വിവാദങ്ങള്‍ സൃഷ്ടിക്കുന്നതില്‍ റഷ്യയും, റഷ്യന്‍ പ്രസിഡന്റ് വ്‌ളാഡിമിര്‍ പുടിനും എന്നും മുന്നിലാണ്. പലപ്പോഴും ലോകത്തെ ഒന്നാകെ അമ്പരപ്പിക്കുന്ന തീരുമാനങ്ങളാണ് മോസ്‌കോ കൈക്കൊണ്ടിട്ടുള്ളത്. നിലവില്‍ റഷ്യയില്‍ നിന്നു പുറത്തുവരുന്ന് 'സെക്സ് മന്ത്രാലയം' എന്ന ആശയവും വ്യത്യസ്തമല്ല. രാജ്യത്തെ ജനനനിരക്ക് വര്‍ധിപ്പിക്കാനുള്ള ശ്രമങ്ങളുടെ ഭാഗമായാണ് പുതിയ തീരുമാനം എന്നാണു റിപ്പോര്‍ട്ടുകള്‍ വ്യക്തമാക്കുന്നത്
2022 ഫെബ്രുവരിയില്‍ ആരംഭിച്ച യുക്രൈന്‍ യുദ്ധം റഷ്യയിലെ ജനസംഖ്യാപരമായ പ്രതിസന്ധി രൂക്ഷമാക്കിയെന്നു വിദഗ്ധര്‍ ചൂണ്ടിക്കാട്ടുന്നു. ഏകദേശം 6 ലക്ഷം റഷ്യന്‍ സൈനികള്‍ യുദ്ധത്തെ തുടര്‍ന്നും ജീവന്‍ വെടിഞ്ഞുവെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. കുടുംബ സംരക്ഷണം, പിതൃത്വം, പ്രസവം, ബാല്യം എന്നിവ ഉള്‍ക്കൊള്ളുന്നതാകും പുതിയ സെക്സ് മന്ത്രാലയമെന്ന് അടുത്തവൃത്തങ്ങള്‍ വ്യക്തമാക്കുന്നു.
ജനനനിരക്ക് കുറയുന്നത് തടയാന്‍ പുടിന്‍ ഭരണകൂടം വിവിധ തന്ത്രങ്ങള്‍ക്ക് കോപ്പുകൂട്ടുന്നു. ദമ്പതികള്‍ തമ്മിലുള്ള അടുപ്പം വര്‍ധിപ്പിക്കുന്നതിനു രാത്രി 10 മുതല്‍ പുലര്‍ച്ചെ 2 മണി വരെ രാജ്യത്ത് ഇന്റര്‍നെറ്റ് ഓഫ് ചെയ്യാനും നിര്‍ദേശമുണ്ട്. ലൈറ്റുകള്‍ പോലും ഈ സമയത്ത് അനുവദിക്കില്ലെന്നാണ് സൂചന. കുട്ടികളെ വളര്‍ത്താനും, പരിപാലിക്കാനും ജോലിക്കു പോകാതെ വീട്ടില്‍ തന്നെ തുടരുന്ന സ്ത്രീകള്‍ക്ക് കോമ്പന്‍സേഷന്‍ നല്‍കാന്‍ പദ്ധതിയുണ്ട്. ഇത്തരക്കാര്‍ക്ക് പെന്‍ഷനും പരിഗണനയിലുണ്ട്.
റഷ്യന്‍ മാധ്യമായ സണ്‍ ന്യൂസിന്റെ റിപ്പോര്‍ട്ട് പ്രകാരം സെക്സ് മന്ത്രാലയത്തിന്റെ നടപടികള്‍ ഇവിടെ അവസാനിക്കുന്നില്ല. രാജ്യത്ത് ആദ്യമായി ഡേറ്റിംഗിന് പോകുന്നവര്‍ക്ക് 40 പൗണ്ടും, ഗര്‍ഭധാരണം വര്‍ധിപ്പിക്കുമെന്ന പ്രതീക്ഷയില്‍ ആദ്യരാത്രി ഹോട്ടലുകളില്‍ തീരുമാണിക്കുന്ന ദമ്പതികള്‍ക്ക് 208 പൗണ്ട് വരെയും ധനസഹായം സെക്സ് മന്ത്രാലയം ശുപാര്‍ശ ചെയ്യുന്നു.
മറ്റൊരു റിപ്പോര്‍ട്ട് പ്രകാരം ആദ്യമായി ഡേറ്റിംഗിന് പോകുന്നവര്‍ക്ക് 5,000 റൂബിള്‍ വരെ (ഏകദേശം 4,395 രൂപ) ലഭിക്കും. വിവാഹ രാത്രി ഹോട്ടലുകളില്‍ പ്ലാന്‍ ചെയ്യുന്നവര്‍ക്ക് 26,300 റൂബിള്‍് (ഏകദേശം 23,122 രൂപ) വരെ കിട്ടും. രാജ്യത്തെ ജനനനിരക്ക് വര്‍ദ്ധിപ്പിക്കുന്നതിനുള്ള ചുമതല നിര്‍ദിഷ്ട സെക്സ് മന്ത്രാലയത്തിന് ആയിരിക്കുമെന്നും റിപ്പോര്‍ട്ടുകള്‍ കൂട്ടിച്ചേര്‍ക്കുന്നു
യുക്രെയ്ന്‍ യുദ്ധം ജനസംഖ്യ കുറച്ചു; പരിഹാരത്തിന് സെക്സ് മന്ത്രാലയം തുടങ്ങാന്‍ റഷ്യന്‍ നീക്കം
