വാഷിംഗ്ടൺ: ഇറാനിലെ മിനാബ് നഗരത്തിലെ പെൺകുട്ടികളുടെ സ്കൂളിന് നേരെയുണ്ടായ മിസൈൽ ആക്രമണവുമായി ബന്ധപ്പെട്ട അമേരിക്കൻ സൈനിക അന്വേഷണം അവസാനഘട്ടത്തിലെന്ന് യുഎസ് സെൻട്രൽ കമാൻഡ് (CENTCOM). എന്നാൽ, സ്കൂൾ മിസൈൽ താവളത്തിനുള്ളിലായിരുന്നുവെന്ന അമേരിക്കൻ വിശദീകരണം ഇറാൻ ശക്തമായി തള്ളി. ഇത് 'അടിസ്ഥാനരഹിതമായ കള്ളപ്രചാരണം' ആണെന്നും ആക്രമണം വ്യക്തമായ യുദ്ധക്കുറ്റമാണെന്നും ഇറാൻ ആരോപിച്ചു.
ഫെബ്രുവരി 28ന്, ഇറാൻ-അമേരിക്ക സംഘർഷത്തിന്റെ ആദ്യദിനത്തിലായിരുന്നു തെക്കൻ ഇറാനിലെ മിനാബ് നഗരത്തിലുള്ള ശജരെ തയ്യിബെ എലമെന്ററി സ്കൂളിന് നേരെ ആക്രമണം നടന്നത്. 175ലേറെ കുട്ടികളും അധ്യാപകരും കൊല്ലപ്പെട്ടുവെന്നാണ് ഇറാൻ അറിയിച്ചത്.
അന്വേഷണം സങ്കീർണമായിരുന്നുവെന്ന് അമേരിക്കൻ പ്രതിനിധി സഭാ സമിതിക്കു മുന്നിൽ സംസാരിക്കവേ സെൻട്രൽ കമാൻഡ് മേധാവി അഡ്മിറൽ ബ്രാഡ് കൂപ്പർ പറഞ്ഞു. സ്കൂൾ സ്ഥിതി ചെയ്തിരുന്നത് ഇറാന്റെ ഇസ്ലാമിക് റെവല്യൂഷണറി ഗാർഡ്സ് കോർപ്പ്സ് (IRGC) നിയന്ത്രിക്കുന്ന ക്രൂയിസ് മിസൈൽ കേന്ദ്രത്തിനടുത്തായിരുന്നുവെന്നാണ് അദ്ദേഹത്തിന്റെ വിശദീകരണം.
'സാധാരണ സൈനികാക്രമണങ്ങളേക്കാൾ സങ്കീർണമായ സാഹചര്യമായിരുന്നു അവിടെ. അന്വേഷണം അവസാനത്തിലേക്കാണ് നീങ്ങുന്നത്. പരസ്യത പ്രധാനമാണെന്ന് ഞങ്ങൾ കരുതുന്നു,' കൂപ്പർ പറഞ്ഞു.
എന്നാൽ, അമേരിക്ക ഇനിയും ആക്രമണത്തിന്റെ ഉത്തരവാദിത്തം ഏറ്റെടുക്കാത്തതിനെ ഡെമോക്രാറ്റിക് പാർട്ടി അംഗങ്ങൾ ചോദ്യം ചെയ്തു. 'എന്താണ് സംഭവിച്ചതെന്ന് വ്യക്തമാണ്. 80 ദിവസം കഴിഞ്ഞിട്ടും അമേരിക്ക ഉത്തരവാദിത്തം ഏറ്റെടുത്തിട്ടില്ല,' പ്രതിനിധി ആദം സ്മിത്ത് പറഞ്ഞു.
ഇതിനിടെ, അമേരിക്കയുടെ വാദം ഇറാൻ വിദേശകാര്യ മന്ത്രാലയം തള്ളി. സ്കൂൾ മിസൈൽ താവളത്തിനുള്ളിലായിരുന്നുവെന്നത് 'നാണമില്ലാത്ത വ്യാജവാദം' ആണെന്ന് വക്താവ് എസ്മായിൽ ബഖായി പ്രതികരിച്ചു. സ്കൂൾ സമയത്ത് പ്രവർത്തിച്ചുകൊണ്ടിരുന്ന വിദ്യാഭ്യാസ സ്ഥാപനത്തെ ലക്ഷ്യമിട്ടത് അന്താരാഷ്ട്ര മാനവിക നിയമങ്ങളുടെ ഗുരുതര ലംഘനവും യുദ്ധക്കുറ്റവുമാണെന്നും അദ്ദേഹം ആരോപിച്ചു.
ആക്രമണത്തിന് ഉത്തരവാദികളായ അമേരിക്കൻ സൈനിക ഉദ്യോഗസ്ഥർക്കെതിരെ അന്താരാഷ്ട്ര നിയമപ്രകാരം നടപടി വേണമെന്നും ഇറാൻ ആവശ്യപ്പെട്ടു.
അതേസമയം, അമേരിക്കൻ സൈന്യം ഒരിക്കലും സാധാരണ ജനങ്ങളെ മനഃപൂർവം ലക്ഷ്യമിടില്ലെന്നും യുദ്ധനിയമങ്ങൾ കർശനമായി പാലിക്കുന്നുണ്ടെന്നും അഡ്മിറൽ കൂപ്പർ ആവർത്തിച്ചു.
മിനാബ് സ്കൂൾ ആക്രമണം: അന്വേഷണം അവസാനഘട്ടത്തിൽ; 'യുദ്ധക്കുറ്റം' ആരോപിച്ച് ഇറാൻ
