റിയാദ്: സൗദി അറേബ്യ ലക്ഷ്യമാക്കി ഹൂതികള്‍ നടത്തിയ മിസൈല്‍ ആക്രമണങ്ങള്‍ തടഞ്ഞതിനെത്തുടര്‍ന്ന് മക്ക, മദീന മേഖലകളില്‍ അവശിഷ്ടങ്ങള്‍ പതിച്ചതായി സൗദി സിവില്‍ ഡിഫന്‍സ് വിഭാഗം അറിയിച്ചു. രണ്ട് ബാലിസ്റ്റിക് മിസൈലുകള്‍ പ്രതിരോധ സംവിധാനങ്ങള്‍ ഉപയോഗിച്ച് തടഞ്ഞതിനു പിന്നാലെയാണ് അവശിഷ്ടങ്ങള്‍ വീണത്. മക്കയ്ക്ക് പുറത്തുള്ള വാദി മുഗാമസിലും അവശിഷ്ടങ്ങള്‍ പതിച്ചതായി അധികൃതര്‍ വ്യക്തമാക്കി. എന്നാല്‍, ഇസ്‌ലാമിന്റെ വിശുദ്ധ നഗരങ്ങളായ മക്കയെയും മദീനയെയും ലക്ഷ്യമിട്ട് ആക്രമണം നടത്തിയെന്ന ആരോപണം ഹൂതികള്‍ നിഷേധിച്ചു.
സൗദി അറേബ്യയിലും യെമനിലെ അന്താരാഷ്ട്ര അംഗീകാരമുള്ള സര്‍ക്കാരിന്റെ നിയന്ത്രണത്തിലുള്ള പ്രദേശങ്ങളിലും ശനിയാഴ്ച പുതിയ ആക്രമണങ്ങള്‍ നടത്തിയതായി ഇറാന്‍ പിന്തുണയുള്ള ഹൂതി സംഘം അവകാശപ്പെട്ടു. സൗദി അറേബ്യ നടത്തിയ ആക്രമണങ്ങളില്‍ 17 പേര്‍ കൊല്ലപ്പെട്ടെന്ന ആരോപണത്തിനു പിന്നാലെയാണ് സംഘര്‍ഷം വീണ്ടും രൂക്ഷമായത്.
റിയാദിലെ കിങ് ഖാലിദ് അന്താരാഷ്ട്ര വിമാനത്താവളം രണ്ട് ഘട്ടങ്ങളിലായി മിസൈലുകള്‍ ഉപയോഗിച്ച് ലക്ഷ്യമിട്ടതായി ഹൂതി സൈനിക വക്താവ് യഹ്യ സരീ അറിയിച്ചു. കിഴക്കന്‍ മേഖലയിലെ ദമ്മാം, തെക്കന്‍ മേഖലയിലെ നജ്‌റാന്‍ വിമാനത്താവളങ്ങള്‍ക്കും ഖമീസ് മുഷൈത്തിലെ വ്യോമതാവളത്തിനും നേരെ ആക്രമണം നടത്തിയതായും സംഘം അവകാശപ്പെട്ടു. എണ്ണ ഉല്‍പ്പാദനവിതരണ കേന്ദ്രങ്ങളും കിഴക്കുനിന്ന് പടിഞ്ഞാറോട്ട് അസംസ്‌കൃത എണ്ണ എത്തിക്കുന്ന പൈപ്പ്‌ലൈനും ലക്ഷ്യമിട്ടതായും ഹൂതികള്‍ അറിയിച്ചു. ഈ അവകാശവാദങ്ങളെല്ലാം സ്വതന്ത്രമായി സ്ഥിരീകരിച്ചിട്ടില്ല.
ഇതിനിടെ, പടിഞ്ഞാറന്‍ സൗദിയിലെ തായിഫ്, യന്‍ബു നഗരങ്ങളെ ലക്ഷ്യമിട്ട രണ്ട് മിസൈലുകള്‍ തടഞ്ഞതായി സൗദിയുടെ നേതൃത്വത്തിലുള്ള സഖ്യസേന അറിയിച്ചു. മക്ക, തായിഫ്, യന്‍ബു എന്നിവയുള്‍പ്പെടെ നാല് പടിഞ്ഞാറന്‍ മേഖലകളില്‍ അധികൃതര്‍ ജാഗ്രതാ നിര്‍ദേശവും പുറപ്പെടുവിച്ചു. ചെങ്കടല്‍ തീരത്തുള്ള യന്‍ബു സൗദിയുടെ പ്രധാന എണ്ണ കയറ്റുമതി കേന്ദ്രങ്ങളിലൊന്നാണ്. ഹോര്‍മുസ് കടലിടുക്ക് ഒഴിവാക്കി കിഴക്കു നിന്നുള്ള എണ്ണ പടിഞ്ഞാറന്‍ തീരത്തെത്തിക്കാന്‍ കഴിയുന്ന പൈപ്പ്‌ലൈന്‍ ശൃംഖലയുമായി ഈ കേന്ദ്രത്തിന് ബന്ധമുണ്ട്.
വേനല്‍ക്കാലത്ത് വര്‍ഷങ്ങളായി നിലനിന്ന വെടിനിര്‍ത്തല്‍ തകര്‍ന്നതിനു പിന്നാലെ സൗദിക്കെതിരായ ഹൂതി ആക്രമണങ്ങള്‍ വര്‍ധിച്ചതായാണ് റിപ്പോര്‍ട്ടുകള്‍. ഈ മാസം ആദ്യം റിയാദ് വിമാനത്താവളത്തിനു നേരെയുണ്ടായ ആക്രമണത്തില്‍ 13 പേര്‍ കൊല്ലപ്പെട്ടതായും വിമാനത്താവളത്തിന്റെ പ്രവര്‍ത്തനം നിര്‍ത്തിവെക്കേണ്ടിവന്നതായും റിപ്പോര്‍ട്ടുണ്ട്. ഹൂതി ഭീഷണി ചൂണ്ടിക്കാട്ടി സൗദിയിലെ അനിവാര്യമല്ലാത്ത നയതന്ത്ര ജീവനക്കാരോടും അവരുടെ കുടുംബാംഗങ്ങളോടും രാജ്യം വിടാന്‍ അമേരിക്ക ഈ ആഴ്ച നിര്‍ദേശിച്ചിരുന്നു. സൗദിയുടെ എണ്ണ അടിസ്ഥാനസൗകര്യങ്ങള്‍ക്കും വിമാനത്താവളങ്ങള്‍ക്കും എണ്ണക്കപ്പലുകള്‍ക്കും നേരെയുള്ള ആക്രമണങ്ങള്‍ മേഖലയുടെ സുരക്ഷയെയും ആഗോള എണ്ണവിതരണത്തെയും കുറിച്ചുള്ള ആശങ്ക വര്‍ധിപ്പിക്കുകയാണ്.
മക്കയ്ക്കും മദീനയ്ക്കും സമീപം മിസൈല്‍ അവശിഷ്ടങ്ങള്‍ പതിച്ചു; വിശുദ്ധ നഗരങ്ങളെ ലക്ഷ്യമിട്ടെന്ന ആരോപണം നിഷേധിച്ച് ഹൂതികള്‍
