ടെഹ്രാൻ/ടെൽ അവീവ്: ഇറാനും ഇസ്രയേലും തമ്മിലുള്ള സംഘർഷം വീണ്ടും രൂക്ഷമായ സാഹചര്യത്തിൽ പശ്ചിമ ഇറാനിലെ വ്യോമപാതകൾ അനിശ്ചിതകാലത്തേക്ക് അടച്ചു. ഇസ്രയേലിലേക്ക് ഇറാൻ മിസൈൽ ആക്രമണം നടത്തിയതിന് പിന്നാലെയാണ് സുരക്ഷാ കാരണങ്ങൾ ചൂണ്ടിക്കാട്ടി ഈ നടപടി സ്വീകരിച്ചത്. തുടർന്ന് ഇറാഖ് 72 മണിക്കൂർ നേരത്തേക്ക് രാജ്യത്തെ വ്യോമപാത അടച്ചതായി പ്രഖ്യാപിച്ചു. സിറിയയും തെക്കൻ വ്യോമമേഖല 12 മണിക്കൂറത്തേക്ക് അടയ്ക്കുകയും ഡമാസ്കസ് വിമാനത്താവളത്തിലെ സർവീസുകൾ താൽക്കാലികമായി നിർത്തിവെക്കുകയും ചെയ്തു.
സംഘർഷം ശക്തമായതോടെ ആഗോള എണ്ണവിലയും കുതിച്ചുയർന്നു. ബ്രെന്റ് ക്രൂഡ് ബാരലിന് 96 ഡോളറിന് മുകളിലെത്തിയപ്പോൾ വെസ്റ്റ് ടെക്സസ് ഇന്റർമീഡിയറ്റ് എണ്ണവിലയും 94 ഡോളറിനടുത്തെത്തി. വെടിനിർത്തൽ ധാരണ തകരുമെന്ന ആശങ്കയാണ് വിപണിയെ ബാധിച്ചത്.
ഇതിനിടെ അമേരിക്കൻ പ്രസിഡന്റ് ഡോണാൾഡ് ട്രംപ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി ടെലിഫോണിൽ സംസാരിച്ചു. ഇറാനുമായുള്ള ചർച്ചകൾ അന്തിമഘട്ടത്തിലാണെന്നും സമവായം സാധ്യമാകുമെന്നും ട്രംപ് പ്രത്യാശ പ്രകടിപ്പിച്ചു. ഇറാന്റെ ആക്രമണങ്ങൾക്ക് മറുപടിയായി ഇസ്രയേൽ തിരിച്ചടിക്കരുതെന്ന് ആവശ്യപ്പെടാനാണ് താൻ നെതന്യാഹുവിനെ വിളിക്കുന്നതെന്നും അദ്ദേഹം പറഞ്ഞു. 'നെതന്യാഹുവിന് ഒടുവിൽ ഒരു കരാർ അംഗീകരിക്കാതെ വേറെ വഴിയുണ്ടാകില്ല' എന്നും ട്രംപ് വ്യക്തമാക്കി.
അതേസമയം, ഇസ്രയേലിൽ മിസൈൽ ആക്രമണങ്ങൾ നടന്നതിനെ തുടർന്ന് തെഹ്രാനിലെ അന്താരാഷ്ട്ര വിമാനത്താവളത്തിലെ സർവീസുകളും ഇറാൻ താൽക്കാലികമായി നിർത്തിവച്ചു.
സംഘർഷാവസ്ഥക്കിടെ മധ്യ ഇസ്രയേലിൽ നടന്ന വെടിവെപ്പിൽ ഒരു റിസർവ് സൈനികൻ കൊല്ലപ്പെടുകയും അഞ്ച് പേർക്ക് പരിക്കേൽക്കുകയും ചെയ്തു. ഇസ്രയേൽ പൗരത്വമുള്ള അറബ് യുവാവാണ് ആക്രമണം നടത്തിയതെന്ന് പൊലീസ് അറിയിച്ചു. പിന്നീട് സുരക്ഷാസേന ഇയാളെ വെടിവച്ചു കൊന്നു. ആക്രമണത്തിന്റെ കാരണം വ്യക്തമല്ല.
ഇറാന്റെ മിസൈൽ ആക്രമണങ്ങൾക്കിടയിലും ചർച്ചകൾ മുന്നോട്ടുകൊണ്ടുപോകാനാണ് അമേരിക്കയുടെ ശ്രമം. ഇറാനുമായുള്ള അന്തിമ ധാരണയ്ക്ക് രാജ്യം വളരെ അടുത്തെത്തിയിരിക്കുകയാണെന്നും ഇപ്പോഴത്തെ സംഭവവികാസങ്ങൾ കാരണം അത് തകർക്കാൻ താൻ ആഗ്രഹിക്കുന്നില്ലെന്നും ട്രംപ് പറഞ്ഞു. ഇറാന്റെ ആക്രമണത്തിൽ വലിയ നാശനഷ്ടമൊന്നും ഉണ്ടായിട്ടില്ലെന്നും ഇസ്രയേൽ തിരിച്ചടിക്കില്ലെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു.
ഇതോടെ പശ്ചിമേഷ്യയിൽ സമാധാന ശ്രമങ്ങളും സൈനിക സംഘർഷവും ഒരേസമയം മുന്നേറുന്ന സങ്കീർണ സാഹചര്യം രൂപപ്പെട്ടിരിക്കുകയാണ്.
ഇറാൻ-ഇസ്രയേൽ സംഘർഷം വീണ്ടും രൂക്ഷം; മിസൈൽ ആക്രമണങ്ങൾക്ക് പിന്നാലെ വ്യോമപാതകൾ അടച്ചു, സമവായത്തിന് സമ്മർദവുമായി ട്രംപ്
