എവിയാൻ: ജി7 ഉച്ചകോടിക്കിടെ പ്രധാനമന്ത്രി നരേന്ദ്ര മോഡിയും ഇറ്റാലിയൻ പ്രധാനമന്ത്രി ജോർജിയ മെലോണിയും തമ്മിലുണ്ടായ സൗഹൃദപരമായ സംഭാഷണം വീണ്ടും സോഷ്യൽ മീഡിയയിൽ വൈറലായി. ഇരുവരുടെയും പേരുകൾ ചേർത്ത് ആരാധകർ സൃഷ്ടിച്ച 'മെലോഡി' ട്രെൻഡാണ് വീണ്ടും ശ്രദ്ധ നേടുന്നത്.
ലോകനേതാക്കളുടെ കുടുംബചിത്രത്തിന് മുന്നോടിയായി മോഡിയും മെലോണിയും കൈകൊടുത്ത് അഭിവാദ്യം ചെയ്യുന്ന ദൃശ്യങ്ങളാണ് വൈറലായത്. ഇതിനിടെ ഇരുവരുടെയും സോഷ്യൽ മീഡിയ ജനപ്രീതിയെ കുറിച്ച് മോഡി പരാമർശിച്ചതായി കരുതപ്പെടുന്നു. അതിന് മറുപടിയായി, 'അതെ, ഇൻസ്റ്റഗ്രാമിലെ ഏറ്റവും പ്രശസ്ത ദമ്പതികൾ ഞങ്ങളാണ്,' എന്ന് മെലോണി തമാശയായി പറഞ്ഞതായാണ് റിപ്പോർട്ട്.
കഴിഞ്ഞ മാസം റോമിൽ നടന്ന കൂടിക്കാഴ്ചയ്ക്കിടെ 'മെലോഡി' ട്രെൻഡിനെ ഓർമിപ്പിച്ച് മോഡി മെലോണിക്ക് 'മെലഡി' ടോഫി സമ്മാനിച്ചതും വലിയ വാർത്തയായിരുന്നു. ആ വീഡിയോ മെലോണി തന്നെ സമൂഹമാധ്യമങ്ങളിൽ പങ്കുവെച്ചിരുന്നു.
2023ൽ ആരംഭിച്ച 'മെലോഡി' ട്രെൻഡ് പിന്നീട് ലോകശ്രദ്ധ നേടിയിരുന്നു. 2024ൽ 'Hi friends, from #Melodi' എന്ന സെൽഫിയും 2025ലെ ജി7 ഉച്ചകോടിയിൽ 'Melodi team' എന്ന വീഡിയോയും മെലോണി പങ്കുവെച്ചിരുന്നു.
സോഷ്യൽ മീഡിയയിലെ തമാശകൾക്കപ്പുറം, ഇന്ത്യയും ഇറ്റലിയും തമ്മിലുള്ള നയതന്ത്ര സാമ്പത്തിക ബന്ധം കൂടുതൽ ശക്തമാകുന്നതിന്റെ പ്രതീകമായും ഈ സൗഹൃദം വിലയിരുത്തപ്പെടുന്നു. ഇന്ത്യ-മിഡിൽ ഈസ്റ്റ്യൂറോപ്പ് സാമ്പത്തിക ഇടനാഴി (IMEC) ഉൾപ്പെടെയുള്ള പദ്ധതികളിൽ ഇരുരാജ്യങ്ങളും അടുത്ത സഹകരണം തുടരുകയാണ്.
'ഇൻസ്റ്റഗ്രാമിലെ ഏറ്റവും പ്രശസ്ത ദമ്പതികൾ'; ജി7 വേദിയിൽ വീണ്ടും വൈറലായി 'മെലോഡി' നിമിഷം
