‍ വിമര്‍ശനങ്ങള്‍ക്കിടയിലും 'നന്നായി പൊരുത്തപ്പെടാമെന്ന്' താന്‍ കരുതുന്നുവെന്ന് ട്രംപ് നേരത്തേ നല്‍കിയ അഭിമുഖത്തില്‍ പറഞ്ഞിരുന്നു. 'അദ്ദേഹം നല്ലൊരു മത്സരം നടത്തി,' എന്നും ട്രംപ് പറഞ്ഞു.
വ്യത്യസ്ത രാഷ്ട്രീയ തത്വങ്ങള്‍ ഉള്ളവരായിട്ടും, 'ന്യൂയോര്‍ക്കിനെ ശക്തമാക്കുക എന്നതാണ് പൊതു ലക്ഷ്യം' എന്ന അഭിപ്രായത്തില്‍ ഇരുവരും ഒന്നിച്ചു.
ന്യുയോര്‍ക്കിന്റെ ഭാവിക്കായി കൈകോര്‍ക്കും : ട്രംപ്-മംദാനി കൂടിക്കാഴ്ചയില്‍ വിലക്കുറവിനും സുരക്ഷയ്ക്കും മുന്‍ഗണന
