ടെഹ്‌റാന്‍: അമേരിക്കയുമായും ഇസ്രയേലുമായുമുള്ള യുദ്ധം നീളുന്നതിനിടെ ഇറാനില്‍ അടിസ്ഥാന ആവശ്യങ്ങള്‍ നിറവേറ്റാന്‍പോലും കഴിയാതെ ജനങ്ങള്‍ ദുരിതത്തിലാണെന്ന് ഇറാന്‍ പ്രസിഡന്റ് മസൂദ് പെസഷ്‌കിയാന്‍. യുദ്ധസാഹചര്യം കാരണം നിരവധി പേര്‍ക്ക് കുടുംബത്തിന് ഭക്ഷണം കണ്ടെത്താന്‍പോലും കഴിയുന്നില്ലെന്ന് അദ്ദേഹം പറഞ്ഞു. രാജ്യത്തിന്റെ സമ്പദ്‌വ്യവസ്ഥയ്ക്കുമേല്‍ സമ്മര്‍ദം വര്‍ധിക്കുന്ന സാഹചര്യത്തിലാണ് പ്രസിഡന്റിന്റെ പ്രതികരണം.
ഇറാന്റെ തുറമുഖങ്ങള്‍ ഉപരോധിച്ചും എണ്ണ കയറ്റുമതിയും വ്യാപാരവും തടസ്സപ്പെടുത്തിയും അമേരിക്ക സാമ്പത്തിക സമ്മര്‍ദം ശക്തമാക്കുകയാണ്. അതേസമയം, ആഗോള ഊര്‍ജവിതരണത്തില്‍ നിര്‍ണായകമായ ഹോര്‍മുസ് കടലിടുക്കിലൂടെയുള്ള കപ്പല്‍ഗതാഗതത്തിന് ഇറാനും നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. ഇതോടെ രാജ്യത്തിന്റെ സാമ്പത്തിക പ്രതിസന്ധി കൂടുതല്‍ രൂക്ഷമായി.
ഫെബ്രുവരി 28ന് അമേരിക്കയും ഇസ്രയേലും നടത്തിയ ആക്രമണത്തില്‍ ഇറാന്റെ പരമോന്നത നേതാവ് ആയത്തുല്ല അലി ഖമനേയിയും മുതിര്‍ന്ന സൈനിക കമാന്‍ഡര്‍മാരും കൊല്ലപ്പെട്ടതോടെയാണ് സംഘര്‍ഷം ആരംഭിച്ചത്. തുടര്‍ന്ന് ഇറാന്‍ ഇസ്രയേലിനും മേഖലയിലെ അമേരിക്കന്‍ കേന്ദ്രങ്ങള്‍ക്കും നേരെ തിരിച്ചടിച്ചു. ജൂണ്‍ മധ്യത്തില്‍ പാകിസ്ഥാന്റെ പ്രധാന മധ്യസ്ഥതയില്‍ പ്രഖ്യാപിച്ച വെടിനിര്‍ത്തല്‍ അധികം വൈകാതെ തകരുകയും ഇരുപക്ഷവും പരസ്പരം കരാര്‍ ലംഘനം ആരോപിക്കുകയും ചെയ്തു.
'യുദ്ധവുമല്ല, സമാധാനവുമല്ല' എന്ന അനിശ്ചിതാവസ്ഥ അവസാനിപ്പിക്കണമെന്നും ഇറാന്‍ ഈ സാഹചര്യത്തില്‍നിന്ന് പുറത്തുകടക്കണമെന്നും പെസഷ്‌കിയാന്‍ ആവശ്യപ്പെട്ടു. അതേസമയം, അമേരിക്കയുടെ പുതിയ ആക്രമണം ഏതാനും ദിവസങ്ങള്‍ക്കുള്ളില്‍ ഉണ്ടായേക്കാമെന്ന മുന്നറിയിപ്പുകള്‍ ആശങ്ക വര്‍ധിപ്പിക്കുന്നുണ്ട്. വാഷിങ്ടണിന്റെ പുതിയ ആക്രമണം ഈ വാരാന്ത്യത്തില്‍ത്തന്നെ ഉണ്ടായേക്കാമെന്ന് തുര്‍ക്കിയിലെ അമേരിക്കന്‍ അംബാസഡര്‍ ടോം ബാരക് പ്രതികരിച്ചിരുന്നു. എന്നാല്‍, ഇറാന്‍ നയരൂപീകരണത്തില്‍ അദ്ദേഹത്തിന് നേരിട്ടുള്ള ചുമതലയില്ല.
പുതിയ ആക്രമണമുണ്ടായാല്‍ ശക്തമായി തിരിച്ചടിക്കുമെന്ന് ഇറാന്റെ റെവല്യൂഷണറി ഗാര്‍ഡ്‌സ് മുന്നറിയിപ്പ് നല്‍കി. നയതന്ത്ര ചര്‍ച്ചകള്‍ സ്തംഭിക്കുകയും സാമ്പത്തിക സമ്മര്‍ദം ശക്തമാകുകയും ചെയ്യുന്ന സാഹചര്യത്തില്‍ സാധാരണ ഇറാനികളുടെ ജീവിതവും മേഖലയില്‍ സമാധാനം പുനഃസ്ഥാപിക്കാനുള്ള സാധ്യതകളും കൂടുതല്‍ അനിശ്ചിതത്വത്തിലായിരിക്കുകയാണ്.
യുദ്ധം ജീവിതം തകര്‍ക്കുന്നു; ഭക്ഷണത്തിനുപോലും പണമില്ലാതെ ഇറാനികള്‍: പെസഷ്‌കിയാന്‍
