വാഷിംഗ്ടൺ: ഹോർമുസ് കടലിടുക്കിനെ ചുറ്റിപ്പറ്റിയുള്ള സംഘർഷം കൂടുതൽ രൂക്ഷമാകുന്നതിനിടെ, അമേരിക്ക ഇറാന്റെ ചരക്കുകപ്പൽ പിടിച്ചെടുത്തതായി അമേരിക്കൻ പ്രസിഡന്റ് ഡോണൾഡ് ട്രംപ് അറിയിച്ചു. അമേരിക്കൻ നാവികസേനയുടെ യുദ്ധക്കപ്പൽ ഗൾഫ് ഓഫ് ഒമാനിൽ കപ്പൽ തടഞ്ഞുവെന്നും മുന്നറിയിപ്പ് നൽകിയിട്ടും ഇറാനിയൻ സംഘം അനുസരിക്കാതിരുന്നതിനെ തുടർന്ന് കപ്പലിന്റെ എൻജിൻ ഭാഗത്ത് ആക്രമണം നടത്തി നിയന്ത്രണത്തിലാക്കിയതായും അദ്ദേഹം വ്യക്തമാക്കി.
'ടൗസ്ക' എന്ന പേരിലുള്ള ഈ കപ്പൽ അമേരിക്കയുടെ ഉപരോധ പട്ടികയിൽ ഉൾപ്പെട്ടതാണെന്നും കപ്പലിൽ എന്താണ് ഉള്ളതെന്ന് പരിശോധിച്ചുകൊണ്ടിരിക്കുകയാണെന്നും ട്രംപ് പറഞ്ഞു. എന്നാൽ സംഭവത്തെക്കുറിച്ച് ഇറാൻ ഔദ്യോഗികമായി സ്ഥിരീകരിച്ചിട്ടില്ല.
ഇതിന് പിന്നാലെ, കടലിടുക്കിലൂടെ സഞ്ചരിച്ച കപ്പലുകളെ ഇറാൻ ആക്രമിച്ചുവെന്നാരോപിച്ച് അമേരിക്ക രംഗത്തെത്തി. മറുവശത്ത്, അമേരിക്ക നടപ്പിലാക്കിയ ഉപരോധമാണ് യുദ്ധവിരാമ ലംഘനമെന്നും ഇത് മനുഷ്യാവകാശ ലംഘനമാണെന്നും ഇറാൻ വിദേശകാര്യ മന്ത്രാലയ വക്താവ് ആരോപിച്ചു.
ഇതിനിടെ, കടലിടുക്കിലൂടെ സഞ്ചരിക്കാൻ ശ്രമിച്ച ചില കപ്പലുകൾ വഴിമാറിയതായും റിപ്പോർട്ടുകളുണ്ട്. ലോകത്തിലെ എണ്ണഗതാഗതത്തിന്റെ പ്രധാന മാർഗമായ ഹോർമുസ് കടലിടുക്ക് വീണ്ടും സംഘർഷകേന്ദ്രമായി മാറിയിരിക്കുകയാണ്.
വെടിനിർത്തലിന്റെ കാലാവധി അവസാനിക്കാൻ ദിവസങ്ങൾ മാത്രം ബാക്കിയിരിക്കെ, ഇരു രാജ്യങ്ങളും പരസ്പരം കടുത്ത മുന്നറിയിപ്പുകളുമായി രംഗത്തെത്തിയത് സ്ഥിതി കൂടുതൽ ആശങ്കാജനകമാക്കുന്നു. ചർച്ചകൾ നടക്കാനിരിക്കെ സംഘർഷം കൂടുന്നതോടെ അന്താരാഷ്ട്ര തലത്തിൽ ആശങ്ക ഉയരുകയാണ്.
ഹോർമുസ് കടലിടുക്കിൽ സംഘർഷം ശക്തം; ഇറാനിയൻ കപ്പൽ അമേരിക്ക പിടിച്ചെടുത്തു
