ബീജിംഗ്: ലോകത്തെ അമ്പരപ്പിച്ച ത്രീ ഗോർജസ് അണക്കെട്ട് ഭൂമിയുടെ ഭ്രമണത്തെ പോലും സ്വാധീനിച്ചുവെന്ന വാർത്തകൾക്ക് പിന്നാലെ, അതിനേക്കാൾ വലിയ ജലവൈദ്യുതി പദ്ധതിയുമായി ചൈന മുന്നോട്ടു പോകുന്നു. ടിബറ്റിലൂടെ ഒഴുകുന്ന യാർലങ് ത്സാംഗ്പോ നദിയിലാണ് പുതിയ പദ്ധതി ആരംഭിച്ചതെന്ന് ചൈനീസ് സർക്കാർ മാധ്യമങ്ങൾ സ്ഥിരീകരിച്ചു. നിലവിലെ ഏറ്റവും വലിയ ജലവൈദ്യുതി പദ്ധതിയായ ത്രീ ഗോർജസ് അണക്കെട്ടിന്റെ ശേഷിയെയും ഇത് മറികടക്കും എന്നാണ് റിപ്പോർട്ടുകൾ.
ഏകദേശം 1.2 ട്രില്യൺ യുവാൻ ചെലവിൽ നിർമ്മിക്കുന്ന ഈ പദ്ധതി വർഷംതോറും ഏകദേശം 300 ബില്യൺ കിലോവാട്ട് മണിക്കൂർ വൈദ്യുതി ഉത്പാദിപ്പിക്കുമെന്നാണ് കണക്ക്. ഇത് ലോകത്തിലെ ഏറ്റവും ഉയർന്ന വൈദ്യുതി ഉത്പാദന ശേഷിയുള്ള ജലവൈദ്യുതി കേന്ദ്രമാകും. നദി ഇന്ത്യയിലേക്ക് കടക്കുന്നതിനുമുമ്പ്, പിന്നീട് ബ്രഹ്മപുത്ര നദി ആയി മാറുന്ന ഭാഗത്താണ് പദ്ധതി നടപ്പിലാക്കുന്നത്.
ഒരു വലിയ ഒറ്റ അണക്കെട്ട് നിർമ്മിക്കുന്നതിന് പകരം, നദിയുടെ വലിയ ഉയരംവ്യത്യാസം പ്രയോജനപ്പെടുത്തി നിരന്തരം ബന്ധിപ്പിച്ച നിലയിൽ നിരവധി ചെറിയ വൈദ്യുതി നിലയങ്ങൾ സ്ഥാപിക്കുന്ന രീതിയാണ് ഈ പദ്ധതിയുടെ പ്രത്യേകത. ഇതിലൂടെ വലിയ തോതിൽ വൈദ്യുതി ഉത്പാദിപ്പിക്കാമെന്നാണ് ചൈനയുടെ കണക്കുകൂട്ടൽ. മൂന്ന് ഘട്ടങ്ങളിലായാണ് നിർമ്മാണം പൂർത്തിയാക്കുക, എന്നാൽ സമയക്രമം ഇതുവരെ വ്യക്തമാക്കിയിട്ടില്ല.
ഇത് ഒരു രാജ്യാന്തര നദിയാണെന്നതിനാൽ ഇന്ത്യയുൾപ്പെടെയുള്ള അയൽരാജ്യങ്ങളിൽ ആശങ്ക ഉയർന്നിട്ടുണ്ട്. മുകളിലുള്ള ജലനിർമ്മാണ തീരുമാനങ്ങൾ താഴേക്ക് ഒഴുകുന്ന ജലത്തിന്റെ അളവിനെ ബാധിക്കാമെന്ന് ഇന്ത്യ മുമ്പ് ചൂണ്ടിക്കാട്ടിയിട്ടുണ്ട്. എന്നാൽ ഈ പദ്ധതി വൈദ്യുതി ഉത്പാദനത്തിനായി മാത്രമാണെന്നും ജലവിതരണം മാറ്റുന്നതല്ല ലക്ഷ്യമെന്നും ചൈന വിശദീകരിക്കുന്നു.
ഇതിനൊപ്പം പരിസ്ഥിതി, സുരക്ഷാ ആശങ്കകളും ഉയരുന്നു. ഹിമാലയത്തിന് സമീപമുള്ള ടിബറ്റൻ സമതലം ഭൂകമ്പ സാധ്യതയുള്ള പ്രദേശമായതിനാൽ നിർമാണം വെല്ലുവിളിയാണെന്ന് വിദഗ്ധർ പറയുന്നു. വലിയ അണക്കെട്ടുകൾ മണൽ ഒഴുക്ക് തടസ്സപ്പെടുത്തുകയും ജൈവവൈവിധ്യത്തെയും പരിസ്ഥിതിയെയും ബാധിക്കാനും ഇടയുണ്ടെന്ന് പരിസ്ഥിതി സംഘടനകൾ മുന്നറിയിപ്പ് നൽകുന്നു. ഇത്തരം പദ്ധതികളുമായി ബന്ഘധപ്പെട്ട് മുൻപ് ജനങ്ങളെ കുടിയൊഴിപ്പിച്ചതായും സുതാര്യത കുറവാണെന്നും ചില സംഘടനകൾ ആരോപിക്കുന്നു.
ലോകത്തിലെ ഏറ്റവും വലിയ ജലവൈദ്യുതി ഉത്പാദക രാജ്യമായ ചൈന, ഈ പുതിയ പദ്ധതിയിലൂടെ ഒരൊറ്റ പദ്ധതിയിൽ നിന്നുള്ള വൈദ്യുതി ഉത്പാദനത്തിലും ലോക റെക്കോർഡ് സ്ഥാപിക്കാനുള്ള നീക്കത്തിലാണ്.
ലോകത്തിലെ ഏറ്റവും വലിയ ജലവൈദ്യുതി പദ്ധതി: പുതിയ ഭീമൻ അണക്കെട്ടുമായി ചൈന
