പാരിസ്: ഇന്ത്യ ഇന്ന് ഭാവിക്കായി തയ്യാറെടുക്കുക മാത്രമല്ല, ഭാവിയെ സജീവമായി രൂപപ്പെടുത്തുകയുമാണെന്ന് പ്രധാനമന്ത്രി നരേന്ദ്ര മോഡി. ഫ്രാൻസിലെ പാരിസിൽ ഇന്ത്യൻ സമൂഹത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
ലോകത്തിലെ ഏറ്റവും വേഗത്തിൽ വളരുന്ന സമ്പദ്വ്യവസ്ഥകളിലൊന്നായി ഇന്ത്യ മാറിയതായി ചൂണ്ടിക്കാട്ടിയ മോഡി, രാജ്യങ്ങൾ തമ്മിലുള്ള ബന്ധങ്ങളിൽ വ്യാപാരത്തിനൊപ്പം വിശ്വാസത്തിനും ഇന്ന് വലിയ പ്രാധാന്യമുണ്ടെന്ന് പറഞ്ഞു.
'ഒരു കാലത്ത് രാജ്യങ്ങൾ തമ്മിലുള്ള ബന്ധം പ്രധാനമായും വ്യാപാരത്തെ അടിസ്ഥാനമാക്കിയായിരുന്നു. ഇന്ന് വിശ്വാസമാണ് ഏറ്റവും വിലമതിക്കപ്പെടുന്ന ഘടകം. ഓരോ രാജ്യവും വിശ്വസിക്കാവുന്ന പങ്കാളികളെയും സ്ഥിരതയുള്ള വിതരണ ശൃംഖലകളെയും തേടുകയാണ്,' മോഡി പറഞ്ഞു.
ഇന്ത്യയുടെ ബഹിരാകാശ നേട്ടങ്ങളും അദ്ദേഹം എടുത്തുപറഞ്ഞു. ചന്ദ്രയാൻ ദൗത്യത്തിലൂടെ ചന്ദ്രന്റെ ദക്ഷിണധ്രുവത്തിന് സമീപം ഇറങ്ങുന്ന ആദ്യ രാജ്യമെന്ന നേട്ടം ഇന്ത്യ സ്വന്തമാക്കിയെന്ന് അദ്ദേഹം ഓർമിപ്പിച്ചു.
'ചന്ദ്രയാൻ വിജയത്തെ ഇന്ത്യ ഒരു ലക്ഷ്യമായി കണ്ടില്ല. അത് പുതിയൊരു യാത്രയുടെ തുടക്കമായിരുന്നു. ഇപ്പോൾ ഗഗൻയാൻ മനുഷ്യ ബഹിരാകാശ ദൗത്യത്തിനും സ്വന്തം ബഹിരാകാശ നിലയം സ്ഥാപിക്കാനുമുള്ള തയ്യാറെടുപ്പുകളാണ് രാജ്യം നടത്തുന്നത്,' അദ്ദേഹം പറഞ്ഞു.
ഒരുകാലത്ത് സ്വപ്നമായി കരുതിയ കാര്യങ്ങൾ ഇന്ന് യാഥാർഥ്യമായെന്നും, അസാധ്യമെന്ന് തോന്നിയ പല നേട്ടങ്ങളും ഇന്ത്യ കൈവരിച്ചെന്നും മോഡി വ്യക്തമാക്കി.
'ഈ മാറ്റത്തിന് പിന്നിലെ ശക്തി മോഡിയല്ല, ഇന്ത്യയിലെ ജനങ്ങളാണ്. എല്ലാവരും ഒരുമിച്ച് മുന്നേറുമ്പോഴാണ് രാജ്യം മുന്നേറുന്നത്. ഇത് ഇന്ത്യൻ ജനതയുടെ കൂട്ടായ പരിശ്രമത്തിന്റെ ഫലമാണ്,' അദ്ദേഹം കൂട്ടിച്ചേർത്തു.
ഫ്രാൻസ് സന്ദർശനത്തിന്റെ ഭാഗമായി വിവിധ മേഖലകളിലെ നിക്ഷേപം, സാങ്കേതിക സഹകരണം, നവീകരണ പദ്ധതികൾ എന്നിവ സംബന്ധിച്ചും മോഡി ചർച്ചകൾ നടത്തിയിരുന്നു. ഇന്ത്യയുടെ വളർച്ചയും ആഗോള സ്വാധീനവും പുതിയ ഉയരങ്ങളിലെത്തുകയാണെന്ന സന്ദേശമാണ് അദ്ദേഹം പാരിസിലെ ഇന്ത്യൻ സമൂഹത്തിന് മുന്നിൽ പങ്കുവച്ചത്.
'ഇന്ത്യ ഭാവിക്കായി തയ്യാറെടുക്കുക മാത്രമല്ല, ഭാവിയെ രൂപപ്പെടുത്തുകയുമാണ്'; പാരിസിലെ ഇന്ത്യൻ സമൂഹത്തോട് മോഡി
